Aroma 9
Niĩ ngwaria ũhoro-wa-ma ndĩ thĩinĩ wa Messiya, ti maheni ndĩraaria, o nayo thamiri yakwa nĩyo mũira wakwa thĩinĩ wa Roho Mwamũre,
atĩ ndĩ na kĩeha kĩnene na ruo rwa ngoro rũtarathira.
Nĩgũkorwo ingĩendire niĩ mwene nyitwo nĩ kĩrũmi na nyingatwo ndigithanio na Messiya handũ-inĩ ha ariũ na aarĩ a Ithe witũ acio a rũrĩrĩ rwitũ kĩũmbe,
nĩo andũ a Isiraeli. O nĩo Yahweh aatuire ciana ciake; na nĩo maikaraga na riri wake, na no-o matuĩtwo andũ a kĩrĩkanĩro, na a kwamũkĩra Watho, na ene ũtungati, o na ningĩ nĩo merĩirwo ciĩranĩro.
Ningĩ maithe maitũ marĩa ma tene maarĩ a kĩruka kĩu, nake Messiya aarĩ wa rũciaro rwao ha ũhoro wa mwĩrĩ, o we Kĩhoti ũrĩa wathaga maũndũ mothe, ũrĩa ũgoocagwo nginya tene! Amein.
Ũguo ti kuuga atĩ kiugo kĩa Yahweh nĩ kĩagĩte kũhinga. Nĩgũkorwo ti andũ othe arĩa maciarĩirwo Isiraeli marĩ Aisiraeli kũna.
O na ningĩ ti othe ciana cia Iburahĩmu, o na gũtuĩka nĩ a rũciaro rwake. No rĩrĩ, eerirwo atĩrĩ, “Rũciaro rũrĩa rũgeetanio nawe rũkoima harĩ Isaaka.”
Ũguo nĩ ta kuuga atĩrĩ, ti ciana iria iciarĩtwo na njĩra ya ndũire ingĩtuĩka ciana cia Yahweh, no nĩ ciana cia kĩĩranĩro ituwagwo cia mbeũ ya Iburahĩmu.
Nĩgũkorwo kĩĩranĩro kĩoigĩte atĩrĩ: “Ihinda rĩrĩa rĩamũre rĩakinya nĩ ngacoka, nake Sara nĩ akagĩa kaana ga kahĩĩ.”
Na to ũguo wiki, o nacio ciana cia Rebeka ciarĩ cia ithe o ũmwe, na nĩwe ithe witũ Isaaka.
No rĩrĩ, ciana icio cia mahatha itanaciarwo, o na itekĩte ũndũ o na ũrĩkũ mwega kana mũũru, nĩguo mũbango ũrĩa Yahweh aathugundĩte wa gwĩthuurĩra andũ ũhinge:
Ti na ũndũ wa ciĩko iria mekĩte, no nĩ ũndũ wa wendi wa ũcio wĩtanaga, nĩ erire Rebeka atĩrĩ, “Ũrĩa mũkũrũ nĩ agatungatĩra ũrĩa mũnini.”
O ta ũrĩa kwandĩkĩtwo atĩrĩ: “Nĩ ndendire Jakubu, no ngĩthũũra Esaũ.”
Tũkiuge atĩa nĩ ũndũ wa ũhoro ũcio? Yahweh no akorwo na ũndũ ũtarĩ wa ũthingu? Kũroaga gũtuĩka ũguo!
Nĩgũkorwo erire Musa atĩrĩ, “Nĩ ndĩiguagĩra tha ũrĩa ndenda kũiguĩra tha, na ngacaĩra ũrĩa ndenda gũcaĩra.”
Tondũ ũcio-rĩ, ũndũ ũcio nduonekaga nĩ ũndũ wa wendi wa mũndũ, kana nĩ ũndũ wa kĩyo gĩake, no nĩ ũndũ wa tha cia Yahweh.
Nĩgũkorwo Maandĩko-inĩ Firaũni erĩtwo atĩrĩ: “Ndagũtũũgĩririe nĩ ũndũ wa gĩtũmi gĩkĩ kĩũmbe, nĩguo nyonanie hinya wakwa thĩinĩ waku, na nĩguo rĩĩtwa rĩakwa rĩhunjio thĩ yothe.”
Nĩ ũndũ ũcio Yahweh aiguagĩra tha mũndũ ũrĩa enda kũiguĩra tha, na akoomia ngoro ya ũrĩa enda kũũmia.
