Aroma 11

Ningĩ ngũũria atĩrĩ: Yahweh nĩ kũrega aaregire andũ ake? Kũroaga gũtuĩka ũguo! Niĩ mwene ndĩ Mũisiraeli, wa rũciaro rwa Iburahĩmu, na wa mũhĩrĩga wa Benjamini.

Yahweh ndaigana kũrega andũ ake arĩa aamenyete o mbere. Kaĩ mũtooĩ ũrĩa Maandĩko moigĩte harĩa handĩkĩtwo ũhoro wa Eliya, ũrĩa aathaithire Yahweh nĩ ũndũ wa andũ a Isiraeli, akiuga atĩrĩ:

“Yahweh Kĩhoti, nĩ moragĩte anabii aku na nĩ matharĩtie igongona ciaku; no niĩ nyiki ndigarĩte, nao nĩ kũnjaria maranjaria manjũrage”?

Yahweh aamũcokeirie atĩrĩ, “Nĩ ndĩĩtigĩirie andũ ngiri mũgwanja arĩa matarĩ maaturĩria Baali ndu.”

Nĩ ũndũ ũcio, o na hĩndĩ ĩno tũrĩ, nĩ kũrĩ na matigari marĩa Yahweh ethurĩire nĩ ũndũ wa wega wake.

Na angĩkorwo Yahweh aamathurire nĩ ũndũ wa wega wake-rĩ, gũtingĩgĩtuĩka atĩ maathurirwo nĩ ũndũ wa ciĩko ciao; korwo nĩ ũguo-rĩ, wega wa Yahweh ndũngĩgĩtuĩka nĩ wega rĩngĩ.

Rĩu tũkiuge atĩa? Nĩ atĩrĩ, ũndũ ũrĩa andũ a Isiraeli maatũire macaragia na kĩyo kĩnene matiawonire, no andũ arĩa athure-rĩ, nĩ mawonire. Acio angĩ nao nĩ moomirio ngoro,

o ta ũrĩa kwandĩkĩtwo atĩrĩ: “Yahweh nĩ amaheire roho ta wa andũ magonetio nĩ toro, akĩmahe maitho matekuona, na matũ matekũigua, o nginya ũmũthĩ ũyũ.”

Nake Daudi ekuuga atĩrĩ: “Metha yao ya kũrĩĩra ĩrotuĩka mũtego, na kĩndũ gĩa kũmagwatia, o na ĩtuĩke ya kũmahĩnga, na irĩhi rĩa ũũru wao.

Maitho mao marogĩa nduma, matige gũcoka kuona, na mathiage mahocereire nginya tene.”

Ningĩ ngũũria atĩrĩ: Ayahudi nĩ kũhĩngwo maahĩngirwo makĩgũa ũndũ matangĩũkĩra? Kũroaga gũtuĩka ũguo! Aca ti guo o na atĩa! Ũrĩa kũrĩ nĩ atĩ, tondũ wa mehia mao, ũhonokio nĩ ũkinyĩire andũ-a-Ndũrĩrĩ nĩgetha andũ a Isiraeli maigue ũiru.

No angĩkorwo kũgũa kwao nĩ gũtuĩkĩte ũtonga kũrĩ kĩrĩndĩ gĩa thĩ, nakuo kũnyihĩrĩrio kwao gũgatuĩka ũtonga kũrĩ andũ-a-Ndũrĩrĩ-rĩ, githĩ kũiyũrĩrĩrwo kwao gũtingĩkĩrehe ũtonga mũingĩ makĩria!

Rĩu-rĩ, nĩ inyuĩ andũ-a-Ndũrĩrĩ ndĩraarĩria. Tondũ ndĩ mũtũmwo ũtũmĩtwo kũrĩ andũ-a-Ndũrĩrĩ-rĩ, ũtungata ũcio wakwa nĩ ndĩwĩkĩrĩire mũno,

ngĩĩgeragĩria kana hihi ndahota kwarahũra andũ a rũruka rwakwa kĩũmbe maigue ũiru, na ndũme amwe ao mahonokio.

Tondũ angĩkorwo kũregwo kwao nĩkuo gwa gũtũma kĩrĩndĩ gĩa thĩ kĩiguithanio na Yahweh-rĩ, ĩ gwĩtĩkĩrwo kwao kũngĩkĩrehe kĩ, tiga o kũriũka kuuma kũrĩ arĩa akuũ?

Angĩkorwo kĩenyũ gĩa kĩmere kĩrĩa kĩrutĩirwo Yahweh kĩrĩ maciaro ma mbere nĩ kĩamũre-rĩ, o nakĩo kĩmere gĩothe no kĩamũre; angĩkorwo mũri nĩ mwamũre-rĩ, o nacio honge no nyamũre.

