Aroma 4

Iburahĩmu, o ũcio ithe witũ ũhoro-inĩ wa gũciarwo na mwĩrĩ-rĩ, aamenyire atĩa ũhoro ũcio?

Angĩkorwo, ti-itherũ, Iburahĩmu aatuirwo mũthingu na ũndũ wa ciĩko iria ekaga-rĩ, nĩ arĩ na ũndũ wa kwĩrahĩra, no ti mbere ya Yahweh.

Nĩgũkorwo Maandĩko marĩa Maamũre moigĩte atĩa? “Iburahĩmu nĩ etĩkirie Yahweh, naguo ũndũ ũcio ũgĩtũma atuwo mũthingu.”

Oneei, hĩndĩ ĩrĩa mũndũ aruta wĩra-rĩ, mũcara wake ũrĩa aheagwo ndũkoragwo ũrĩ ta kĩheo, no nĩ ta thirĩ ararĩhwo.

No rĩrĩ, mũndũ ũrĩa ũtehokaga maũndũ marĩa ekaga, tiga o gwĩtĩkia Yahweh ũrĩa ũtuaga andũ arĩa aaganu athingu-rĩ, wĩtĩkio wa mũndũ ũcio nĩguo atuagĩrwo ta arĩ ũthingu

Ũguo noguo Daudi oigaga rĩrĩa aaragia ũhoro wa kĩrathimo kĩa mũndũ ũrĩa Yahweh atuĩte mũthingu hatarĩ ũhoro wa ciĩko, akoiga atĩrĩ:

“Kũrathimwo-rĩ, nĩ arĩa marekeirwo mahĩtia mao, namo mehia mao makahumbĩrwo.

Kũrathimwo-rĩ, nĩ mũndũ ũrĩa Yahweh atatuaga mwĩhia.”

Hihi kĩrathimo gĩkĩ no kĩa andũ arĩa maruaga oiki, kana nĩ kĩa o na arĩa mataruaga? Nĩ tũkoretwo tũkiuga atĩ wĩtĩkio wa Iburahĩmu nĩguo watũmire atuwo mũthingu

No aatuirwo mũthingu arĩ na ũhoro ũrĩkũ? Hihi nĩ thutha wa kũrua, kana nĩ mbere ĩyo? Ti thutha wa kũrua, no nĩ mbere ĩyo, hĩndĩ ĩrĩa ataaruĩte!

Nake agĩcoka akĩamũkĩra rũũri rwa kũrua, rũrĩ mũhũri wa ũthingu ũrĩa aarĩ naguo nĩ ũndũ wa gwĩtĩkia o na hĩndĩ ĩrĩa ataarĩ mũruu. Nĩ ũndũ ũcio agĩtuĩka ithe wa arĩa othe metĩkagia o na matarĩ aruu, nĩgetha o nao matuagwo athingu

Na ningĩ nowe ithe wa andũ arĩa maruaga, arĩa matarĩ atĩ no kũrua maruĩte, no nĩ mathiiaga na mũthiĩre wa wĩtĩkio ũrĩa ithe witũ Iburahĩmu aarĩ naguo mbere ya kũrua.

Iburahĩmu ndeerĩirwo kĩĩranĩro atĩ nĩ agatuĩka mũgai wa thĩ hamwe na njiaro ciake nĩ ũndũ wa gwathĩkĩra Watho, no nĩ ũndũ wa ũthingu ũrĩa uumanaga na wĩtĩkio.

Nĩgũkorwo kũngĩtuĩka atĩ arĩa matũũragio nĩ Watho nĩ agai-rĩ, wĩtĩkio ndũkĩrĩ kĩene, nakĩo kĩĩranĩro nĩ gĩa tũhũ,

tondũ Watho ũrehaga mangʼũrĩ. Naho harĩa hatarĩ Watho hatirĩ ũhoro wa kwagarara Watho.

Tondũ wa ũguo-rĩ, kĩĩranĩro kiumanaga na wĩtĩkio, nĩgetha wonekage na ũndũ wa wega wa Yahweh, na ũtuĩke wa kũheo kũna njiaro ciothe cia Iburahĩmu, na to arĩa maaheirwo ũhoro wa watho oiki, no nĩ kũrĩ arĩa othe metĩkĩtie ta ũrĩa Iburahĩmu eetĩkĩtie. Nĩgũkorwo Iburahĩmu nĩwe ithe wa arĩa othe metĩkĩtie

Ta ũrĩa kwandĩkĩtwo atĩrĩ: “Nĩ ngũtuĩte ithe wa ndũrĩrĩ nyingĩ.” We nĩwe ithe witũ maitho-inĩ ma Yahweh, o ũcio Iburahĩmu eetĩkĩtie, o we Kĩhoti ũrĩa ũriũkagia arĩa makuĩte, na waragia ũhoro wa maũndũ marĩa matarĩ ho ta marĩ ho.

Iburahĩmu nĩ agĩire na kĩĩrĩgĩrĩro o na harĩa hataarĩ kĩndũ gĩa kwĩrĩgĩrĩra na agĩĩtĩkia, na nĩ ũndũ ũcio agĩtuĩka ithe wa ndũrĩrĩ nyingĩ, o ta ũrĩa erĩtwo atĩrĩ, “Ũguo nĩguo rũciaro rwaku rũkaigana.”

Nake o na akĩmenyaga atĩ mwĩrĩ wake watariĩ ta ũrĩ mũkuũ nĩgũkorwo ũkũrũ wake warĩ ta mĩaka igana rĩmwe, na aamenya atĩ nda ya Sara nĩ yathirĩte hinya wa gũciara-rĩ, ndaigana kũnyihanyihĩrwo nĩ wĩtĩkio.

Nowe ndaigana kũgĩa na nganja ũhoro-inĩ wa wĩtĩkio ũkoniĩ kĩĩranĩro kĩu kĩa Yahweh, no wĩtĩkio wake nĩ hinya wongereirwo, nake akĩgooca Yahweh,

tondũ nĩ etĩkĩtie biũ atĩ Yahweh arĩ na hinya wa kũhingia ũrĩa eranĩire.

Ũndũ ũcio ũgĩtũma atuwo mũthingu.

Na rĩrĩ, ciugo icio ciandĩkĩtwo atĩrĩ “Nĩ atuirwo mũthingu” itiandĩkirwo nĩ ũndũ wake wiki,

no ciandĩkirwo nĩ ũndũ witũ, ithuĩ arĩa Yahweh agaatua athingu, o ithuĩ arĩa twĩtĩkĩtie Kĩhoti ũrĩa wariũkirie Yahshua Mũhonokia witũ kuuma kũrĩ arĩa akuũ

We aaneanirwo oragwo nĩ ũndũ wa mehia maitũ, na agĩcoka akĩriũkio nĩgetha tũtuwo athingu.