Aroma 6
Hakĩrĩ ũguo-rĩ, tũkiuge atĩa? Nĩ tũtũũre o twĩhagia nĩgetha wega wa Yahweh ũingĩhage?
Hĩ! Kũroaga gũtuĩka ũguo! Ithuĩ-rĩ, nĩ twakuire ũhoro-inĩ wa wĩhia; twakĩhota atĩa gũcoka gũtũũra thĩinĩ waguo?
Kaĩ inyuĩ mũtoĩ atĩ ithuĩ othe arĩa twabatithirio thĩinĩ wa Messiya Yahshua twabatithirio thĩinĩ wa gĩkuũ gĩake?
Nĩ ũndũ ũcio-rĩ, twabatithio nĩ gũthikwo twathikirwo hamwe nake gĩkuũ-inĩ gĩake, nĩgetha o ta ũrĩa Messiya aariũkirio kuuma kũrĩ arĩa akuũ nĩ hinya wa riri wa Ithe, o na ithuĩ tũtũũre na mũtũũrĩre mwerũ.
Angĩkorwo nĩ tũnyitithanĩtio nake ũguo thĩinĩ wa gĩkuũ gĩake-rĩ, hatirĩ nganja nĩ tũkanyitithanio nake thĩinĩ wa kũriũka gwake.
Nĩgũkorwo nĩ tũũĩ atĩ ũmũndũ witũ wa tene nĩ wacuuranĩirio nake nĩgetha mwĩrĩ ũyũ wa mehia weherio, nĩguo tũtikanacoke gũtuĩka ngombo cia mehia,
tondũ mũndũ o wothe ũrĩa ũrĩkĩtie gũkua nĩ atigithanĩtio na mehia.
Na rĩrĩ, angĩkorwo nĩ twakuire hamwe na Messiya-rĩ, nĩ twĩtĩkĩtie atĩ nĩ tũgatũũra muoyo hamwe nake.
Nĩgũkorwo nĩ tũũĩ atĩ tondũ Messiya nĩ ariũkirio akiuma kũrĩ arĩa akuũ-rĩ, ndarĩ hĩndĩ agaacoka gũkua; gĩkuũ gĩtirĩ na hinya wa kũmwatha rĩngĩ.
Gĩkuũ kĩrĩa aakuire, aakuĩrĩire ũhoro wa mehia o riita rĩmwe rĩa kũigana; no muoyo ũrĩa atũũraga-rĩ, atũũraga nĩ ũndũ wa riri wa Yahweh.
O na inyuĩ, o ũndũ ũmwe mwĩonagei atĩ nĩ mũkuĩte ũhoro-inĩ wa mehia, na atĩ mũtũũraga muoyo mũrĩ ngwatanĩro na Yahweh thĩinĩ wa Messiya Yahshua
Tondũ ũcio, mũtikanareke mehia mathamakage thĩinĩ wa mĩĩrĩ yanyu ĩyo ĩkuaga, atĩ nĩguo mwathĩkagĩre merirĩria mooru mayo.
Ningĩ mũtikananeane ciĩga cia mĩĩrĩ yanyu mehia-inĩ, atĩ nĩguo ituĩke ta indo cia kũhũthĩrwo cia kwagana nacio, no nĩ kaba mwĩheanage kũrĩ Yahweh, mũhaana ta andũ marutĩtwo gĩkuũ-inĩ makarehwo muoyo-inĩ na mũneanage ciĩga icio cia mĩĩrĩ yanyu kũrĩ we nĩguo ituĩke ta indo cia kũhũthĩrwo na gwĩka maũndũ ma ũthingu.
Mũtigatuĩke a gwathagwo nĩ mehia, tondũ inyuĩ mũtirĩ a gũthamakagĩrwo nĩ Watho, no mũrĩ a gũthamakagĩrwo nĩ wega wa Yahweh.
Tũkiuge atĩa? Kuona atĩ tũtirĩ rungu rwa Watho no tũrĩ rungu rwa wega wa Yahweh-rĩ, nĩ tũtũũre twĩhagia? Kũroaga gũtuĩka ũguo!
Kaĩ inyuĩ mũtoĩ atĩ rĩrĩa mweheana kũrĩ mũndũ nĩguo mũtuĩke ngombo mũmwathĩkagĩre-rĩ, inyuĩ mũkĩrĩ o ngombo cia ũcio mwathĩkagĩra: Mũrĩ ngombo cia mehia marĩa merekagĩria mũndũ gĩkuũ-inĩ, kana mũrĩ ngombo cia wathĩki ũrĩa ũrehaga ũthingu?
No Yahweh arocokerio ngatho, tondũ o na gũtuĩka inyuĩ mwarĩ ngombo cia mehia-rĩ, rĩu nĩ mwathĩkĩire na ngoro yothe ũrutani ũrĩa mwehokeirwo.
Inyuĩ nĩ mũrĩkĩtie kuohorwo mũkoima mehia-inĩ, mũgacoka gũtuĩka ngombo cia ũthingu.
Ndĩraaria ũhoro ũyũ ngĩũgerekanagia na maũndũ ma andũ tondũ inyuĩ nĩ mwagĩte hinya mũtũũrĩre-inĩ wanyu wa ndũire. O ta ũrĩa mwatũire mũneanaga ciĩga cianyu cia mĩĩrĩ ituĩke ngombo kũrĩ maũndũ marĩa matarĩ ma kwĩyamũrĩra Yahweh o na ma waganu ũrĩa ũtũire wongererekaga-rĩ, rĩu kĩneanei ciĩga cianyu ituĩke ngombo cia ũthingu nĩguo mũgaatuĩka andũ aamũre.
Rĩrĩa mwarĩ ngombo cia mehia-rĩ, mũtiathagwo nĩ ũthingu.
Hĩndĩ ĩyo muonaga uumithio ũrĩkũ kuuma kũrĩ maũndũ marĩa matũmaga rĩu mũconoke? Maũndũ macio marigĩrĩrio-inĩ marehaga gĩkuũ!
No rĩu tondũ nĩ mwohoretwo mũkoima mehia-inĩ na mũgatuĩka ngombo cia Yahweh-rĩ, uumithio ũrĩa muonaga ũmwerekagĩria kwĩyamũrĩra Yahweh, na maciaro maguo nĩ muoyo wa tene na tene.
Nĩgũkorwo mũcara wa mehia nĩ gĩkuũ, no kĩheo kĩrĩa Yahweh aheanaga nĩ muoyo wa tene na tene thĩinĩ wa Messiya Yahshua Mũhonokia witũ.