Athesalonike wa Keerĩ 1

Nĩ ithuĩ Saũlũ, na Sila, na Timotheo, Twandĩkĩra Ũngano wa Athesalonike marũa maya ũrĩa ũrĩ thĩinĩ wa Yahweh Ithe witũ, o na thĩinĩ wa Mwathi Yahshua Messiya:

Wega na thayũ irogĩa na inyuĩ ciumĩte kũrĩ Yahweh Ithe witũ, o na Mwathi Yahshua Messiya.

Nĩ twagĩrĩirwo nĩ gũcokagĩria Yahweh ngatho hĩndĩ ciothe nĩ ũndũ wanyu, ariũ na aarĩ a Ithe witũ, tondũ ũguo nĩguo kwagĩrĩire, tondũ wĩtĩkio wanyu nĩ ũrakũra mũno makĩria, o naguo wendani ũrĩa o mũndũ arĩ naguo harĩ mũndũ ũrĩa ũngĩ ũkaingĩha.

Nĩ ũndũ ũcio, nĩ twĩrahaga tũrĩ thĩinĩ wa maũngano ma Yahweh nĩ ũndũ wa gũkirĩrĩria kwanyu, na gwĩtĩkia kwanyu mĩnyamaro-inĩ yothe na magerio marĩa mũkiragĩrĩria.

Maũndũ macio mothe nĩ monanagia atĩ itua rĩa Yahweh rĩa cira nĩ rĩa kĩhooto, na nĩ ũndũ ũcio mũtuwo aagĩrĩru a gũtonya ũthamaki-inĩ wa Yahweh, o ũcio mũnyariragwo nĩ ũndũ waguo.

Kuona atĩ nĩ ũndũ wa ũthingu Yahweh kũrĩha arĩa mamũthĩnagia inyuĩ na njĩra ya kũmarehere thĩna o nao,

no inyuĩ arĩa mũtũire mũthĩnagio amũhe kĩhurũko, o hamwe na ithuĩ. Ũndũ ũcio nĩ ũkahinga hĩndĩ ĩrĩa Mwathi Yahshua akaaguũranĩrio oimĩte igũrũ arĩ hamwe na araika ake arĩa marĩ hinya.

Ena mwaki ũrarĩrĩmbũka, nĩ akaherithia andũ arĩa matoĩ Yahweh na mataathĩkagĩra Ũhoro-ũrĩa-Mwega wa Mwathi witũ Yahshua.

Nao nĩ makaherithio na kwanangwo kũrĩa gũtagathira, na mahingĩrĩrio nja matikone ũthiũ wa Yahweh, o na ũnene wa hinya wake,

mũthenya ũrĩa agoka nĩguo atũũgĩrio thĩinĩ wa andũ ake arĩa aamũre, o na andũ othe arĩa mamwĩtĩkĩtie magege nĩ ũndũ wake. O na inyuĩ mũgaakorwo mũrĩ amwe ao tondũ nĩ mwetĩkirie ũira witũ ũrĩa twamũheire.

Ũndũ ũcio nĩguo ũtũmaga tũmũhoyagĩre tũtegũtigithĩria, atĩ Yahweh witũ amũtue andũ maaganĩrĩire na gwĩtwo kwanyu, ningĩ nĩ ũndũ wa hinya wake amũhingagĩrie matanya manyu mothe marĩa mega, o na wĩra o wothe ũrĩa uumanĩte na wĩtĩkio wanyu

Tũhoyaga ũguo nĩgetha rĩĩtwa rĩa Mwathi witũ Yahshua rĩtũũgagĩrio thĩinĩ wanyu, o na inyuĩ mũtũũgagĩrio thĩinĩ wake, kũringana na wega wa Yahweh witũ na wa Mwathi Yahshua Messiya.