Ũmwe wanyu ahota kũnjũria atĩrĩ: “Yahweh atũire atũtuagĩra mahĩtia nĩkĩ? Tondũ nũ ũngĩkĩhota kũregana na ũrĩa Yahweh ekwenda?”
No wee-rĩ, ũkĩrĩ ũ mũndũ ũyũ nĩguo ũcokanĩrie na Yahweh? “Kĩndũ kĩrĩa kĩombirwo-rĩ, no kĩũrie ũcio wakĩũmbire, ‘Wanyũmbire ũũ nĩkĩ?’ ”
Githĩ mũũmbi wa nyũngũ ndarĩ na kĩhooto gĩa kũhũthĩra rĩũmba o ũrĩa angĩenda; kĩenyũ kĩmwe kĩa rĩũmba rĩu athondeke indo imwe cia kũhũthĩrwo na njĩra ya gũtĩĩka na ingĩ nĩ ũndũ wa mahũthĩro ma ndũire?
Ĩ kũngĩkorwo Yahweh, tondũ nĩ athuurĩte kuonania mangʼũrĩ make na kũmenyithania hinya wake, nĩ akirĩrĩirie mũno arĩ na wetereri mũnene andũ arĩa mahaana ta indo icio cia kũrakarĩrwo, o icio ciahaarĩirio kwanangwo?
Ĩ kũngĩkorwo ekaga ũguo nĩgetha atũme ũingĩ wa riri wake ũmenyeke nĩ arĩa mahaana ta indo iria akaiguĩra tha, arĩa aahaarĩirie o mbere matuĩke a kũgaya riri ũcio,
na nĩo ithuĩ, ithuĩ arĩa eetire, na to arĩa moimĩte kũrĩ Ayahudi, no nĩ kuuma o na kũrĩ andũ-a-Ndũrĩrĩ?
O ta ũrĩa oigĩte Ibuku-inĩ rĩa Hosea, atĩrĩ: “Andũ arĩa matarĩ akwa nĩo ngeeta ‘andũ akwa’; nake mũndũ-wa-nja ũcio ũtarĩ mwende nĩwe ngeeta ‘mwendwa wakwa.’ ”
na ningĩ, “Nĩ gũgatuĩka atĩ, o handũ harĩa meerĩirwo atĩrĩ, ‘Inyuĩ mũtirĩ andũ akwa,’ no ho mageetĩrwo ‘ariũ a Kĩhoti’.”
Naguo ũhoro ũkoniĩ Isiraeli, Isaiya nĩ anĩrĩire, akiuga atĩrĩ: “O na gũtuĩka andũ a Isiraeli maigana ta mũthanga wa iria-inĩ-rĩ, no matigari mao makaahonoka.
Nĩ ũndũ Mwathi Yahweh nĩ akahingia ũhoro ũrĩa atuĩrĩire thĩ, aũrĩkie narua ategũtindĩrĩra.”
Na o ta ũrĩa Isaiya oigĩte o mbere ũndũ ũcio ũtanakinya, atĩrĩ: “Tiga Kĩhoti aatũtigĩirie njiaro-rĩ, ithuĩ tũngĩatuĩkire ta Sodomu, na tũhaane o ta Gomora.”
Tũkiuge atĩa ha ũhoro ũcio? Atĩ andũ-a-Ndũrĩrĩ, arĩa mataathingatire ũthingu, nĩ magĩire naguo, ũthingu ũrĩa ũgĩagwo naguo na ũndũ wa gwĩtĩkia;
no atĩ andũ a Isiraeli, arĩa maathingatire Watho wa ũthingu-rĩ, matiigana kũgĩa na watho ũcio.
Maagire kũgĩa naguo nĩkĩ? Tondũ matiaũthingatire na njĩra ya wĩtĩkio, no maũcaririe na njĩra ya gwĩka maũndũ. O nao nĩ mahĩngirwo nĩ “ihiga rĩrĩa rĩhĩnganaga”.
O ta ũrĩa kwandĩkĩtwo: “ Oneei! kũu Zayuni nĩ njigĩte ihiga rĩrĩa rĩtũmaga andũ mahĩngwo, na ngaiga rwaro rwa ihiga rũrĩa rũtũmaga magũe, nake mũndũ ũrĩa ũmwĩhokete ndarĩ hĩndĩ agaaconorithio.”