Athesalonike wa Keerĩ 2

Rĩu-rĩ ariũ na aarĩ a Ithe witũ, twamũthaitha atĩ ha ũhoro wa gũcoka kwa Mwathi witũ Yahshua Messiya na gũcokanĩrĩrio gwitũ harĩ we,

atĩ mũtikahiũhe kwenyenyio kana mũhahũrwo nĩ ũrathi mũna, kana ndũmĩrĩri, o na kana marũa merĩtwo atĩ moimĩte kũrĩ ithuĩ, makoiga atĩ mũthenya wa Messiya nĩ ũrĩkĩtie gũkinya.

Mũtikareke mũndũ o na ũrĩkũ amũhenie o na atĩa, nĩgũkorwo mũthenya ũcio ndũgakinya, ũhoro wa kũregana na Watho ũtakinyĩte, o nake mũndũ ũrĩa mũregi Watho ataguũranĩirio, o ũcio ũtuĩrĩirwo cira wa kwanangwo.

Nĩ agokĩrĩra na etũũgĩrie igũrũ rĩa kĩrĩa gĩothe gĩĩtanĩtio na Yahweh, kana kĩrĩa gĩothe kĩhoyagwo, nĩgetha aikare thĩ kũu thĩinĩ wa hekarũ ya Yahweh, agĩĩtuaga atĩ we mwene nĩ Yahweh.

Kaĩ mũtararirikana atĩ rĩrĩa ndarĩ hamwe na inyuĩ nĩ ndamwĩraga maũndũ macio

Na rĩu nĩ mũũĩ kĩrĩa kĩgirĩtie mũndũ ũcio oke na nĩgetha akaaguũranĩrio ihinda rĩrĩa rĩagĩrĩire.

Nĩgũkorwo ũhoro wa hitho wa kũregana na Watho nĩ ũraruta wĩra; no nĩ kũrĩ ũrĩa ũgirĩrĩirie ũhoro ũcio woneke rĩu, na egũthiĩ na mbere gwĩka ũguo nginya rĩrĩa akeeherio.

Na hĩndĩ ĩyo nĩguo mũndũ ũcio mũregi Watho akaaguũranĩrio. Mũndũ ũcio nĩwe Mwathi Yahshua akooraga na mĩhũmũ ya kanua gake, na amwanange na riri wake ũrĩa ũkonanio nĩ gũcoka gwake.

Mũndũ ũcio mũregi Watho nĩ agoka kũringana na wĩra wa Shaitani ũrĩa wonekaga thĩinĩ wa mĩthemba yothe ya ciama cia maheni, na marũũri, na morirũ,

o na oke na mĩthemba yothe ya ũmaramari nĩguo ahenie andũ arĩa marĩ njĩra ya kũũra. Moraga tondũ nĩ maregire kwenda ũhoro-ũrĩa-wa-ma nĩguo mahonokio.

Na tondũ ũcio Yahweh nĩ amarehagĩra ũndũ wa hinya wa kũmahĩtithia, nĩgetha metĩkie maheni macio,

na nĩgetha andũ othe matuĩrwo cira arĩa matetĩkĩtie ũhoro-ũrĩa-wa-ma na makenagĩra maũndũ ma waganu.

No rĩrĩ, twagĩrĩirwo nĩ gũcokagĩria Yahweh ngatho hĩndĩ ciothe nĩ ũndũ wanyu, inyuĩ ariũ na aarĩ a Ithe witũ mwendetwo Nĩwe, tondũ kuuma o kĩambĩrĩria Yahweh nĩ amũthurire mũhonokio nĩ ũndũ wa kwamũrwo nĩ Roho o na gwĩtĩkia ũhoro-ũrĩa-wa-ma.

Aamwĩtĩire ũhoro ũyũ nĩ ũndũ wa Ũhoro-ũrĩa-Mwega ũrĩa twamũhunjĩirie nĩguo mũgĩe na riri wa Mwathi witũ Yahshua Messiya

Nĩ ũndũ ũcio, ariũ na aarĩ a Ithe witũ, mwĩhandei wega na mũrũmie ũrutani ũrĩa twamũrutire, o na akorwo twaririe na kanua kana tũkĩmwandĩkĩra marũa.

Mwathi witũ Yahshua Messiya we mwene, o na Yahweh Ithe witũ ũrĩa watwendire na agĩtũhe ũũmĩrĩru wa nginya tene na kĩĩrĩgĩrĩro kĩega na ũndũ wa Wega wake-rĩ,

maroomĩrĩria ngoro cianyu, na mamwĩkĩre hinya thĩinĩ wa ciĩko o na ciugo ciothe njega.