Aroma 10
Ariũ na aarĩ a Ithe witũ, ũndũ ũrĩa ngoro yakwa yendete mũno na ũrĩa hoyaga Yahweh nĩ ũndũ wa andũ a Isiraeli nĩ atĩ mahonokio.
Nĩgũkorwo niĩ ndĩ mũira wao atĩ nĩ marĩ kĩyo ũhoro-inĩ wa Yahweh, no kĩyo kĩu kĩao gĩkaaga ũmenyi.
Na tondũ matiigana kũmenya ũthingu ũrĩa uumaga kũrĩ Yahweh no nĩ kũgeria maageririe kwĩhandĩra ũthingu wao ene-rĩ, matiigana kwĩnyihĩria ũthingu wa Yahweh.
Nake Messiya nĩwe wakinyirie ũhoro wa Watho mũthia nĩgetha kũgĩe na ũthingu kũrĩ mũndũ o wothe ũrĩa wĩtĩkĩtie.
Musa aataarĩirie ũhoro wa ũthingu ũrĩa uumanaga na Watho na njĩra ĩno: “Mũndũ ũrĩa wĩkaga maũndũ macio arĩtũũragio muoyo nĩmo.”
No rĩrĩ, ũthingu ũrĩa uumanaga na gwĩtĩkia uugaga atĩrĩ: “Ndũkaneyũrie na ngoro atĩrĩ, ‘Nũ ũkwambata akinye igũrũ?’ ” (ũguo nĩ kuuga, agĩĩre Messiya amũrehe gũkũ thĩ)
“o na ndũkeyũrie, ‘Nũ ũkaaharũrũka irima rĩrĩa rĩtarĩ gĩturi?’ ” (ũguo nĩ kuuga, ambatie Messiya kuuma kũrĩ arĩa akuũ).
No ũhoro ũcio uugaga atĩa? Uugaga atĩrĩ, “Ũhoro ũrĩ o hakuhĩ nawe; ũrĩ o kanua-inĩ gaku, na ngoro-inĩ yaku,” naguo ũhoro ũcio nĩguo ũhoro wa wĩtĩkio ũrĩa tumbũraga:
Atĩ ũngiumbũra na kanua gaku atĩ, “Yahshua nĩ Mwathi,” o na gwĩtĩkia wĩtĩkie na ngoro yaku atĩ Yahweh nĩ amũriũkirie oime kũrĩ arĩa akuũ-rĩ, no ũhonoke.
Nĩgũkorwo mũndũ etĩkagia na ngoro yake, agatuwo mũthingu, na akoimbũra na kanua gake, agakĩhonokio.
Tondũ Maandĩko moigĩte atĩrĩ, “Ũrĩa wothe ũmwĩhokaga ndarĩ hĩndĩ agaaconorithio.”
Nĩgũkorwo gũtirĩ ngũũrani gatagatĩ ka Mũyahudi na mũndũ-wa-Ndũrĩrĩ: tondũ Mũthamaki o ũcio nĩwe Mũthamaki wa andũ othe, na nĩ arathimaga mũno arĩa othe mamũkayagĩra;
nĩgũkorwo nĩ kwandĩke atĩrĩ, “Mũndũ wothe ũrĩa ũgaakaĩra rĩĩtwa rĩa Yahweh nĩ akahonoka.”
No rĩrĩ, mangĩmũkaĩra atĩa matamwĩtĩkĩtie? Na mangĩmwĩtĩkia atĩa matarĩ maigua ũhoro wake? Na mangĩkĩigua atĩa matarĩ na mũndũ wa kũmahunjĩria?
Ningĩ andũ mangĩhota atĩa kũhunjia ũhoro matarĩ atũme? O ta ũrĩa kwandĩkĩtwo atĩrĩ, “Kaĩ magũrũ ma andũ arĩa mahunjagia Ũhoro-ũrĩa-Mwega nĩ maagĩrĩire-ĩ!”
No rĩrĩ, ti andũ othe Isiraeli meetĩkĩrire Ũhoro-ũrĩa-Mwega. Nĩgũkorwo Isaiya oririe atĩrĩ, “Yahweh, nũ wĩtĩkĩtie ũhoro witũ?”
Nĩ ũndũ ũcio, gwĩtĩkia kuumanaga na kũigua ũhoro, naguo ũhoro ũiguagwo na ũndũ wa kiugo kĩa Messiya.
No ngũũria atĩrĩ: Matirĩ maigua Ũhoro? Hatirĩ nganja nĩ maiguĩte, tondũ Maandĩko mekuuga atĩrĩ: “Mũgambo wao nĩ wahunjire thĩ yothe, nacio ciugo ciao igĩkinya ituri-inĩ ciothe cia thĩ.”
Na ningĩ ngũũria atĩrĩ: Andũ a Isiraeli matiigana kũmenya ũguo? Atĩrĩ, Musa o mbere oigire atĩrĩ, “Nĩ ngatũma mũigue ũiru nĩ ũndũ wa rũrĩrĩ hatarĩ; nĩ ngatũma mũrakare nĩ ũndũ wa rũrĩrĩ rũtarĩ na ũmenyo!”
Nake Isaiya akiuga omĩrĩirie mũno atĩrĩ, “Andũ arĩa mataanjaragia nĩo maanyonire; ndeeguũrĩirie arĩa mataanjũũragĩrĩria.”
No ha ũhoro ũkoniĩ Isiraeli akoiga atĩrĩ, “Mũthenya wothe ndindaga ndambũrũkĩtie moko makwa kũrĩ andũ aremi, na a ngarari.”