Aroma 8
Nĩ ũndũ wa maũndũ macio-rĩ, andũ arĩa marĩ thĩinĩ wa Messiya Yahshua o ti a kũherithio,
tondũ nĩ kũgerera harĩ Yahshua Messiya Watho wa Roho ũrĩa ũheanaga muoyo wanjohorire kuuma kũrĩ wĩhia na gĩkuũ.
Nĩgũkorwo ũndũ ũrĩa Watho wa Musa ũtangĩahotire gwĩka nĩ ũndũ wa kwagithio hinya nĩ mwĩrĩ ũyũ wĩhagia-rĩ, Yahweh nĩ ekire ũndũ ũcio na ũndũ wa gũtũma Mũriũ wake mwene arĩ na mwĩrĩ ũhaanaine na mwĩrĩ ũyũ wĩhagia, nĩgetha atuĩke igongona rĩa kũhoroheria mehia. Na nĩ ũndũ ũcio agĩtuĩra wĩhia ũrĩa warĩ thĩinĩ wa mũndũ ũrĩa wĩhagia cira,
nĩgetha maũndũ ma ũthingu marĩa mathanĩtwo nĩ Watho mahingio thĩinĩ witũ, ithuĩ arĩa tũtatũũraga kũringana na mwĩrĩ ũyũ wĩhagia, no tũtũũraga kũringana na Roho.
Andũ arĩa matũũraga kũringana na mwĩrĩ ũyũ wĩhagia meciragia o maũndũ marĩa mwĩrĩ ũcio wendaga; no arĩa matũũraga kũringana na Roho meciragia o maũndũ marĩa mendagwo nĩ Roho.
Meciria ma mũndũ mwĩhia marehaga gĩkuũ, no meciria marĩa maathagwo nĩ Roho marehaga muoyo na thayũ;
meciria marĩa mehagia marĩ ũthũ na Yahweh. Meciria macio matiathĩkagĩra Watho wa Yahweh, o na matingĩhota gwĩka ũguo.
Andũ arĩa maathagwo nĩ mwĩrĩ ũyũ wĩhagia matingĩhota gũkenia Yahweh.
No rĩrĩ, inyuĩ mũtiathagwo nĩ mwĩrĩ ũyũ wĩhagia, no mwathagwo nĩ Roho, angĩkorwo Roho wa Yahweh atũũraga thĩinĩ wanyu. No rĩrĩ, mũndũ o wothe ũtarĩ na Roho wa Messiya-rĩ, ũcio ti wa Messiya.
No angĩkorwo Messiya arĩ thĩinĩ wanyu-rĩ, mĩĩrĩ yanyu nĩ mĩkuũ nĩ ũndũ wa mehia, no maroho manyu marĩ muoyo nĩ ũndũ wa ũthingu.
Na ningĩ angĩkorwo Roho wa Yahweh ũrĩa wariũkirie Yahshua kuuma kũrĩ arĩa akuũ atũũraga thĩinĩ wanyu-rĩ, o we ũcio wariũkirie Messiya kuuma kũrĩ arĩa akuũ nĩ agatũma mĩĩrĩ ĩyo yanyu ĩkuaga ĩgĩe na muoyo nĩ ũndũ wa Roho wake, ũcio ũtũũraga thĩinĩ wanyu.
Nĩ ũndũ ũcio, ariũ na aarĩ a Ithe witũ, ithuĩ tũrĩ na thirĩ, no ti thirĩ kũrĩ mwĩrĩ ũyũ wĩhagia, atĩ nĩguo tũtũũrage kũringana na ũrĩa wendaga.
Nĩgũkorwo mũngĩtũũra kũringana na ũrĩa mwĩrĩ ũyũ wĩhagia wendaga-rĩ, nĩ mũgakua, no mũngĩũraga ciĩko icio njũru cia mwĩrĩ na hinya wa Roho-rĩ, nĩ mũgatũũra muoyo,
tondũ andũ arĩa othe matongoragio nĩ Roho wa Yahweh acio nĩo ciana cia Yahweh
Nĩgũkorwo mũtiaheirwo roho wa kũmũtua ngombo rĩngĩ nĩguo mwĩtigagĩre, no mwaheirwo Roho wa kũmũtua ciana ciake cia kwĩrererwo. Na nĩguo ũtũmaga twanĩrĩre tũkoiga atĩrĩ, “Yahweh, Baba.”
Roho Mwamũre we mwene nĩwe mũira hamwe na maroho maitũ atĩ ithuĩ tũrĩ ciana cia Yahweh.
Rĩu-rĩ, angĩkorwo tũrĩ ciana ciake-rĩ, tũkĩrĩ agai, tũgatuĩka o agai a kũgaya Yahweh, na agai hamwe na Messiya, angĩkorwo ti-itherũ nĩ tũgwatanagĩra nake mĩnyamaro yake nĩguo tũkaahota kũgwatanĩra riri wake o naguo.
Nguona atĩ mĩnyamaro ĩrĩa tũrĩ nayo rĩu ndĩngĩringithanio na riri ũrĩa tũkaaguũrĩrio.
Indo iria ciombirwo itũũraga cietereire kũguũranĩrio gwa ciana cia Yahweh irĩ na gũthethũka kũnene.
