Aroma 15

Na rĩrĩ, ithuĩ arĩa tũrĩ na hinya-rĩ, twagĩrĩirwo nĩ gũkuuanagĩra na arĩa matarĩ na hinya maũndũ mao ma ũhinyaru na to gwĩkenagia ithuĩ ene.

O ũmwe witũ nĩ agĩrĩirwo nĩ gũkenia mũndũ ũrĩa ũngĩ nĩ ũndũ wa maũndũ make mega, nĩgetha ongererwo hinya.

Nĩgũkorwo o na Messiya ndekenirie we mwene, no o ta ũrĩa kwandĩkĩtwo atĩrĩ: “Irumi cia arĩa makũrumaga nĩ niĩ ciagũĩrĩire.”

Nĩgũkorwo maũndũ mothe marĩa maandĩkirwo tene maandĩkirwo marĩ ma gũtũruta, nĩgetha tũgĩage na kĩĩrĩgĩrĩro nĩ ũndũ wa gũkirĩrĩria na kũũmĩrĩrio nĩ Maandĩko macio.

Yahweh ũrĩa ũheanaga ũkirĩrĩria na ũũmanĩrĩria aromũhe roho wa ũiguano o mũndũ na ũrĩa ũngĩ rĩrĩa mũkũrũmĩrĩra Messiya Yahshua,

nĩgetha mũgoocithagie Yahweh o we Ithe wa Mwathi witũ Yahshua Messiya mũrĩ na ngoro ĩmwe na mũgambo ũmwe.

Nĩ ũndũ ũcio, o mũndũ nĩ agĩĩtĩkagĩre ũrĩa ũngĩ, o ta ũrĩa mwetĩkĩrirwo nĩ Messiya, nĩgetha Yahweh agoocagwo.

Nĩgũkorwo ngũmwĩra atĩrĩ, Messiya okire arĩ ndungata ya arĩa maruaga nĩ ũndũ wa ũhoro wa ma wa Yahweh, nĩguo ahingie ciĩranĩro iria cierĩirwo maithe maitũ ma tene,

nĩgetha andũ-a-Ndũrĩrĩ magoocithagie Yahweh nĩ ũndũ wa tha ciake, ta ũrĩa kwandĩkĩtwo atĩrĩ: “Nĩ ũndũ ũcio nĩ ngũkũgooca ndĩ gatagatĩ ka ndũrĩrĩ; nĩ ndĩrĩinaga nyĩmbo cia kũgooca rĩĩtwa rĩaku.”

Ningĩ nĩ kwĩrĩtwo atĩrĩ: “Kenai, inyuĩ andũ-a-Ndũrĩrĩ, mũrĩ hamwe na andũ ake.”

Na ningĩ nĩ kwĩrĩtwo atĩrĩ, “Goocai Yahweh, inyuĩ andũ-a-Ndũrĩrĩ othe, na mũmũinĩre nyĩmbo cia kũmũgooca, inyuĩ andũ othe.”

O na ningĩ, Isaiya nĩ oigĩte atĩrĩ, “Mũndũ ũrĩa wĩtagwo Mũri wa Jesii nĩ agoka, o we ũrĩa ũkaarahũka atuĩke wa gwatha ndũrĩrĩ, nao andũ-acio-a-Ndũrĩrĩ nĩ makaagĩa na kĩĩrĩgĩrĩro thĩinĩ wake.”

Na rĩrĩ, Yahweh ũrĩa arĩ we mwĩhoko witũ aromũiyũria na gĩkeno gĩothe na thayũ tondũ wa ũrĩa mũmwĩhokete, nĩgetha mũkĩrĩrĩrie kũgĩa na kĩĩrĩgĩrĩro nĩ ũndũ wa hinya wa Roho Mwamũre.

Ariũ na aarĩ a Ithe witũ, niĩ mwene nĩ njĩtĩkĩrĩte atĩ inyuĩ ene nĩ mũiyũrĩtwo nĩ wega, na nĩ mũrĩ na ũmenyo mũiganu, o na mũkahota gũtaarana inyuĩ ene.

Ndĩmwandĩkĩire ũndũ ũyũ ndĩ na ũũmĩrĩru mũingĩ ngĩmwĩra maũndũ mamwe, ta arĩ kũmũririkania maũndũ macio rĩngĩ, nĩ ũndũ wa wega ũrĩa Yahweh aaheire,

nĩguo nduĩke mũtungatĩri wa Messiya Yahshua kũrĩ andũ-a-Ndũrĩrĩ, ndutage wĩra wa mũthĩnjĩri-Yahweh wa kũhunjagia Ũhoro-ũrĩa-Mwega wa Yahweh, nĩgetha andũ-a-Ndũrĩrĩ magaatuĩka igongona rĩĩtĩkĩrĩku nĩ Yahweh, o rĩrĩa rĩamũrĩirwo Yahweh nĩ Roho Mwamũre.

