Aroma 14

Na rĩrĩ, mũndũ ũrĩa ũkoragwo arĩ na wĩtĩkio mũhũthũ mwamũkĩrei, mũtekũmũtuĩra cira nĩ ũndũ wa maũndũ marĩa mataiguanĩirwo.

Wĩtĩkio wa mũndũ ũmwe-rĩ, nĩ ũmwĩtĩkĩrĩtie kũrĩa irio cia mĩthemba yothe, no mũndũ ũngĩ, ũrĩa ũrĩ wĩtĩkio mũhũthũ, arĩaga o mĩthemba ya nyeni.

Mũndũ ũrĩa ũrĩaga mĩthemba yothe ya irio ndakae kũmena mũndũ ũrĩa ũtekaga ũguo, nake mũndũ ũrĩa ũtarĩaga indo imwe-rĩ, ndakae gũtuĩra cira mũndũ ũrĩa ũrĩaga ciothe tondũ Yahweh nĩ amwĩtĩkĩrĩtie.

Wee ũkĩrĩ ũ nĩguo ũtuĩre ndungata ya mũndũ ũngĩ cira? Mwathi wayo nĩwe ũmenyaga ĩrũngiĩ wega kana ĩgũĩte. Nayo nĩ ĩrĩrũgamaga, tondũ Yahweh nĩwe ũrĩ na ũhoti wa gũtũma ĩrũgame.

Mũndũ ũmwe-rĩ, onaga ta kũrĩ mũthenya ũmwe ũtĩĩkĩte kũrĩ ĩrĩa ĩngĩ; nake mũndũ ũngĩ akona mĩthenya yothe nĩ ya gũtĩo o ũndũ ũmwe. O mũndũ nĩ emenyere wega na ngoro yake.

Mũndũ ũrĩa wonaga mũthenya ũmwe ũrĩ wa mwanya-rĩ, ekaga ũguo nĩ ũndũ wa Yahweh. Nake ũrĩa ũrĩaga nyama-rĩ, arĩaga nĩ ũndũ wa Yahweh, nĩgũkorwo nĩ Yahweh acokagĩria ngatho; nake ũrĩa ũtacirĩaga-rĩ, ekaga ũguo nĩ ũndũ wa Yahweh, na nĩ Yahweh acokagĩria ngatho.

Gũtirĩ o na ũmwe witũ ũtũũraga nĩ ũndũ wake mwene, na gũtirĩ o na ũmwe witũ ũkuaga nĩ ũndũ wake mwene.

Nĩ ũndũ tũngĩtũũra muoyo-rĩ, tũtũũraga nĩ ũndũ wa Yahweh; na tũngĩkua-rĩ, twakua nĩ ũndũ wa Yahweh. Nĩ ũndũ ũcio tũngĩkorwo tũrĩ muoyo kana tũkuĩte-rĩ, tũrĩ o a Yahweh.

Ũhoro ũyũ nĩguo watũmire Messiya akue na acoke ariũke, nĩguo atuĩke Mũthamaki wa arĩa akuũ na arĩa marĩ muoyo.

Wee-rĩ, ũgũtuĩra mũrũ kana mwarĩ wa Ithe wanyu cira nĩkĩ? Kana ũkũmena mũrũ kana mwarĩ wa ithe wanyu nĩkĩ? Nĩgũkorwo ithuothe nĩ tũkarũgama mbere ya gĩtĩ gĩa cira kĩa Yahweh.

O ta ũrĩa kwandĩkĩtwo atĩrĩ: “ ‘Ti-itherũ, o ta ũrĩa niĩ ndũũraga muoyo, iru o rĩothe nĩ rĩgaturio mbere yakwa; naruo rũrĩmĩ o ruothe nĩ rũkoimbũrĩra Yahweh,’ ũguo nĩguo Yahweh ekuuga.”

Hakĩrĩ ũguo-rĩ, o ũmwe witũ nĩ akaheana ũhoro wake mwene mbere ya Yahweh.

Nĩ ũndũ ũcio nĩ tũgĩtige gũtuanĩra cira ithuĩ ene. Handũ ha ũguo-rĩ, kaba mũtue na meciria manyu atĩ mũtigatũma mũrũ kana mwarĩ wa ithe wanyu ahĩngwo kana agũe njĩra-inĩ.

Niĩ nĩ menyete wega biũ ndĩ thĩinĩ wa Mwathi Yahshua, atĩ gũtirĩ irio irĩ thahu cio nyene. No rĩrĩ, mũndũ ũrĩa wonaga kĩndũ ta kĩrĩ thahu-rĩ, ũcio harĩ we kĩndũ kĩu nĩ kĩrĩ thahu.

Angĩkorwo mũrũ kana mwarĩ wa thoguo nĩ ekũigua ũũru tondũ wa kĩrĩa ũrĩaga-rĩ, wee nĩ ũtigĩte gũthiĩ na mĩthiĩre ya wendani. Tiga gũtũma mũrũ kana mwarĩ wa Ithe wanyu ũcio Messiya aakuĩrĩire ore nĩ ũndũ wa kĩrĩa ũrarĩa.

Mũtikanareke ũndũ ũrĩa muonaga ũrĩ mwega ũtuĩke wa gũcambio.

Nĩgũkorwo ũthamaki wa Yahweh ti ũhoro wa kũrĩa na kũnyua, no nĩ wa ũthingu, na thayũ o na gĩkeno iria ciumaga kũrĩ Roho Mwamũre,

tondũ mũndũ o wothe ũrĩa ũtungatagĩra Messiya na njĩra icio nĩ akenagia Yahweh, o na akonagwo arĩ mwega nĩ andũ.

Nĩ ũndũ ũcio-rĩ, nĩ twĩkĩragei kĩyo gĩa gwĩkaga maũndũ marĩa marehaga ũhoro wa thayũ na magatũma tuonganĩrĩre hinya.

Mũtikanathũkie wĩra wa Yahweh nĩ ũndũ wa irio. Irio ciothe nĩ nyamũre, no rĩrĩ, nĩ ũũru mũndũ kũrĩa kĩndũ o gĩothe kĩrĩa kĩngĩhĩtithia mũndũ ũrĩa ũngĩ.

Nĩ kaba kwaga kũrĩa nyama, kana kũnyua ndibei o na kana gwĩka ũndũ ũngĩ o na ũrĩkũ ũrĩa ũngĩtũma mũrũ kana mwarĩ wa Ithe wanyu ahĩtithio.

Nĩ ũndũ ũcio-rĩ, ũndũ ũrĩa wĩtĩkĩtie ũkoniĩ maũndũ macio-rĩ, nĩ ũmenyeke gatagatĩ gaku na Yahweh. Kũrathimwo-rĩ, nĩ mũndũ ũrĩa ũtarĩ ũndũ angĩĩcukĩra nĩ ũndũ wa kĩndũ kĩrĩa onaga kĩrĩ kĩega agĩĩka.

No rĩrĩ, mũndũ angĩkorwo arĩ na nganja, acoke arĩe irio iria arĩ na nganja nacio, mũndũ ũcio nĩ etuĩrĩire cira, tondũ kũrĩa gwake gũtiumanĩte na wĩtĩkio; naguo ũndũ o wothe ũtoimanĩte na wĩtĩkio nĩ mehia.