Nĩgũkorwo ciũmbe icio ciathĩrĩirio itũũre itarĩ kĩene na ti ũndũ wa gwĩthuurĩra cio nyene, no nĩ ũndũ wa kwenda kwa ũrĩa waciathĩrĩirie itũũre irĩ na kĩĩrĩgĩrĩro,
atĩ ciũmbe cio nyene nĩ igakũũrwo kuuma ũkombo-inĩ wa kũbutha, ikinye wĩyathi-inĩ wa riri wa ciana cia Yahweh.
Nĩ tũũĩ atĩ nginyagia rĩu ciũmbe icio ciothe itũire icayaga irĩ na ruo ta rwa mũndũ-wa-nja akĩheo mwana.
Na to indo icio icayaga, no o na ithuĩ arĩa tũrĩ na maciaro ma mbere ma Roho, nĩ tũcayaga ngoro-inĩ ciitũ thĩinĩ, twetereire hĩndĩ ĩkinye ya gũtuwo ciana cia Yahweh, na nĩkuo gũkũũrwo kwa mĩĩrĩ iitũ kuuma ũkombo-inĩ.
Nĩgũkorwo twahonokirio nĩ ũndũ wa kĩĩrĩgĩrĩro kĩu. No rĩrĩ, kwĩrĩgĩrĩra kĩndũ kĩoneku-rĩ, kĩu ti kĩĩrĩgĩrĩro kũrĩ. Nũ wĩrĩgagĩrĩra kĩrĩa arĩ nakĩo?
No rĩrĩ, tũngĩkorwo twĩrĩgĩrĩire kĩrĩa tũtarĩ nakĩo-rĩ, tũgĩetagĩrĩra o tũkirĩrĩirie.
O ũndũ ũmwe, Roho nake nĩ atũteithagia nĩ ũndũ wa ũrĩa tũtarĩ hinya. Ithuĩ tũtiũĩ kĩrĩa twagĩrĩirwo nĩ kũhoya, no Roho we mwene nĩ atũthaithanagĩrĩra arĩ na mũcayo ũtangĩgweteka na ciugo.
Nake Yahweh ũrĩa ũthuthuragia ngoro ciitũ nĩ oĩ meciria ma Roho, tondũ Roho nĩwe ũthaithanagĩrĩra andũ arĩa aamũre kũringana na ũrĩa Yahweh endete.
Ningĩ nĩ tũũĩ atĩ harĩ andũ arĩa mendete Yahweh, o arĩa metĩtwo nĩwe kũringana na ũrĩa aathugundĩte-rĩ, maũndũ mothe mateithanagia hamwe mamarehere kĩrathimo.
Nĩgũkorwo acio Yahweh aamenyete o tene-rĩ, nĩo aathĩrĩirie matuĩke a kũhaananio na mũhianĩre wa Mũrũwe, nĩguo atuĩke irigithathi harĩ andũ aingĩ a Ithe ũmwe.
Nao acio aathĩrĩirie o mbere, nĩo eetire; nao acio eetire, nĩo aatuire athingu; nao acio aatuire athingu, nĩo aahumbire riri.
Tũkiuge atĩa ũhoro ũkoniĩ maũndũ macio? Angĩkorwo Yahweh arĩ mwena witũ-rĩ, nũ ũngĩkĩhota gũtũtuma ũthũ?
Ũcio ũtaigana gũcaĩra Mũriũ wake mwene, no akĩmũneana nĩ ũndũ witũ ithuothe, na rĩrĩ, agĩtũheete ũcio-rĩ, angĩkĩrega atĩa gũtũtanahĩra na indo iria ingĩ ciothe?
Nũ ũngĩona ũndũ wa gũthitangĩra andũ arĩa Yahweh ethuurĩire? Nĩ Yahweh ũmatuĩte atĩ matirĩ na mahĩtia.
Nũ ũngĩhota kũmatua ehia? Gũtirĩ! Messiya Yahshua, o we ũrĩa wakuire, na akĩriũka akiuma kũrĩ arĩa akuũ, nĩwe ũikarĩte guoko-inĩ kwa ũrĩo kwa Yahweh agĩtũthaithanĩrĩra.
Nũ ũngĩtũtigithania na wendani wa Messiya? Anga nĩ kuona thĩna, kana kwĩhĩrwo nĩ ruo, kana nĩ kũnyarirwo, kana ngʼaragu, kana kwaga nguo, kana ũgwati, o na kana rũhiũ rwa njora?
O ta ũrĩa kwandĩkĩtwo atĩrĩ: “Tũtindaga tũkĩũragwo o mũthenya wothe nĩ ũndũ waku; tũtuwagwo ta ngʼondu cia gũthĩnjwo.”
No rĩrĩ, o na tũkĩonaga maũndũ macio mothe-rĩ, ithuĩ tũrĩ makĩria ma atoria nĩ ũndũ wa ũcio watwendire.
Nĩgũkorwo nĩ ndĩkĩtie kũmenya kũna atĩ o na kũngĩtuĩka nĩ ũhoro wa gũkua kana gũtũũra muoyo, o na kana araika kana ndaimono, o na kana ũhoro wa mahinda maya kana marĩa magoka, o na kana mahinya o na marĩkũ,
o na kana ũraihu wa na igũrũ kana ũriku, o na kana kĩndũ kĩngĩ o gĩothe kĩa iria ciombirwo: gũtirĩ o na kĩmwe kĩngĩhota gũtũtigithania na wendani wa Yahweh, ũcio ũrĩ thĩinĩ wa Messiya Yahshua, Mũhonokia witũ.