Athamaki wa Keerĩ 11

Rĩrĩa Athalia, nyina wa Ahazia oonire atĩ mũrũwe nĩ akua, agĩũkĩra na akĩananga rũciaro ruothe rwa ũthamaki

No rĩrĩ, Jehosheba mwarĩ wa Mũthamaki Jehoramu, ũrĩa warĩ mwarĩ wa nyina na Ahazia, akĩoya Jehoashu mũrũ wa Ahazia akĩmũiya kuuma gatagatĩ ka ariũ a mũthamaki arĩa maarĩ moragwo, akĩmũiga hamwe na mũreri wake rumu-inĩ ya thĩinĩ ya toro. Makĩhota kũmũhitha kuuma harĩ Athalia, kwoguo ndooragirũo

Aaikarire nake mĩaka ĩtandatũ, ahithĩtwo nyũmba-inĩ ya Yahweh, hĩndĩ ĩyo Athalia aathanaga bũrũri-inĩ ũcio.

Mwaka-inĩ wa mũgwanja, Jehoiada agĩtũmanĩra anene a andũ igana a arangĩri a Akaria na a arangĩri a nyũmba ya mũthamaki na magĩthiĩ kũrĩ we nyũmba-inĩ ya Yahweh. Akĩgĩa kĩrĩkanĩro hamwe nao na akĩmehĩtithia ũhoro-inĩ wĩgiĩ kĩrĩkanĩro kĩu nyũmba-inĩ ya Yahweh, agĩcoka akĩmonia mũrũ wa mũthamaki

Akĩmaatha akĩmeera atĩrĩ: “Ũndũ ũyũ nĩguo mwagĩrĩirũo gwĩka: Gĩcunjĩ kĩmwe harĩ ithatũ gatagatĩ-inĩ kanyu gĩgaakorũo wĩra mũthenya wa Thabatũ na nĩ gĩkaarangĩra biũ nyũmba ya mũthamaki,

gĩcunjĩ kĩngĩ kĩmwe harĩ ithatũ gĩgaakorũo Kĩhingo-inĩ kĩa Mũthingi na gĩcunjĩ kĩngĩ kĩmwe harĩ ithatũ gĩgaakorũo kĩhingo-inĩ kĩrĩa kĩrĩ thutha wa arangĩri a nyũmba ya mũthamaki. Mũgaaikara mũgĩcenjanagia mũkĩrangĩra nyũmba ĩyo

Ikundi cianyu igĩrĩ iria itagĩrĩire gũkorũo wĩra mũthenya wa Thabatũ no mũhaka ikaarangĩra biũ nyũmba ya Yahweh nĩguo igitĩre mũthamaki

Mwagĩrĩirũo gũthiũrũrũkĩria mũthamaki na mĩena yothe, o mũndũ anyitĩte matharaita make na guoko. Mũndũ wothe ũkaaingĩra gatagatĩ-inĩ ga thigari nĩ akooragwo. Mwagĩrĩirũo gũikara na mũthamaki harĩa hothe athiĩ.”

Anene acio a andũ igana magĩka o ta ũrĩa Jehoiada ũcio mũthĩnjĩri-Yahweh aamaathĩte. O ũmwe wao akĩoya andũ ake arĩa maagĩrĩirũo kũruta wĩra mũthenya wa Thabatũ, o hamwe na arĩa mataagĩrĩirũo kũruta wĩra mũthenya wa Thabatũ, makĩingĩra kũrĩ Jehoiada ũcio mũthĩnjĩri-Yahweh

Nake mũthĩnjĩri-Yahweh akĩhe anene acio a andũ igana matimũ na ngo cia gĩthiũrũrĩ iria ciarĩ cia Mũthamaki Daudi, o icio ciarĩ nyũmba-inĩ ya Yahweh

Nao arangĩri a nyũmba ya mũthamaki makĩrũgama handũ hao, o ũmwe wao anyitĩte matharaita make na guoko, kuuma mwena wa ũrĩo wa nyũmba ĩyo nginya mwena wayo wa ũmotho, hakuhĩ na kĩgongona na hakuhĩ na nyũmba ĩyo, magĩthiũrũrũkĩria mũthamaki

Jehoiada agĩcoka akĩruta mũrũ wa mũthamaki nja na akĩmũigĩrĩra thũmbĩ na Ũira, na makĩmũtua mũthamaki na makĩmũitĩrĩria maguta. Makĩambĩrĩria kũhũũra hĩ makiugaga atĩrĩ: “Mũthamaki arotũũra ihinda iraya!”

Rĩrĩa Athalia aaiguire mũgambo wa andũ magĩteng’era, o rĩmwe agĩthiĩ kũrĩ andũ nyũmba-inĩ ya Yahweh

Agĩcoka akĩona mũthamaki arũgamĩte hau hakuhĩ na gĩtugĩ kũringana na mũtugo. Anene na ahuuhi tũrumbeta maarĩ hamwe na mũthamaki, na andũ othe a bũrũri nĩ gũkena maakenaga makĩhuuhaga tũrumbeta. Athalia ona ũguo agĩtembũra nguo ciake na akĩanĩrĩra akiuga: “Ĩno nĩ njama! Ĩno nĩ njama!”

No Jehoiada ũcio mũthĩnjĩri-Yahweh agĩatha anene a andũ igana, arĩa maathuurĩtwo matongorie mbũtũ, akĩmeera ũũ: “Mweheriei gatagatĩ-inĩ ga thigari, na mũndũ o wothe ũkũmũrũmĩrĩra, mũmũũrage na rũhiũ rwa njora!” Tondũ mũthĩnjĩri-Yahweh nĩ ooigĩte atĩrĩ: “Mũtikamũũragĩre nyũmba-inĩ ya Yahweh.”

Magĩkĩmũnyita, na rĩrĩa aakinyire harĩa mbarathi ciaingĩragĩra nyũmba ya mũthamaki, makĩmũũragĩra ho.

Nake Jehoiada agĩtũma kũgĩe kĩrĩkanĩro gatagatĩ ka Yahweh na mũthamaki na andũ, atĩ nĩ mangĩathiire na mbere gũikara marĩ andũ a Yahweh, ningĩ agĩtũma kũgĩe kĩrĩkanĩro gatagatĩ ka mũthamaki na andũ

Thutha ũcio andũ othe a bũrũri magĩthiĩ nyũmba-inĩ ya Baali na makĩmomora igongona ciake, makĩhehenja mĩhianano yake biũ, na makĩũragĩra Matani mũthĩnjĩri-kĩhoti wa Baali mbere ya igongona icio.

Ningĩ akĩoya anene a andũ igana, arangĩri a Akaria, arangĩri a nyũmba ya mũthamaki, o hamwe na andũ othe a bũrũri nĩguo moimagarie mũthamaki maikũrũkĩte kuuma nyũmba-inĩ ya Yahweh, na magĩkinya nyũmba-inĩ ya mũthamaki magereire kĩhingo kĩa arangĩri a nyũmba ya mũthamaki. Nake agĩikarĩra gĩtĩ kĩa ũnene kĩa athamaki

Nao andũ othe a bũrũri magĩkena na itũũra rĩu rĩkĩhoorera, nĩ gũkorũo nĩ mooragĩte Athalia na rũhiũ rwa njora kũu nyũmba-inĩ ya mũthamaki.

Jehoashu aarĩ na mĩaka mũgwanja rĩrĩa aatuĩkire mũthamaki.