Aroma 3
Gwatuĩka ũguo-rĩ, Mũyahudi agĩkĩrĩte andũ arĩa angĩ na kĩ? Kana bata wa kũrua ũkĩrĩ ũrĩkũ?
Hĩ! Ũguni no mũnene na njĩra ciothe! Mbere ya maũndũ mothe, Ayahudi nĩo mehokeirwo ũramati wa maũge ma Yahweh.
Ĩ kũngĩkorwo amwe ao nĩ magire kwĩhokeka, kwaga kwĩhokeka kwao, nĩ kũngĩatũmire Yahweh aage gũtuĩka mwĩhokeku?
Kũroaga gũtuĩka ũguo! Yahweh arotuĩka wa ma, na mũndũ o wothe atuĩke wa maheni, o ta ũrĩa kwandĩkĩtwo atĩrĩ: “Nĩguo kuonekage atĩ rĩrĩa ũkwaria, wee waragia maũndũ ma kĩhooto, na ũhootanage rĩrĩa ũgũcirithania.”
No rĩrĩ, angĩkorwo wagi witũ wa ũthingu nĩ ũtũmaga ũthingu wa Yahweh ũguũrio mũno makĩria-rĩ, tũkiuge atĩa? No tuuge atĩ Yahweh ti mũthingu rĩrĩa egũtũkinyĩria mangʼũrĩ make? (Ndĩraaria o ta ũrĩa mũndũ wa gũkũ thĩ angĩaria.)
Aca, kũroaga gũtuĩka ũguo! Angĩkorwo ũguo nĩguo kũrĩ-rĩ, Yahweh angĩgĩtuĩra thĩ cira atĩa? No mũndũ ahota kuuga atĩrĩ,
“Angĩkorwo kũhenania gwakwa no kũingĩhie ũhoro-wa-ma wa Yahweh, na nĩ ũndũ ũcio gũtũme riri wake wongerereke-rĩ, niĩ ngĩtuagĩrwo cira ta ndĩ mwĩhia nĩkĩ?”
Nĩ kĩ kĩgiragia tuuge, ta ũrĩa tũcambagio atĩ nĩguo tuugaga, o na ta ũrĩa andũ amwe moigaga atĩ nĩguo tuugaga, “Nĩ tũtũũre twĩkaga ũũru nĩguo wega woneke”? Acio-rĩ, gũtuĩrwo cira kwao nĩ gwa kĩhooto.
Tũkiuge atĩa? Ithuĩ Ayahudi tũkĩrĩ ega gũkĩra andũ arĩa angĩ? Aca, tiguo! Nĩ tũrĩkĩtie kuonania hau mbere atĩ Ayahudi o hamwe na andũ-a-Ndũrĩrĩ othe nĩ magũĩte hinya-inĩ wa mehia
O ta ũrĩa kwandĩkĩtwo atĩrĩ: “Gũtirĩ mũndũ mũthingu, gũtirĩ o na ũmwe;
gũtirĩ mũndũ ũmenyaga ũndũ, gũtirĩ mũndũ ũrongoragia Yahweh.
Othe nĩ magarũrũkĩte, makora, othe hamwe magatuĩka kĩndũ gĩtarĩ bata; gũtirĩ mũndũ wĩkaga wega, gũtirĩ o na ũmwe.”
“Mĩmero yao ĩhaana ta mbĩrĩra iceng'ũ; nĩmĩ ciao ciaragia o maheni.” “Mĩromo yao yaragia maũndũ marũrũ ta thumu wa nduĩra.”
“Tũnua twao tũiyũrĩte irumi na ũrũrũ.”
“Mahanyũkaga na magũrũ magaite thakame;
mwanangĩko na kĩeha nĩcio cionanagia kũrĩa magereire,
nayo njĩra ya thayũ matimĩũĩ.”
“Hatirĩ wĩtigĩri Yahweh maitho-inĩ mao.”
Rĩu-rĩ, nĩ tũũĩ atĩ maũndũ marĩa mothe Watho uugĩte, merĩtwo andũ arĩa marĩ rungu rwa Watho, nĩgetha kanua o gothe gakirio, nao andũ a thĩ othe matuĩke a gũcirithio nĩ Yahweh.
Tondũ wa ũguo-rĩ, gũtirĩ mũndũ o na ũ ũngĩtuwo mũthingu maitho-inĩ ma Yahweh nĩ ũndũ wa kũrũmia Watho; no rĩrĩ, Watho nĩguo ũtũmaga andũ mamenye atĩ nĩ mehĩtie.
No rĩrĩ, rĩu ũthingu uumĩte kũrĩ Yahweh nĩ ũmenyithanĩtio na njĩra ĩngĩ ĩtahutanĩtie na Watho wa Musa, o na gũtuĩka nĩ yoimbũrĩtwo o tene nĩ Watho na Anabii
Naguo ũthingu ũyũ nĩ ũrĩa uumaga kũrĩ Yahweh, na ũheagwo arĩa othe metĩkĩtie na ũndũ wa gwĩtĩkia Yahshua Messiya. Gũtirĩ ũhoro wa gũthuurania andũ,
nĩgũkorwo andũ othe nĩ mehĩtie na makanyihĩrwo nĩ riri wa Yahweh,
na nĩ ũndũ wa wega wa Yahweh magatuwo athingu o ũguo tũhũ, nĩ ũndũ wa ũrĩa maakũũrirwo nĩ Messiya Yahshua.
Yahweh aamũrutire arĩ igongona rĩa kũhoroheria mehia na ũndũ wa wĩtĩkio thĩinĩ wa thakame yake. Yahweh eekire ũguo nĩgetha onanie ũthingu wake, tondũ wa ũrĩa mehia ma mbere ĩyo maarekeirwo andũ matekũherithio, nĩ ũndũ wa gũkirĩrĩria kwa Yahweh,
nake eekire ũguo nĩgetha onanie ũthingu wake mahinda-inĩ maya, na kũmenyeke atĩ we nĩ mũthingu, na nĩwe ũtuaga andũ arĩa metĩkĩtie Yahshua athingu.
Gwagĩtuĩka ũguo-rĩ, kwĩraha gũkĩrĩ ha? Nĩ kweherie biũ. Kweheretio nĩ ũndũ wa gĩtũmi kĩrĩkũ? Hihi nĩ ũndũ wa kũrũmia Watho? Aca, no nĩ ũndũ wa Watho ũrĩa wa wĩtĩkio.
Nĩgũkorwo nĩ tũrũmĩtie atĩ mũndũ atuagwo mũthingu na ũndũ wa gwĩtĩkia no ti ũndũ wa gwathĩkĩra Watho.
Yahweh-rĩ, akĩrĩ o Kĩhoti wa Ayahudi oiki? Githĩ Kĩhoti ti wa andũ-a-Ndũrĩrĩ o nao? Ĩĩ, nĩ Kĩhoti wa andũ-a-Ndũrĩrĩ o nao,
nĩgũkorwo Yahweh no ũmwe, na nĩwe ũrĩtuaga andũ arĩa maruaga athingu, na ũndũ wa gwĩtĩkia, na arĩa mataruaga nao amatuage athingu na ũndũ wa gwĩtĩkia o ro ũguo
Rĩu-rĩ, no twagithie ũhoro wa Watho kĩene nĩ ũndũ wa ũhoro wa wĩtĩkio ũcio? Aca, kũroaga gũtuĩka ũguo! Handũ ha ũguo-rĩ, nĩ Watho tũgũkĩongerera hinya.