Aroma 16

Ndĩramũmenyithia ũhoro wa mwarĩ wa Ithe witũ Fibi, ũrĩa ũtungataga thĩinĩ wa kĩũngano kĩrĩa gĩkoragwo Kenkirea,

nĩgetha mũmũnyite ũgeni thĩinĩ wa Yahweh o ta ũrĩa kwagĩrĩire harĩ arĩa aamũre na mũmũhe ũteithio o wothe angĩbatara, nĩ gũkorũo o nake we mwene nĩ ateithĩtie andũ aingĩ, nginya niĩ.

Ngeithĩriai Priska na Akila, arutithania wĩra hamwe na niĩ thĩinĩ wa Messiya Yahshua,

o acio maaingĩririe ngingo ciao ũgwati-inĩ nĩ ũndũ wakwa, na to niĩ nyiki ndĩramacokeria ngatho no nĩ nginya ciũngano ciothe cia ndũrĩrĩ

Ningĩ geithiai kĩũngano kĩrĩa gĩcemanagia kwao mũciĩ. Geithiai Epainita, ũrĩa nyendete, o ũcio maciaro ma mbere ma Messiya thĩinĩ wa Asia

Geithiai Mariamu, ũrĩa ũrutĩte wĩra na kĩyo nĩ ũndũ wanyu

Na mũgeithie Andronika na Juniasi, andũ a mbarĩ ciitũ arĩa mohetwo hamwe na niĩ, na nĩ andũ moĩkaine wega nĩ atũmwo na makoretwo na ũiguano hamwe na Messiya ihinda iraya kũngĩra.

Ngeithĩriai Ampliata, ũrĩa nyendete thĩinĩ wa Yahweh

Na mũgeithie Aribana, mũrutithania wĩra hamwe na ithuĩ thĩinĩ wa Messiya, na Stakiko, ũrĩa nyendete

Geithiai Apelesi, ũrĩa wĩtĩkĩrĩkĩte thĩinĩ wa Messiya. Geithiai andũ a nyũmba ya Aristobulo

Geithiai Herodioni, ũrĩa wa mbarĩ ciitũ. Na mũgeithie andũ a nyũmba ya Narikisa arĩa marĩ thĩinĩ wa Yahweh

Geithiai Trufena na Trufosa, andũ-a-nja arĩa marutaga wĩra na kĩyo thĩinĩ wa Yahweh. Geithiai Perisi, ũrĩa twendete, nĩ gũkorũo nĩ arutĩte wĩra na kĩyo thĩinĩ wa Yahweh

Geithiai Rufasi, ũrĩa mũthure thĩinĩ wa Yahweh, na mũgeithie nyina, ũrĩa o na niĩ njĩtaga maitũ.

Geithiai Asinkrita, Filegoni, Herime, Patiroba, Herima, na ariũ a Ithe witũ arĩa makoragwo hamwe nao

Geithiai Filologa na Julia, Neria na mwarĩ wa nyina, na Olimpasi, na arĩa othe aamũre makoragwo hamwe nao

Geithaniai inyuĩ ene na ngeithi nyamũre cia kũmumunyana. Nĩ mwageithio nĩ ciũngano ciothe cia Messiya.

Rĩu ariũ a Ithe witũ-rĩ, ndamũthaitha mwĩmenyagĩrĩre arĩa marehaga ngayũkano na magatũma andũ mahĩngwo, mũgarũ na ũrutani ũrĩa mwĩrutĩte, na mũmethemage.

Tondũ andũ a mũthemba ũcio makoragwo marĩ ngombo, ti cia Mũhonokia witũ Messiya, no nĩ cia merirĩria mao ene, na kũgerera mĩario yao mĩnyoroku na ciugo cia kĩgaathi, nĩ mahĩtithagia ngoro cia andũ arĩa mataramenya

Wathĩki wanyu nĩ ũmenyekete nĩ andũ othe, na kwoguo nĩ ngenaga nĩ ũndũ wanyu. No ngwenda mũtuĩke ogĩ ũhoro-inĩ wĩgiĩ maũndũ marĩa mega, na mũtigakorũo na ũcuke maũndũ-inĩ marĩa moru

Nake Yahweh ũrĩa ũheanaga thayũ nĩ ekũhehenja Shaitani ica ikuhĩ rungu rwa makinya manyu. Ũtugi mũnene wa Mũhonokia witũ Yahshua ũrokorũo hamwe na inyuĩ.

Nĩ mwageithio nĩ Timotheo, mũrutithania wĩra hamwe na niĩ, ningĩ nĩ mwageithio nĩ Lukio, Jasoni, na Sosipata, arĩa a mbarĩ ciitũ.

Niĩ Tatiasi, o niĩ mwandĩki wa marũa maya, nĩ ndamũgeithia thĩinĩ wa Yahweh.

Nĩ mwageithio nĩ Gayo, ũrĩa ũũnyitĩte ũgeni, na o we kĩũngano gĩothe gĩcemanagia gwake. Ningĩ nĩ mwageithio nĩ Erasito, mũigi kĩgĩna wa itũũra, o na mũrũ wa nyina Kwarito nĩ amũgeithia.

Wega wa Mũhonokia witũ Yahshua ũrogĩa na inyuĩ inyuothe

Rĩu-rĩ, kũrĩ Ũrĩa ũngĩhota gũtũma mwĩhande wega kũringana na ũhoro mwega ũrĩa hunjagia na ndũmĩrĩri ĩgiĩ Yahshua Messiya, kũringana na kũguũrio kwa hitho ĩrĩa nyamũre ĩkoretwo hitho-inĩ ihinda iraya mũno

no rĩu hitho ĩyo nĩ ĩguũrĩtio na ĩkamenyithanio kũgerera Maandĩko ma ũrathi gatagatĩ-inĩ ka ndũrĩrĩ ciothe kũringana na Rĩathani rĩa Kĩhoti ũrĩa ũtũũraga tene na tene, nĩguo kũgĩe na wathĩki kũgerera wĩtĩkio;

Yahweh o we wiki mũũgĩ arogoocwo tene na tene kũgerera Yahshua Messiya. Amein.