Aroma 1

Nĩ niĩ Saũlũ, ndungata ya Messiya Yahshua, o niĩ njĩtĩtwo nduĩke mũtũmwo, na ngaamũrwo hunjagie Ũhoro-ũrĩa-Mwega wa Yahweh,

o Ũhoro-ũrĩa-Mwega eeranĩire o mbere na tũnua twa anabii ake thĩinĩ wa Maandĩko marĩa Maamũre,

ũrĩa ũkoniĩ Mũrũwe, ũrĩa ta mũndũ warĩ wa rũciaro rwa Daudi.

Na rĩrĩ, Roho Mwamũre nĩ onanirie na ũhoti atĩ Yahshua Messiya nĩ Mũrũ wa Yahweh tondũ wa ũrĩa aariũkire akiuma kũrĩ arĩa akuũ: o we Yahshua Messiya Mwathi witũ.

kũgerera we Yahweh nĩ atũheete wega wake, na agatũhe ũhoti ta atũmwo nĩguo twĩre andũ-a-Ndũrĩrĩ ciothe kũndũ guothe ũrĩa Yahweh amekĩire, nĩguo mamwĩtĩkie na mamwathĩkĩre, nĩguo matũme rĩĩtwa rĩake rĩgoocagwo

O na inyuĩ mũrĩ amwe a acio metĩtwo matuĩke a Yahshua Messiya.

Ndĩramwandĩkĩra marũa maya inyuothe arĩa mũrĩ kũu Roma, o inyuĩ mwendetwo nĩ Yahweh, na mũgetwo mũtuĩke andũ aamũre: Wega na thayũ kuuma kũrĩ Yahweh Ithe witũ, na kuuma kũrĩ Mwathi Yahshua Messiya, iroikara na inyuĩ.

O mbere nĩ ngũcokeria Kĩhoti wakwa ngatho thĩinĩ wa Yahshua Messiya nĩ ũndũ wanyu inyuothe, tondũ ũhoro wa wĩtĩkio wanyu nĩ ũmenyithanĩtio thĩ yothe.

Yahweh, ũrĩa niĩ ndungatagĩra na ngoro yakwa yothe na ũndũ wa kũhunjia Ũhoro-ũrĩa-Mwega wa Mũrũwe-rĩ, nĩwe mũira wakwa wa ũrĩa ndũũraga ndĩmũririkanaga

mahoya-inĩ makwa hĩndĩ ciothe; na nĩ ndĩrahoya atĩ rĩu nĩ ũndũ wa kwenda kwa Yahweh no hingũrĩrwo njĩra nĩguo njũke kũrĩ inyuĩ.

Nĩ ndĩrerirĩria mũno tuonane na inyuĩ nĩgetha ndĩmũgaĩre iheo cia kĩĩroho nĩguo muongererwo hinya,

ũguo nĩ kuuga atĩ inyuĩ na niĩ tũgĩe na ũhoro wa kũũmanĩrĩria, o mũndũ omĩrĩrie mũndũ ũrĩa ũngĩ na wĩtĩkio wake.

Ariũ na aarĩ a Ithe witũ, ndikwenda mwage kũmenya atĩ nĩ mahinda maingĩ ndanabanga kũmũceerera (no ndanagirĩrĩrio gwĩka ũguo nginya rĩu) nĩgetha ngĩe na maciaro thĩinĩ wanyu, o ta ũrĩa ngĩĩte na maciaro thĩinĩ wa andũ-a-Ndũrĩrĩ iria ingĩ.

Niĩ haana ta ndĩ na thirĩ na Ayunani o na arĩa matarĩ Ayunani, ningĩ ngagĩa na thirĩ wa andũ arĩa ogĩ o na arĩa matarĩ ogĩ.

Nĩ ũndũ ũcio nĩkĩo ndĩriragĩria mũno kũhunjia Ũhoro-ũrĩa-Mwega o na kũrĩ inyuĩ arĩa mũtũũraga Roma.

Niĩ ndingĩconokera Ũhoro-ũrĩa-Mwega, tondũ nĩguo hinya wa Yahweh wa gũtũma mũndũ o wothe ũrĩa ũwĩtĩkĩtie ahonoke: O mbere Ayahudi, na thutha wao nĩ andũ-a-Ndũrĩrĩ.

Nĩgũkorwo thĩinĩ wa Ũhoro-ũrĩa-Mwega, ũthingu ũrĩa uumĩte kũrĩ Yahweh nĩ ũguũrĩtio, na nĩguo ũthingu ũrĩa wonekaga na ũndũ wa gwĩtĩkia kuuma o kĩambĩrĩria nginya kĩrĩkĩro, o ta ũrĩa kwandĩkĩtwo atĩrĩ: “Mũndũ ũrĩa mũthingu arĩtũũraga muoyo nĩ ũndũ wa gwĩtĩkia.”