Angĩkorwo honge imwe cia mũtamaiyũ wa mũgũnda nĩ ciakahũrirwo, nawe, o na watuĩka ũrĩ rũhonge rwa mũtamaiyũ wa gĩthaka-rĩ, ũgĩciarithanio na honge icio ingĩ, na rĩu nĩ ũgayanaga ũnoru na icio ingĩ kuuma mũri wa mũtamaiyũ ũcio-rĩ,

menya ndũkae kwĩganĩra honge icio ingĩ. Ũngĩka ũguo-rĩ, ririkana ũndũ ũyũ: Wee tiwe ũnyitĩrĩire mũri ũcio, no nĩ mũri ũcio ũkũnyitĩrĩire.

No wee no ũkiuge atĩrĩ, “Honge icio ciakahũrirwo nĩgetha njiarithanio na mũtĩ.”

Ũguo noguo. No rĩrĩ, honge icio ciakahũrirwo tondũ wa kwaga gwĩtĩkia, nawe wĩhandĩte nĩ ũndũ wa gwĩtĩkia. Ndũkae gwĩtĩĩa, no wĩtigagĩre.

Tondũ angĩkorwo Yahweh ndaacaĩire honge icio cia ndũire-rĩ, o nawe ndangĩgũcaĩra.

Nĩ ũndũ ũcio, mwĩcũraniei ũhoro wa ũtugi wa Yahweh na iherithia iritũ rĩake: Harĩ andũ acio maagũire, nĩ amaherithirie na iherithia iritũ, no inyuĩ, nĩ kũmũtuga amũtugaga, angĩkorwo nĩ mũgũtũũra thĩinĩ wa ũtugi wake. Kwaga ũguo-rĩ, o na inyuĩ no mũtinio mweherio.

Andũ acio nao mangĩtiga kũrũmia ũhoro ũcio wa kwaga gwĩtĩkia-rĩ, nĩ magaciarithanio na mũtĩ, nĩgũkorwo Yahweh arĩ na ũhoti wa kũmaciarithania naguo rĩngĩ.

Nĩ ũndũ-rĩ, angĩkorwo mwatinirio kuuma mũtamaiyũ-inĩ wa gĩthaka-inĩ, na mũgĩcoka mũgĩciarithanio na mũtamaiyũ wa mũgũnda, na ũcio nĩ ũhoro ũtarĩ wa ndũire-rĩ, githĩ ti ũhũthũ makĩria honge ici, o ici ciarĩ ciaguo, gũciarithanio na mũtamaiyũ wa mũgũnda o ũcio warĩ wacio kĩũmbe!

Ariũ na aarĩ a Ithe witũ, ndikwenda mũikare mũrigĩtwo nĩ ũhoro ũyũ wa hitho, nĩgetha mũtikae kwĩona ta mũrĩ ogĩ: Hitho nĩ atĩ, andũ amwe a Isiraeli nĩ anyite nĩ ũũmũ wa ngoro, o nginya rĩrĩa mũigana wa andũ-a-Ndũrĩrĩ ũkaahinga gũtonya.

Nĩ ũndũ ũcio-rĩ, andũ a Isiraeli othe nĩ makahonokio, o ta ũrĩa kwandĩkĩtwo atĩrĩ: “Mũhonokia nĩ akoima Zayuni; naguo ũhoro wa kũregana na Yahweh nĩ akaweheria kuuma kũrĩ Jakubu.

Nakĩo gĩkĩ nĩkĩo kĩrĩkanĩro kĩrĩa ngaarĩkanĩra nao, rĩrĩa ngaamehereria mehia mao.”

Ha Ũhoro-ũrĩa-Mwega-rĩ, andũ a Isiraeli nĩ matuirwo thũ nĩ ũndũ wanyu, no ha ũhoro wa gũthuurwo-rĩ, nĩ mendetwo nĩ ũndũ wa maithe mao ma tene,

nĩgũkorwo iheo iria Yahweh aheanaga na gwĩtana kũrĩa etanaga nakuo ndacokaga kwĩricũkwo.

O ta ũrĩa inyuĩ hĩndĩ ĩmwe mwaremeire Yahweh, no rĩu nĩ amũiguĩrĩire tha nĩ ũndũ wa ũremi wao-rĩ,

rĩu no taguo o nao matuĩkĩte aremi, nĩgetha o nao rĩu maiguĩrwo tha nĩ ũndũ wa ũrĩa Yahweh amũiguĩrĩire tha.

Nĩgũkorwo Yahweh nĩ atuĩte andũ othe atĩ matiĩtĩkĩtie nĩgetha acoke amaiguĩre tha othe.

Hĩ! Yahweh, kaĩ ũũgĩ waku ona ũmenyo nĩ irikĩire-ĩ! O namo matua make ma cira kaĩ mangĩgĩtuĩrĩka hihi? Nayo mĩthiĩre yake ĩgakĩra kũmenyeka-ĩ!

“Nũ ũmenyete Roho wa Yahweh? Kana nũ ũkoretwo akĩmũtaara?”

“Nũ wanahe Yahweh kĩndũ, atĩ nĩguo Yahweh acoke amũrĩhe kĩndũ kĩu?”

Nĩgũkorwo indo ciothe cioimire harĩ we, na nĩwe ũcitũũragia ciothe, na ciothe-rĩ, no ciake. Nake arogoocagwo nginya tene na tene! Amein.