Athesalonike wa Keerĩ 3
Ngĩrĩkĩrĩria ariũ na aarĩ a Ithe witũ-rĩ, thiĩi na mbere gũtũhoera, nĩgetha kiugo kĩa Yahweh gĩthiĩ na mbere gũtherema na ihenya na gũtũũgĩrio, o ta ũrĩa gĩtariĩ harĩ inyuĩ,
na atĩ tũhonokio kuuma kũrĩ andũ oru na aganu, nĩ gũkorũo wĩtĩkio ti kĩndũ kĩa andũ othe.
No Yahweh nĩ mwĩhokeku, na nĩ ekũmwĩkĩra hinya na amũgitĩre kuumana na ũrĩa mũũru
Makĩria ma ũguo, tũrĩ na ma thĩinĩ wa Yahweh ũhoro-inĩ wanyu, atĩ nĩ mũrarũmĩrĩra na nĩ mũgũthiĩ na mbere kũrũmĩrĩra motaaro maitũ
Yahweh arothiĩ na mbere gũtongoria ngoro cianyu wega nĩguo mwende Yahweh na mũgĩe na ũkirĩrĩria nĩ ũndũ wa Messiya.
Rĩu ariũ a Ithe witũ tũramũtaara thĩinĩ wa rĩĩtwa rĩa Mwathi witũ Yahshua Messiya, atĩ mũtige gũthiaga thiritũ na mũrũ wa Ithe witũ o wothe ũrathiĩ na mĩthiĩre ĩrĩa ĩtagĩrĩire na ũtarũmagĩrĩra ũrutani ũrĩa mwaamũkĩrire kuuma kũrĩ ithuĩ
Nĩ gũkorũo inyuĩ ene nĩ mũũĩ ũrĩa mwagĩrĩirũo nĩ kwĩgerekania na ithuĩ, tondũ tũtiathiaga na mĩthiĩre ĩtarĩ mĩagĩrĩru gatagatĩ-inĩ kanyu,
o na tũtiarĩaga irio cia mũndũ o na ũrĩkũ tũhũ. Ithenya rĩa ũguo, twarutaga wĩra mũritũ na wa mĩnoga ũtukũ na mũthenya nĩgetha tũtigatuĩke mũrigo mũritũ harĩ mũndũ o na ũmwe wanyu
Ti atĩ tũtirĩ na kĩhooto, ĩndĩ twendaga kwĩrutĩra ithuĩ ene tũrĩ kĩonereria harĩ inyuĩ nĩguo mwĩgerekanagie na ithuĩ
Rĩrĩa twarĩ hamwe na inyuĩ, nĩ twamũheaga watho ũyũ: “Mũndũ angĩkorũo ndarenda kũruta wĩra, o na kũrĩa ndakarĩe.”
Nĩ gũkorũo tũraigua atĩ harĩ amwe marathiĩ na mĩthiĩre ĩtarĩ mĩagĩrĩru gatagatĩ-inĩ kanyu, makaga kũruta wĩra o na hanini, ĩndĩ meingĩragia maũndũ-inĩ matamakoniĩ
Andũ ta acio-rĩ, tũramaatha na tũkamaringĩrĩria thĩinĩ wa Mwathi Yahshua Messiya atĩ marutage wĩra mekirĩire na marĩage irio iria o ene marutĩire wĩra.
No inyuĩ ariũ a Ithe witũ-rĩ, mũtikanakue ngoro harĩ gwĩkaga wega
No mũndũ o na ũrĩkũ angĩaga gwathĩkĩra kiugo gitũ kĩrĩa kĩrĩ marũa-inĩ maya, nĩ orotwo na andũ mamenyithio na mũtige gũthiaga thiritũ nake, nĩgetha aconoke
Ĩndĩ o na kũrĩ ũguo mũtikamũtue thũ, no thiĩi na mbere kũmũtaara o ta mũrũ wa Ithe witũ.
Rĩu-rĩ, Yahweh mwene thayũ aromũheaga thayũ hĩndĩ ciothe maũndũ-inĩ mothe. Yahweh aroikara hamwe na inyuĩ inyuothe.
Ici nĩ ngeithi ciakwa, niĩ Saũlũ, nyandĩkĩte na guoko gwakwa mwene, na nĩ rũũri marũa-inĩ makwa mothe; ũguo nĩguo nyandĩkaga.
Ũtugi mũnene wa Mwathi witũ Yahshua Messiya ũroikara hamwe na inyuĩ inyuothe.