Aroma 12

Nĩ ũndũ ũcio, ariũ na aarĩ a Ithe witũ, ndamũthaitha tondũ wa ũrĩa Yahweh anamũiguĩra tha, mwĩrute mĩĩrĩ yanyu ĩtuĩke magongona marĩ muoyo, na maamũre mangĩkenia Yahweh, arĩ guo ũtungata ũrĩa wagĩrĩire na wa ma wa kũgoocithia Yahweh.

Mũtikanahaananie ũhoro wanyu na maũndũ marĩa mekagwo nĩ andũ a thĩ ĩno; no garũrũkai na ũndũ wa kwerũhio meciria manyu. Hĩndĩ ĩyo nĩ lmũrĩhotaga kũmenya na gwĩtĩkĩra wendi ũcio wa Yahweh, o wendi ũcio wake mwega ũrĩa wa kũmũkenagia, na mũkinyanĩru kũna.

Nĩ ũndũ wa wega ũrĩa ndaaheirwo nĩ Yahweh-rĩ, ngwĩra o mũndũ wothe wanyu atĩrĩ: Mũndũ ndakae gwĩtua mũnene gũkĩra ũrĩa aagĩrĩirwo nĩ gũkorwo, no nĩ kaba mũndũ eciragie ũhoro wake we mwene na atue itua rĩagĩrĩru, kũringana na wĩtĩkio ũrĩa Yahweh amũheete.

O ta ũrĩa tũrĩ na ciĩga nyingĩ thĩinĩ wa mwĩrĩ ũmwe, nacio ciĩga ici ciothe itirutaga wĩra mũthemba ũmwe-rĩ,

no taguo o na ithuĩ, o na twatuĩka tũrĩ aingĩ, tũrĩ mwĩrĩ ũmwe thĩinĩ wa Messiya, na o kĩĩga nĩ kĩohanĩtio na iria ingĩ ciothe.

Ningĩ nĩ tũheetwo iheo itiganĩte, kũringana na wega ũrĩa tũheetwo. Angĩkorwo kĩheo kĩa mũndũ nĩ kũratha mohoro-rĩ, nĩ ahũthĩre kĩheo kĩu kũringana na ũrĩa wĩtĩkio wake ũigana.

Angĩkorwo nĩ gũtungata, nĩ atungatage; na angĩkorwo nĩ kũrutana, nĩ arutanage;

ningĩ angĩkorwo nĩ kũũmĩrĩria andũ, nĩ akĩũmanagĩrĩrie; na angĩkorwo nĩ wa kũrũmbũiya mabata ma andũ arĩa angĩ, nĩ akĩheanage na ũtana; angĩkorwo nĩ wa gũtongoria, nĩ atongoragie na kĩyo; ningĩ ũrĩa wa kũiguanĩra tha, nĩ ekage ũguo akenete.

Wendani wanyu nĩ ũkoragwo nĩ ũrĩa ũtarĩ ũhinga. Thũũragai ũndũ ũrĩa mũũru; naguo ũndũ ũrĩa mwega mũkĩũrũmagie.

Endanagai mũndũ na ũrĩa ũngĩ, mũrĩ na wendani ta wa ciana cia ithe ũmwe. Na mũndũ nĩ atĩage ũrĩa ũngĩ gũkĩra we mwene.

Rutagai wĩra na kĩyo, na mũreke ngoro cianyu ihĩahĩage, mũgĩtungatagĩra Yahweh.

Ikaragai mũkenete nĩ ũndũ mũrĩ na kĩĩrĩgĩrĩro, na mũkiragĩrĩrie hĩndĩ ya mathĩna, na mũikarage mũkĩhoyaga hĩndĩ ciothe.

Teithagiai andũ arĩa aamũre mabataro-inĩ mao. Tũũrai mũnyitaga andũ ũgeni.

Rathimagai andũ arĩa mamũnyariraga; marathimagei na mũtikanamarume.

Kenagai hamwe na arĩa marakena; na mũcakae na arĩa maracakaya.

Tũũrai mũiguanĩte mũndũ na ũrĩa ũngĩ. Tigagai gwĩtĩa, no mwĩtĩkagĩre kũgĩa ngwatanĩro na andũ arĩa matarĩ igweta. Tigagai kwĩona ta mũrĩ ogĩ.

Mũtikaneke mũndũ ũũru nĩ ũndũ wa ũũru ũrĩa amwĩkĩte. Menyagĩrĩrai nĩguo mwĩkage maũndũ marĩa mangĩonwo maagĩrĩire nĩ andũ othe.

Inyuĩ-rĩ, geragiai gũikarania na mũndũ o wothe na thayũ kũngĩhoteka.

Arata akwa, mũtikanerĩhĩrie, no tigagĩriai mangʼũrĩ ma Yahweh handũ, nĩgũkorwo nĩ kwandĩkĩtwo atĩrĩ: “Kũrĩhanĩria nĩ gwakwa; nĩ niĩ ngaarĩhanĩria,” ũguo nĩguo Yahweh ekuuga.

Handũ ha ũguo-rĩ: “Thũ yaku ĩngĩkorwo ĩhũtiĩ-rĩ, mĩhe irio; ĩngĩkorwo nĩ ĩnyotiĩ-rĩ, mĩhe gĩa kũnyua. Gwĩka ũguo-rĩ, nĩ kũmĩigĩrĩra makara ma mwaki mũtwe.”

Mũtikanatorio nĩ ũũru, no toragiai ũũru na wega.