Athesalonike wa Mbere 1

Nĩ ithuĩ Saũlũ na Sila, na Timotheo, Twandĩkĩra ũngano wa Athesalonike marũa maya ũrĩa ũrĩ thĩinĩ wa Yahweh Ithe witũ o na Mwathi Yahshua Messiya. Wega na thayũ wa Yahweh irogĩa na inyuĩ.

Nĩ tũcokagĩria Yahweh ngatho hĩndĩ ciothe nĩ ũndũ wanyu inyuothe, tũkĩmũgwetaga mahoya-inĩ maitũ.

Rĩrĩa tũkũmũhoera tũrĩ mbere ya Yahweh o we Ithe witũ-rĩ, nĩ tũririkanaga tũtegũtigithĩria wĩra wanyu ũrĩa uumanĩte na gwĩtĩkia, na kwĩnogia kwanyu kũrĩa kũrehagwo nĩ wendani, o na gũkirĩrĩria kwanyu, kũrĩa kuumanĩte na kĩĩrĩgĩrĩro thĩinĩ wa Mwathi witũ Yahshua Messiya.

Nĩgũkorwo, ariũ na aarĩ a Ithe witũ inyuĩ mwendetwo nĩ Yahweh, ithuĩ nĩ tũũĩ atĩ nĩ mwathurirwo nĩwe,

tondũ Ũhoro-ũrĩa-Mwega tũhunjagia, tũtiamũreheire ũrĩ o ciugo theri, no twamũreheire ũrĩ na hinya, na ũrĩ na Roho Mwamũre, o na ũrĩ na ihooto itangĩthanganio. Ningĩ inyuĩ nĩ mũũĩ ũrĩa twaikaraga na inyuĩ nĩ ũndũ wa kũmũguna.

Inyuĩ mwatuĩkire a kwĩgerekania na ithuĩ, o na mũgĩtuĩka a kwĩgerekania na Messiya, o na gũtuĩka mwarĩ na mĩnyamaro mĩingĩ, nĩ mwamũkĩrire ũhoro wake mũrĩ na gĩkeno kĩrĩa kĩheanagwo nĩ Roho Mwamũre.

Na nĩ ũndũ ũcio mũgĩtuĩka kĩonereria kũrĩ andũ arĩa othe metĩkĩtie kũu Makedonia, o na Akaia.

Naguo ũhoro wa Messiya nĩ wahunjire uumĩte kũrĩ inyuĩ, na to Makedonia na Akaia gwiki, no rĩrĩ, o na wĩtĩkio wanyu thĩinĩ wa Yahweh nĩ ũmenyekete kũndũ guothe. Nĩ ũndũ ũcio tũtibataire kuuga ũndũ ũhoro-inĩ ũcio,

nĩgũkorwo andũ o ene nĩo maheanaga ũhoro wa ũrĩa mwatũnyitire ũgeni. Nĩ maheanaga ũhoro wa ũrĩa mwagarũrũkĩire Yahweh, mũgĩtigana na mĩhianano nĩguo mũtungatagĩre Kĩhoti ũrĩa ũrĩ muoyo na ũrĩa wa ma,

na mwetagĩrĩre Mũriũ oime igũrũ, ũrĩa aariũkirie kuuma kũrĩ arĩa akuũ, nake nĩwe Yahshua, ũrĩa ũtũhonokagia kuuma kũrĩ mangʼũrĩ marĩa magoka.