Nĩ ũndũ ũcio nĩ ngwĩraha thĩinĩ wa Messiya Yahshua nĩ ũndũ wa ũtungata wakwa ngĩtungatĩra Yahweh.

Ndikũgeria kwaria ũndũ o na ũrĩkũ tiga o ũrĩa Messiya ahingĩtie na ũndũ wakwa harĩ ũhoro wa gũtongoria andũ-a-Ndũrĩrĩ ũhoro-inĩ wa gwathĩkĩra Yahweh, nĩ ũndũ wakwa kũheana ũhoro na maũndũ marĩa mekirwo,

na ũndũ wa hinya ũrĩa watũmaga kũringwo ciama na kuonwo morirũ, tondũ wa hinya wa Roho Mwamũre. Na nĩ ũndũ wa ũguo kuuma Yahrushalayim kũrigicũka nginya Iluriko, nĩ hunjĩtie biũ Ũhoro-ũrĩa-Mwega wa Messiya.

Na rĩrĩ, ndũire ndĩĩrirĩirie kũhunjia Ũhoro-ũrĩa-Mwega kũrĩa Messiya atamenyekete, nĩgetha ndikanatuĩke wa gwaka igũrũ rĩa mũthingi wakĩtwo nĩ mũndũ ũngĩ.

No rĩrĩ, nĩ gũtuĩke o ta ũrĩa kwandĩkĩtwo, atĩrĩ: “Arĩa matarĩ merũo ũhoro wake nĩo makaawona, na arĩa matarĩ maigua nĩo magaataũkĩrwo nĩguo.”

Kĩu nĩkĩo gĩtũmi kĩrĩa kĩanagiria mahinda maingĩ njũke kũu kwanyu.

No rĩu, tondũ hatirĩ handũ hangĩ ingĩruta wĩra ngʼongo-inĩ ici, na tondũ mĩaka mĩingĩ nĩ ngoretwo ngĩĩrirĩria kũmuona-rĩ,

nĩ ndĩrabanga gwĩka ũguo ngĩthiĩ Sipania. Nĩ ndĩrehoka gũkaamũceerera ngĩhĩtũkĩra kũu kwanyu, na atĩ nĩ mũkandeithĩrĩria gũthiĩ rũgendo rũu, thutha wa gũkenanĩra na inyuĩ ihinda inini.

No rĩu ndĩ rũgendo-inĩ ngĩthiĩ Yahrushalayim ngatungatĩre andũ arĩa aamũre marĩ kũu.

Nĩgũkorwo andũ a Makedonia na a Akaia nĩ monire arĩ wega kũhotha nĩguo mateithie andũ arĩa athĩni a thiritũ ya andũ arĩa aamũre kũu Yahrushalayim.

Ũguo nĩguo monire kwagĩrĩire, na ti-itherũ nĩ marĩ na thirĩ wa andũ acio. Tondũ wa rĩrĩ, angĩkorwo andũ-a-Ndũrĩrĩ nĩ magwatanĩire na Ayahudi irathimo cia kĩĩroho-rĩ, o nao marĩ na thirĩ kũrĩ Ayahudi wa kũmatungatĩra na indo iria marathimĩtwo nacio.

Nĩ ũndũ ũcio ndaarĩkia kũruta wĩra ũcio, na menye wega atĩ maciaro macio nĩ marĩkia kwamũkĩrwo-rĩ, hĩndĩ ĩyo nĩ ngamũceerera ngĩthiĩ Sipania.

Nĩ njũĩ atĩ ngĩũkĩra kũu kwanyu, ngaakorwo njiyũrĩrĩirwo nĩ irathimo cia Messiya.

Ariũ na aarĩ a Ithe witũ, nĩ ndamũthaitha nĩ ũndũ wa Mwathi witũ Yahshua Messiya na nĩ ũndũ wa wendani ũrĩa tũheetwo nĩ Roho, atĩ mũnyitanĩre na niĩ kĩgiano-inĩ gĩakwa na ũndũ wa kũhoya Yahweh nĩ ũndũ wakwa.

Hoyai nĩgetha ngaahonokio kuuma kũrĩ andũ arĩa matetĩkĩtie a kũu Yahuda, na ningĩ atĩ ũtungata wakwa kũu Yahrushalayim ũgetĩkĩrĩka nĩ andũ arĩa aamũre akuo,

nĩgetha ngooka kũrĩ inyuĩ ngenete, Yahweh enda, na tũcanjamũke tũrĩ hamwe.

Yahweh mwene thayũ aroikara hamwe na inyuĩ inyuothe. Amein.