Athamaki wa Keerĩ 21

Manase aarĩ na mĩaka 12 rĩrĩa aatuĩkire mũthamaki, na agĩathana mĩaka 55 thĩinĩ wa Yahrushalayim. Nyina eetagwo Hefiziba

Nake agĩka maũndũ moru maitho-inĩ ma Yahweh, akĩrũmĩrĩra mĩtugo ĩrĩ magigi ya ndũrĩrĩ iria Yahweh aaingatĩte ciehere mbere ya andũ a Isiraeli

Nĩ aakire rĩngĩ kũndũ gũtũũgĩru kũrĩa ithe Hezekia aanangĩte, na agĩakĩra Baali igongona na agĩthondeka mũtĩ wa kũhoywo, o ta ũrĩa Ahabu mũthamaki wa Isiraeli eekĩte. O na akĩinamĩrĩra mbũtũ yothe ya igũrũ na akĩmĩtungatĩra

Ningĩ agĩaka igongona thĩinĩ wa nyũmba ya Yahweh, ĩrĩa Yahweh ooigĩte ũũ ũhoro-inĩ wayo: “Thĩinĩ wa Yahrushalayim, nĩ ngaiga rĩĩtwa rĩakwa.”

Ningĩ agĩakĩra mbũtũ yothe ya igũrũ igongona thĩinĩ wa nja igĩrĩ cia nyũmba ya Yahweh

Na akĩhĩtũkĩria mũrũ wake mwene mwaki-inĩ; agĩka maũndũ ma ũgo, agĩcaria imenyithia cia ũragũri, na akĩamũra andũ arĩa maragia na maroho na arĩa marathaga mohoro. Agĩka maũndũ moru maitho-inĩ ma Yahweh na gĩkĩro kĩnene nĩguo amũrakarie.

Aaigire mũhianano ũcio wa gwacũhio aathondekire wa mũtĩ wa kũhoywo nyũmba-inĩ ĩrĩa Yahweh eerĩte Daudi na akera mũrũ wake Suleimani atĩrĩ: “Thĩinĩ wa nyũmba ĩno na thĩinĩ wa Yahrushalayim, o ĩyo thuurĩte kuuma harĩ mĩhĩrĩga yothe ya Isiraeli, nĩ ngaiga rĩĩtwa rĩakwa rĩtũũre kuo

Na gũtirĩ hĩndĩ ĩngĩ ngaatũma makinya ma Isiraeli morũũre kuuma bũrũri-inĩ ũrĩa ndaheire maithe mao ma tene, angĩkorũo nĩ marĩrũmagĩrĩra biũ maũndũ mothe marĩa ndĩmaathĩte, marũmĩrĩre Watho wothe ũrĩa Musa ndungata yakwa aamaathire marũmagĩrĩre.”

No matiathĩkire, na Manase aathiire na mbere kũmahĩtithia, agĩtũma meke maũndũ moru mũno gũkĩra ndũrĩrĩ iria Yahweh aaniinĩte nĩguo ciehere mbere ya ciana cia Isiraeli.

Nake Yahweh agĩthiĩ na mbere kwaria akĩhũthĩra ndungata ciake anabii, akiuga atĩrĩ:

“Manase mũthamaki wa Yahuda nĩ ekĩte maũndũ macio mothe marĩ magigi; ekĩte maũndũ ma waganu gũkĩra Aamori othe arĩa maarĩ kuo mbere yake, na nĩ atũmĩte Yahuda ĩhie nĩ ũndũ wa mĩhianano yake ĩrĩ magigi

Nĩ ũndũ ũcio, ũũ nĩguo Yahweh Kĩhoti wa Isiraeli ekuuga: ‘Nĩ ngũrehe thĩna mũnene thĩinĩ wa Yahrushalayim na Yahuda, ũtũme matũ meerĩ ma mũndũ o wothe ũkũũigua mararakwo

Na nĩ ngaatambũrũkĩria Yahrushalayim rũrigi rwa gũthima rũrĩa rwahũthĩrirũo harĩ Samaria na hũthĩre kabirũ karĩa kaahũthĩrirũo harĩ nyũmba ya Ahabu, na nĩ ngaahuura Yahrushalayim ĩthere, o ta ũrĩa mũndũ ahuuraga mbakũri ĩgathera, akamĩhuura na akamĩkurumania

Nĩ ngaatiganĩria matigari ma igai rĩakwa na ndĩmaneane guoko-inĩ gwa thũ ciao, nao magaatuĩka kĩndũ gĩa gũtunywo na gĩa gũtahwo harĩ thũ ciao ciothe,

tondũ nĩ meekire maũndũ moru maitho-inĩ makwa na maathiire na mbere kũndakaria kuuma o mũthenya ũrĩa maithe mao ma tene mooimire Misiri nginya ũmũthĩ ũyũ.’”

Ningĩ Manase nĩ aaitire thakame nyingĩ mũno ĩtarĩ na mahĩtia nginya akĩmĩiyũria Yahrushalayim kuuma mũico ũmwe nginya ũrĩa ũngĩ, o hamwe na mehia make ma gũtũma Yahuda ĩhie na njĩra ya gwĩka maũndũ moru maitho-inĩ ma Yahweh

Ha ũhoro wa maũndũ macio mangĩ megiĩ Manase na ũrĩa wothe eekire o na mehia marĩa eekire, na githĩ ti maandĩke ibuku-inĩ rĩa maũndũ ma mahinda ma athamaki a Yahuda

Thutha ũcio Manase akĩhurũkio hamwe na maithe make ma tene na agĩthikwo mũgũnda-inĩ wa nyũmba yake, mũgũnda-inĩ wa Uza; na mũrũwe Amoni agĩtuĩka mũthamaki ithenya rĩake.

Amoni aarĩ na mĩaka 22 rĩrĩa aatuĩkire mũthamaki, na agĩathana mĩaka ĩĩrĩ thĩinĩ wa Yahrushalayim. Nyina eetagwo Meshulemethu mwarĩ wa Haruzu kuuma Jotiba

Nake agĩthiĩ na mbere gwĩka maũndũ moru maitho-inĩ ma Yahweh, o ta ũrĩa ithe Manase eekĩte

Agĩkĩrũmĩrĩra njĩra ciothe iria ithe aarũmĩrĩire, na agĩthiĩ na mbere gũtungatĩra na kũinamĩrĩra mĩhianano ĩrĩ magigi ĩrĩa ithe aatungatagĩra

Kwoguo agĩtiganĩria Yahweh Kĩhoti wa maithe make ma tene, na ndaarũmĩrĩire njĩra ya Yahweh

Thutha-inĩ ndungata cia Amoni ikĩbanga njama ya kũmũũkĩrĩra na ikĩũragĩra mũthamaki ũcio thĩinĩ wa nyũmba yake mwene

No andũ a bũrũri ũcio makĩũraga arĩa othe maabangĩte njama ya gũũkĩrĩra Mũthamaki Amoni, na magĩtua mũrũwe Josia mũthamaki ithenya rĩake

Ha ũhoro wa maũndũ macio mangĩ megiĩ Amoni, ũrĩa eekire, na githĩ ti maandĩke ibuku-inĩ rĩa maũndũ ma mahinda ma athamaki a Yahuda

Nĩ ũndũ ũcio, makĩmũthika thĩinĩ wa mbĩrĩra yake mũgũnda-inĩ wa Uza, na mũrũwe Josia agĩtuĩka mũthamaki ithenya rĩake.