Athamaki wa Keerĩ 1

Na rĩrĩ, thutha wa gĩkuũ kĩa Ahabu, Moabi nĩ yaremeire Isiraeli.

Hĩndĩ ĩyo nĩrĩo Ahazia aagũire kũgerera mwanya warĩ kanyũmba-inĩ gake ka igũrũ kũu Samaria na akĩgurara. Kwoguo agĩtũma atũmwo na akĩmeera atĩrĩ: “Thiĩi mũtuĩrie ũhoro kũrĩ Baali-zebubu hoti ya Ekironi, nĩguo mũmenye kana nĩ ngũhona nguraro ĩno.”

No mũraika wa Yahweh akĩra Eliyah ũrĩa Mũtishibi ũũ: “Ũkĩra ũthiĩ ũgatũnge atũmwo a mũthamaki wa Samaria ũmeere atĩrĩ, ‘Hihi nĩ Kĩhoti gũtarĩ thĩinĩ wa Isiraeli atĩ nĩkĩo mũrathiĩ gũtuĩria ũhoro kũrĩ Baali-zebubu hoti ya Ekironi

Nĩ ũndũ ũcio, Yahweh oigĩte ũũ: “Ndũkuuma ũrĩrĩ-inĩ ũcio ũkomeire, tondũ hatarĩ nganja nĩ ũgũkua.”’” Nake Eliyah agĩĩthiĩra.

Rĩrĩa atũmwo acio maacokire kũrĩ we, o rĩmwe akĩmoria ũũ: “Nĩ kĩĩ gĩatũma mũcoke?”

Nao makĩmũcokeria makĩmwĩra atĩrĩ, “Nĩ harĩ mũndũ ũũkire gũtũtũnga atwĩra ũũ: ‘Thiĩi, mũcoke kũrĩ mũthamaki ũrĩa ũmũtũmire mũmwĩre atĩrĩ, “Ũũ nĩguo Yahweh ekuuga: ‘Hihi nĩ Kĩhoti gũtarĩ thĩinĩ wa Isiraeli atĩ nĩkĩo ũtũmĩte andũ magatuĩrie ũhoro kũrĩ Baali-zebubu hoti ya Ekironi? Nĩ ũndũ ũcio-rĩ, ndũkuuma ũrĩrĩ-inĩ ũcio ũkomeire, tondũ hatarĩ nganja nĩ ũgũkua.’”’”

Nake akĩmoria atĩrĩ: “Mũndũ ũcio ũũkire kũmũtũnga na amwĩra ciugo icio ekũhaanaga atĩa?”

Nao makĩmwĩra atĩrĩ: “Nĩ mũndũ ũkwĩhumbĩte nguo ya maguoya na akeyoha mũcibi wa ngothi njohero.” Nake akiuga o rĩmwe: “Ũcio nĩ Eliyah ũrĩa Mũtishibi.”

Mũthamaki agĩcoka akĩmũtũmĩra mũnene wa thigari 50 hamwe na arũme ake 50. Rĩrĩa mũnene ũcio aambatire kũrĩ we, Eliyah aaikarĩte thĩ igũrũ rĩa kĩrĩma. Agĩkĩmwĩra atĩrĩ: “Wee mũndũ wa Kĩhoti ũrĩa wa ma, mũthamaki ekuuga atĩrĩ, ‘Ikũrũka.’”

No Eliyah agĩcokeria mũnene ũcio wa thigari 50 akĩmwĩra ũũ: “Angĩkorũo niĩ ndĩ mũndũ wa Kĩhoti-rĩ, reke mwaki ũikũrũke kuuma igũrũ ũgũcine hamwe na arũme acio aku 50.” Naguo mwaki ũgĩikũrũka kuuma igũrũ ũkĩmũcina hamwe na arũme acio ake 50.

Nake mũthamaki akĩmũtũmĩra rĩngĩ mũnene ũngĩ wa thigari 50 hamwe na arũme ake 50. Nake agĩthiĩ akĩmwĩra atĩrĩ: “Wee mũndũ wa Kĩhoti ũrĩa wa ma, mũthamaki ekuuga atĩrĩ, ‘Ikũrũka na ihenya.’”

No Eliyah akĩmacokeria akĩmeera ũũ: “Angĩkorũo niĩ ndĩ mũndũ wa Kĩhoti ũrĩa wa ma-rĩ, reke mwaki ũikũrũke kuuma igũrũ ũgũcine hamwe na arũme acio aku 50.” Naguo mwaki wa Kĩhoti ũgĩikũrũka kuuma igũrũ na ũkĩmũcina hamwe na arũme acio ake 50.

Mũthamaki agĩcoka agĩtũma o rĩngĩ mũnene wa gatatũ wa thigari 50 hamwe na arũme ake 50. No mũnene ũcio wa gatatũ wa thigari 50 akĩambata na akĩinamĩrĩra aturĩtie maru mbere ya Eliyah na akĩambĩrĩria kũmũthaitha etĩkĩrĩke nĩwe akĩmwĩra ũũ: “Wee mũndũ wa Kĩhoti ũrĩa wa ma, ndagũthaitha ũreke muoyo wakwa na wa ndungata ici ciaku 50 ũkorũo ũrĩ wa bata maitho-inĩ maku

Mwaki nĩ ũrĩkĩtie gũikũrũka kuuma igũrũ na ũgacina anene acio erĩ a mbere a thigari 50 hamwe na ikundi ciao cia arũme 50, ĩndĩ rĩu reke muoyo wakwa ũkorũo ũrĩ wa bata maitho-inĩ maku.”

Hĩndĩ ĩyo mũraika wa Yahweh akĩra Eliyah atĩrĩ: “Ikũrũka hamwe nake. Ndũkamwĩtigĩre.” Nĩ ũndũ ũcio agĩũkĩra agĩikũrũka hamwe nake nginya kũrĩ mũthamaki

Eliyah agĩkĩĩra mũthamaki atĩrĩ, “Yahweh oigĩte ũũ: ‘Nĩ ũtũmĩte atũmwo magatuĩrie ũhoro kũrĩ Baali-zebubu hoti ya Ekironi. Hihi nĩ Kĩhoti gũtarĩ thĩinĩ wa Isiraeli? Nĩ kĩĩ gĩtũmĩte wage gũtuĩria kiugo gĩake? Nĩ ũndũ ũcio-rĩ, ndũkuuma ũrĩrĩ-inĩ ũcio ũkomeire, tondũ hatarĩ nganja nĩ ũgũkua.’”

Nake agĩkua, kũringana na kiugo kĩa Yahweh kĩrĩa Eliyah oigĩte; na tondũ ndaarĩ na mũriũ, Jehoramu agĩtuĩka mũthamaki ithenya rĩake, mwaka-inĩ wa kerĩ wa Jehoramu mũrũ wa Jehoshafatu mũthamaki wa Yahuda.

Ha ũhoro wa maũndũ macio mangĩ megiĩ Ahazia, ũrĩa eekire, na githĩ ti maandĩke ibuku-inĩ rĩa maũndũ ma mahinda ma athamaki a Isiraeli?