Aroma 5
Nĩ ũndũ ũcio, kuona atĩ nĩ tũtuĩtwo andũ athingu nĩ ũndũ wa gwĩtĩkia-rĩ, tũrĩ na thayũ na Yahweh nĩ ũndũ wa Mũhonokia witũ Yahshua Messiya,
we ũrĩa ũtũmĩte tũgĩe na mweke wa gũkinya wega-inĩ wa Yahweh, harĩa tũrũngiĩ rĩu nĩ ũndũ wa gwĩtĩkia. Na ithuĩ nĩ tũkenaga nĩ ũndũ wa kĩĩrĩgĩrĩro kĩrĩa tũrĩ nakĩo gĩa gũgaakinyĩra riri wa Yahweh.
Na to ũguo wiki, no rĩrĩa tũrĩ mathĩna-inĩ nĩ tũkenaga tondũ nĩ tũũĩ atĩ gũthĩnĩka gũtũmaga tũũmĩrĩrie;
nakuo kũũmĩrĩria gũtũmaga tũgĩe na gwĩkindĩra; nakuo gwĩkindĩra gũtũmaga tũgĩe na kĩĩrĩgĩrĩro.
Nakĩo kĩĩrĩgĩrĩro kĩu gĩtingĩtũũraga ngoro, tondũ Yahweh nĩ aitĩrĩirie wendani wake ngoro-inĩ ciitũ na ũndũ wa Roho Mwamũre, ũrĩa we aatũheire.
Nĩ ũndũ-rĩ, o ihinda rĩrĩa rĩagĩrĩire rĩakinya, o hĩndĩ ĩrĩa tũtaarĩ na hinya, Messiya nĩ akuire nĩ ũndũ wa andũ arĩa matatĩaga Yahweh
Nĩ hinya mũno mũndũ akue nĩ ũndũ wa mũndũ mũthingu, no hihi kwahoteka kuoneka mũndũ ũngĩkua nĩ ũndũ wa mũndũ mwega.
No Yahweh nĩ onanĩtie wendo wake kũrĩ ithuĩ na njĩra ĩno: Atĩ hĩndĩ ĩrĩa twatũire tũrĩ ehia-rĩ, Messiya nĩ atũkuĩrĩire.
Kuona atĩ rĩu nĩ tũtuĩtwo athingu na ũndũ wa thakame yake-rĩ, githĩ tũtigakĩhonokio makĩria kuuma harĩ mangʼũrĩ ma Yahweh nĩ ũndũ wake!
Tondũ-rĩ, angĩkorwo hĩndĩ ĩrĩa twarĩ thũ cia Yahweh nĩ twaiguithanirio nake na ũndũ wa gĩkuũ kĩa Mũriũ, na tondũ rĩu tũrĩ aiguithanie na Yahweh-rĩ, nĩ tũrĩkĩragĩrĩria kũhonokio nĩ ũndũ Messiya arĩ muoyo.
Na to ũguo wiki, no o na nĩ tũkenagĩra Yahweh thĩinĩ wa Mũhonokia witũ Yahshua Messiya, o ũcio ũtũmĩte tũiguithanio na Yahweh.
Nĩ ũndũ ũcio-rĩ, o ta ũrĩa kwĩhia kwa mũndũ ũmwe gwatũmire mehia matonye gũkũ thĩ, nakĩo gĩkuũ gĩgĩtonya nĩ ũndũ wa mehia, nao andũ othe magĩtuĩka a gũkuaga tondũ nĩ mehirie,
nĩgũkorwo o na Watho ũtanaheanwo, mehia maarĩ kuo gũkũ thĩ. No gũtarĩ Watho mũndũ ndangĩtuwo mwĩhia.
O na kũrĩ ũguo-rĩ, kuuma hĩndĩ ya Adamu o nginya hĩndĩ ya Musa, gĩkuũ nĩkĩo gĩatũire gĩthamakagĩra andũ, o na arĩa matehĩtie na ũndũ wa kwagarara Watho ta ũrĩa Adamu eekĩte, arĩ we mũhano wa Ũrĩa warĩ wa gũũka thutha.
No kĩheo kĩu gĩtihaanaine na ihĩtia rĩa kwagarara Watho. Tondũ angĩkorwo andũ aingĩ nĩ makuire nĩ ũndũ wa ihĩtia rĩa mũndũ ũmwe-rĩ, wega wa Yahweh o na kĩheo kĩrĩa kĩarehirwo nĩ wega wa mũndũ ũcio ũmwe, na nĩwe Yahshua Messiya-rĩ, nĩcio ciiyũrĩrĩire andũ aingĩ mũno makĩria
O na ningĩ, kĩheo kĩu kĩa Yahweh gĩtiringaine na maciaro ma mehia ma mũndũ ũcio ũmwe: Tondũ gũtuĩrwo kwa rĩĩhia rĩu rĩmwe nĩkuo gwatũmire andũ matuĩrwo cira, no kĩheo kĩu kĩaheanirwo nĩ Yahweh o ũguo tũhũ kĩarutirwo nĩ ũndũ wa mehia maingĩ, nakĩo gĩgĩtũma matuwo athingu.
Tondũ-rĩ, angĩkorwo kwĩhia kwa mũndũ ũmwe gwatũmire gĩkuũ gĩthamake nĩ ũndũ wa mũndũ ũcio ũmwe-rĩ, githĩ arĩa maamũkagĩra wega mũingĩ wa Yahweh na kĩheo kĩu kĩa ũthingu matigũtũũra mathamakaga makĩria marĩ muoyo-inĩ nĩ ũndũ wa mũndũ ũmwe, o we Yahshua Messiya!
Nĩ ũndũ ũcio, o ta ũrĩa kwĩhia riita o rĩmwe gwatũmire andũ othe matuĩrwo cira-rĩ, ũguo noguo gĩĩko kĩmwe kĩa ũthingu gĩatũmire andũ othe matuwo athingu nĩguo magĩe na muoyo.
Nĩgũkorwo o ta ũrĩa ũremi wa mũndũ ũmwe watũmire andũ aingĩ matuwo ehia-rĩ, ũguo noguo gwathĩka kwa mũndũ ũcio ũmwe gũgũtũma andũ aingĩ matuwo athingu.
Ũhoro wa Watho wongereirwo nĩguo mehia mongerereke. No harĩa mehia mongererekire-rĩ, naguo wega wa Yahweh ũkĩongerereka makĩria,
nĩgetha o ta ũrĩa mehia maathamakire thĩinĩ wa gĩkuũ-rĩ, o naguo wega wa Yahweh ũthamakage nĩ ũndũ wa ũthingu, nĩguo ũtũkinyie muoyo-inĩ wa tene na tene nĩ ũndũ wa Yahshua Messiya Mũhonokia witũ.