Athamaki wa Keerĩ 12
Na rĩrĩ, mwaka-inĩ wa mũgwanja wa Yahu, Jehoashu agĩtuĩka mũthamaki na agĩathana mĩaka 40 thĩinĩ wa Yahrushalayim. Nyina eetagwo Zibia wa kuuma Biri-shiba
Jehoashu agĩthiĩ na mbere gwĩka maũndũ marĩa maagĩrĩire maitho-inĩ ma Yahweh matukũ-inĩ marĩa mothe Jehoiada ũrĩa mũthĩnjĩri-Yahweh aamũtaaraga
No rĩrĩ, kũndũ kũrĩa gũtũũgĩru gũtieheririo, na andũ no maathiaga na mbere kũrutĩra magongona na ndogo ya magongona kũndũ kũu gũtũũgĩru.
Nake Jehoashu akĩĩra athĩnjĩri-Yahweh atĩrĩ: “Oyai mbeca ciothe iria irehagwo nyũmba-inĩ ya Yahweh nĩ ũndũ wa magongona marĩa mamũre, mbeca iria o mũndũ agĩrĩirũo nĩ kũruta, mbeca iria irutagwo irĩ thogora ũrĩa ũtuĩtwo wa mũndũ, na mbeca iria ciothe o mũndũ atindĩkagwo nĩ ngoro yake kũrehe nyũmba-inĩ ya Yahweh.
athĩnjĩri-Yahweh o ene nĩo marĩoyaga mbeca icio kuuma kũrĩ arĩa maciruta na magacihũthĩra gũthondeka nyũmba, harĩa hothe honeka harĩ hathũku.”
Gũkinyĩria mwaka wa 23 wa Mũthamaki Jehoashu, athĩnjĩri-Yahweh matiathondekete kũrĩa gwathũkangĩte nyũmba-inĩ ĩyo.
Mũthamaki Jehoashu agĩgĩta Jehoiada ũcio mũthĩnjĩri-Yahweh o hamwe na athĩnjĩri-Yahweh acio angĩ akĩmeera atĩrĩ: “Nĩ kĩĩ kĩratũma mwage gũthondeka kũrĩa nyũmba ĩno ĩthũkangĩte? Nĩ ũndũ ũcio, mũtikoe mbeca ingĩ kuuma kũrĩ arĩa macirutaga o tiga akorirũo cikũhũthĩrũo gũthondeka nyũmba ĩno.”
Nao athĩnjĩri-Yahweh magĩtĩkĩra atĩ matikuoya mbeca ingĩ kuuma kũrĩ andũ na atĩ tio mekwĩhokerũo wĩra wa gũthondeka nyũmba ĩyo.
Nake Jehoiada ũcio mũthĩnjĩri-Yahweh akĩoya ithandũkũ na agĩtũra irima gĩkunĩko-inĩ kĩarĩo na akĩrĩiga hakuhĩ na kĩgongona mwena wa ũrĩo mũndũ agĩtonya nyũmba-inĩ ya Yahweh. Hau nĩho athĩnjĩri-Yahweh arĩa maarĩ aikaria a mĩrango maaikagia mbeca iria ciothe ciarehagwo thĩinĩ wa nyũmba ya Yahweh
Rĩrĩa rĩothe mona atĩ harĩ na mbeca nyingĩ ithandũkũ-inĩ, mwandĩki wa mũthamaki na mũthĩnjĩri-Yahweh ũrĩa mũnene maathiaga magacokanĩrĩria na magatara mbeca icio ciarehetwo nyũmba-inĩ ya Yahweh.
Maaneanaga mbeca iria ciatarũo kũrĩ arĩa maamũrĩtwo marũgamĩrĩre wĩra ũcio warutagwo nyũmba-inĩ ya Yahweh. Nao magacoka makarĩha andũ arĩa maarutaga wĩra wa mbaũ na aaki arĩa maarutaga wĩra nyũmba-inĩ ya Yahweh,
o hamwe na mabundi a mahiga na arĩa maaicũhagia mahiga. Ningĩ nĩ maagũrire mbaũ na mahiga maicũhie ma gũthondeka kũrĩa gwathũkangĩte nyũmba-inĩ ya Yahweh na makĩhũthĩra mbeca icio kũrũgamĩrĩra mahũthĩro macio mangĩ mothe ma gũthondeka nyũmba ĩyo.
O na kũrĩ ũguo, mbeca-inĩ iria ciarehirũo nyũmba-inĩ ya Yahweh, gũtirĩ ciahũthĩrirũo gũthondeka iraĩ cia betha, magathĩ ma kũhoria ndambĩ, mbakũri, tũrumbeta, kana kĩndũ kĩa mũthemba o wothe gĩa thahabu kana kĩa betha kĩa nyũmba ya Yahweh
Maacineaga o arĩa maarutaga wĩra ũcio, nao magacihũthĩra gũthondeka nyũmba ya Yahweh
Matiatuĩragia ũrĩa mbeca irahũthĩrũo kuuma kũrĩ andũ arĩa maanengeraga mbeca icio nĩguo ineo aruti wĩra, tondũ maarĩ ehokeku
No rĩrĩ, mbeca cia magongona ma mahĩtia na mbeca cia magongona ma mehia itiarehagwo nyũmba-inĩ ya Yahweh; icio ciarĩ cia athĩnjĩri-Yahweh.
Hĩndĩ ĩyo nĩrĩo Hazaeli mũthamaki wa Siria aambatire nĩguo akarũe na itũũra rĩa Gathu, na akĩrĩtaha, thutha ũcio agĩtua itua rĩa gũtharĩkĩra Yahrushalayim
Nake Mũthamaki Jehoashu wa Yahuda akĩoya magongona mothe mamũre marĩa maithe make ma tene Jehoshafatu, Jehoramu, na Ahazia, o acio maarĩ athamaki a Yahuda maamũrĩte, o hamwe na magongona make marĩa mamũre na thahabu yothe ĩrĩa yarĩ igĩna-inĩ cia nyũmba ya Yahweh na cia nyũmba ya mũthamaki, agĩcitũmanĩra Hazaeli mũthamaki wa Siria. Nake agĩtiga gũũkĩrĩra Yahrushalayim.
Ha ũhoro wa maũndũ macio mangĩ megiĩ Jehoashu, ũrĩa wothe eekire, na githĩ ti maandĩke ibuku-inĩ rĩa maũndũ ma mahinda ma athamaki a Yahuda
O na kũrĩ ũguo, ndungata ciake ikĩnyitanĩra harĩ njama ya kũmũũkĩrĩra na ikĩũragĩra Jehoashu nyũmba-inĩ ya Milo, njĩra-inĩ ĩrĩa ĩikũrũkĩte gũthiĩ Sila
Ndungata ciake Jozakaru mũrũ wa Shimeathu na Jehozabadu mũrũ wa Shomeri nĩo maamũtharĩkĩire na makĩmũũraga. Makĩmũthika hamwe na maithe make ma tene thĩinĩ wa Itũũra rĩa Daudi, na mũrũwe Amazia agĩtuĩka mũthamaki ithenya rĩake.