Mangʼũrĩ ma Yahweh nĩ maguũrĩtio kuuma igũrũ mokĩrĩre ũhoro wothe wa andũ kũregana na Yahweh, na waganu wa andũ arĩa magiragĩrĩria ũhoro-ũrĩa-wa-ma na ũndũ wa waganu wao,

nĩgũkorwo maũndũ ma Yahweh marĩa mangĩmenyeka nĩo matiagĩte kũmenyeka nĩo, tondũ Yahweh nĩwe wamamenyithirie.

Nĩgũkorwo kuuma rĩrĩa thĩ yombirwo, maũndũ ma Yahweh marĩa matonekaga, na nĩmo hinya wake ũtathiraga, o na mũhianĩre wake wa na igũrũ, nĩ marĩkĩtie kuoneka o wega, na makamenyeka nĩ ũndũ wa indo iria ciombirwo, nĩgetha andũ matikagĩe na kĩĩgwatio.

Tondũ o na harĩa maamenyete Yahweh, matiigana kũmũgooca ta arĩ Kĩhoti, kana makĩmũcokeria ngatho, no meciria mao maatuĩkire ma tũhũ, nacio ngoro ciao ngĩgu ikĩgĩa nduma.

Na o rĩrĩa moigaga atĩ o nĩ ogĩ-rĩ, noguo maatuĩkire irimũ,

nao magĩkũũrania riri wa Kĩhoti ũrĩa mũtũũra muoyo na mĩhianano ĩthondeketwo ĩkahaana ta andũ arĩa makuaga, na nyoni, na nyamũ cia magũrũ mana, o na nyamũ iria itambaga thĩ.

Nĩ ũndũ ũcio Yahweh akĩmarekereria marũmagĩrĩre merirĩria mao mooru marĩa ngoro ciao cieriragĩria, o na mekage maũndũ ma ũũra thoni ma kwagithia mĩĩrĩ yao gĩtĩo, mũndũ na ũrĩa ũngĩ.

Nĩ makũũranirie ũhoro-ũrĩa-wa-ma wa Yahweh na maheni, makĩhoya na magĩtungatĩra indo iria ciombirwo handũ ha gũtungatĩra Mũciũmbi, o ũcio wa kũgoocagwo nginya tene, Amein.

Tondũ wa ũguo-rĩ, Yahweh nĩ amarekereirie marũmagĩrĩre merirĩria mao mooru ma maũndũ ma thoni. O na andũ-a-nja ao nĩ maakũũranirie mũtugo wao ũrĩa wa ndũire na ũrĩa ũtarĩ wa ndũire.

O nao arũme o ũndũ ũmwe nĩ maatiganĩirie mũtugo wao ũrĩa wa ndũire na andũ-a-nja, magaakanagwo nĩ merirĩria mooru ma kwĩriranĩria o ene. Arũme magĩĩka ciĩko cia ũũra-thoni na arũme arĩa angĩ, nao nĩ megwatĩire thĩinĩ wa mĩĩrĩ yao ene iherithia rĩrĩa rĩmagĩrĩire nĩ ũndũ wa waganu ũcio wao.

Na makĩria ma ũguo-rĩ, tondũ mationire bata wa gũtũũra mamenyete Yahweh, nake akĩmarekereria magĩe na meciria ma ũmaramari, mekage maũndũ marĩa mataagĩrĩirwo nĩ gwĩkwo.

Nao makĩiyũrwo nĩ waganu wa mĩthemba yothe, ũũru, na ũkoroku, na meciria ma ũmaramari. Makaiyũrwo nĩ ũiru, na ũragani, na ngũĩ, na maheni, na rũmena. Magatuĩka andũ a mũhuhu,

na acambania, na athũũri Yahweh, na aciinũrani, na egaathi, na etĩi, mathugundaga njĩra njerũ cia gwĩka ũũru, na andũ matangĩathĩkĩra aciari ao;

nao ti akuũku wega, na matitĩaga ũhoro ũrĩa mũrĩĩkanĩre, na nĩ ooru mũno, na matirĩ tha.

Na o na gwatuĩka nĩ moĩ Watho wa ũthingu wa Yahweh atĩ andũ arĩa mekaga maũndũ ta macio maagĩrĩirwo nĩ gũkua, to gũthiĩ mathiiaga na mbere na gwĩka maũndũ macio tu, no nĩ metĩkanagia na andũ arĩa mekaga maũndũ macio.