Aroma 7
Atĩrĩrĩ, ariũ na aarĩ a Ithe witũ (nĩgũkorwo ndĩraaria na inyuĩ mũrĩ andũ arĩa moĩ Watho), kaĩ mũtooĩ atĩ Watho wathaga mũndũ o rĩrĩa arĩ muoyo?
Nĩ ũndũ mũndu-wa-nja ũrĩ na mũthuri aikaraga ohanĩtio na mũthuriwe nĩ Watho ihinda rĩrĩa rĩothe mũthuriwe arĩ muoyo; no mũthuriwe angĩkua-rĩ, mũndu-wa-nja ũcio ti muohe nĩ Watho ũcio wa ũhiki.
Tondũ mũndu-wa-nja ũcio angĩhikĩra mũndũ ũngĩ rĩrĩa mũthuriwe arĩ muoyo, atuĩkaga mũtharia. No mũthuriwe angĩkua, mũndu-wa-nja ũcio ti muohe nĩ Watho ũcio, na ndangĩtuĩka gĩtharia o na angĩhikio nĩ mũndũ ũngĩ.
Nĩ ũndũ ũcio, ariũ na aarĩ a Ithe witũ, o na inyuĩ nĩ mwakuire ũhoro-inĩ wa Watho nĩ ũndũ wa mwĩrĩ wa Messiya, nĩguo mũtuĩke a mũndũ ũngĩ, o we ũrĩa wariũkirio akiuma kũrĩ arĩa akuũ, nĩge tha tũciaragĩre Yahweh maciaro.
Nĩgũkorwo hĩndĩ ĩrĩa twathagwo nĩ mwĩrĩ ũyũ wa mehia-rĩ, merirĩria ma mehia marĩa maarahũragwo nĩ Watho nĩ maarutaga wĩra thĩinĩ wa mĩĩrĩ iitũ, magaciaragĩra gĩkuũ maciaro.
No rĩu, nĩ tuohoretwo tũkoima Watho-inĩ, tondũ nĩ tũkuĩte ũhoro-inĩ ũrĩa watuohete nĩgetha tũtungatage na mũtungatĩre mwerũ wa Roho, no ti mũtungatĩre ũrĩa mũkũrũ wa Watho ũrĩa mwandĩke.
Rĩu rĩ, tũkiuge atĩa? Watho ũkĩrĩ wĩhia? Aca ti ũguo! Ti-itherũ tiga nĩ ũndũ wa Watho ndingĩamenyire wĩhia nĩ kĩ. Nĩgũkorwo ndingĩamenyire ũhoro wa gũcumĩkĩra korwo Watho ndwoigĩte, “Ndũkanacumĩkĩre kĩndũ kĩene.”
No wĩhia, tondũ wa kuona kamweke karĩa kaaheanĩtwo nĩ Rĩathani rĩu, ũgĩtũma ngĩe na merirĩria ma mĩthemba yothe thĩinĩ wakwa. Nĩgũkorwo hatarĩ Watho, wĩhia nĩ mũkuũ
Kũrĩ hĩndĩ niĩ ndaarĩ muoyo itanamenya Watho; no hĩndĩ ĩrĩa Rĩathani rĩokire, wĩhia ũkĩgĩa muoyo na niĩ ngĩkua.
Ngĩmenya atĩ Rĩathani o rĩu rĩarĩ rĩa gũtũma mũndũ atũũre muoyo-rĩ, norĩo rĩarehire gĩkuũ.
Nĩgũkorwo rĩrĩa wĩhia wonire kamweke karĩa kaaheanĩtwo nĩ Rĩathani rĩu-rĩ, nĩ kũũhenia wahenirie, na ũkĩnjũraga narĩo.
Nĩ ũndũ ũcio-rĩ, Watho nĩ Mwamũre, o na Rĩathani no rĩamũre, na nĩ rĩa kĩhooto na nĩ rĩega.
Kaĩ ũndũ ũcio mwega ũgĩcokete gũtuĩka gĩkuũ harĩ niĩ? Gũtikanatuĩke ũguo! No nĩgetha wĩhia ũkũũrĩkane atĩ nĩ wĩhia, nĩ warehire gĩkuũ thĩinĩ wakwa na ũndũ wa kũhũthĩra ũndũ ũcio mwega, nĩguo wĩhia ũtuĩke wĩhia kũna.
Nĩ tũũĩ atĩ Watho uumanĩte na Roho; no niĩ ndĩ mũndũ ũrĩ na mwĩrĩ wendetio agatuĩka ngombo ya wĩhia.
Ndimenyaga maũndũ marĩa njĩkaga. Nĩgũkorwo ũrĩa nyendaga gwĩka tiguo njĩkaga, no ũndũ ũrĩa thũire nĩguo njĩkaga.
O na ingĩtuĩka njĩkaga ũrĩa itekwenda gwĩka-rĩ, nĩ njĩtĩkĩrĩte atĩ Watho nĩ mwega.
Tondũ ũcio nĩ ngũũranĩte atĩ ti niĩ mwene njĩkaga maũndũ macio, no nĩ wĩhia ũrĩa ũtũũraga thĩinĩ wakwa wĩkaga ũguo.
Nĩ njũĩ atĩ gũtirĩ ũndũ mwega ũtũũraga thĩinĩ wakwa, ũguo nĩ kuuga thĩinĩ wa mwĩrĩ ũyũ wakwa wĩhagia. Nĩgũkorwo nĩ ndĩriragĩria gwĩka wega, no hinya wa gwĩka ũguo nĩguo itarĩ.
Nĩgũkorwo wega ũrĩa nyendaga gwĩka tiguo njĩkaga, no ũũru ũrĩa itendaga gwĩka nĩguo thiiaga na mbere gwĩka.
Na rĩrĩ, ingĩkorwo nĩ njĩkaga ũrĩa itekwenda gwĩka-rĩ, ti niĩ mwene njĩkaga maũndũ macio, no nĩ wĩhia ũrĩa ũtũũraga thĩinĩ wakwa wĩkaga ũguo.
Ũndũ ũyũ nĩ ũtũmaga nyone atĩ Watho ũyũ nĩguo ũrutaga wĩra thĩinĩ wakwa: Rĩrĩa ngwenda gwĩka wega-rĩ, ũũru ũkoragwo o hamwe na niĩ.
Nĩgũkorwo ngoro-inĩ yakwa thĩinĩ, nĩ ngenagĩra Watho wa Yahweh;
no nĩ nyonaga Watho ũngĩ ũkĩruta wĩra thĩinĩ wa ciĩga cia mwĩrĩ wakwa, ũkarehaga mbaara, na ũkarũaga na Watho wa meciria makwa, na ũkandua mũndũ muohe nĩ Watho wa wĩhia ũrĩa ũrutaga wĩra thĩinĩ wa ciĩga ciakwa.
Kaĩ niĩ ndĩkĩrĩ mũndũ mũthĩnĩku-ĩ! Nũ ũkũũhonokia harĩ mwĩrĩ ũyũ wa gĩkuũ
Nĩ ndacokeria Yahweh ngatho nĩ ũndũ wa Yahshua Messiya Mũhonokia witũ! Nĩ ũndũ ũcio-rĩ, niĩ mwene thĩinĩ wa meciria makwa ndĩ ngombo ya watho wa Yahweh, no ha ũhoro wa mwĩrĩ ũyũ wa wĩhia, niĩ ndĩ ngombo ya Watho wa wĩhia.