Athesalonike wa Mbere 2

Inyuĩ ariũ na aarĩ a Ithe witũ, nĩ mũũĩ atĩ gũũka gwitũ kũrĩ inyuĩ gũtiarĩ gwa tũhũ.

Mbere ĩyo nĩ twathĩnirio na tũkĩrumwo rĩrĩa twarĩ kũu Filipi, o ta ũrĩa inyuĩ mũũĩ, no nĩ ũndũ wa gũteithio nĩ Yahweh witũ, nĩ tuomĩrĩirie na tũkĩmũhe Ũhoro-ũrĩa-Mwega, o na akorwo nĩ twakararirio mũno.

Nĩgũkorwo gũthaithana gwitũ gũtiumanĩte na ihĩtia, kana matanya ma maũndũ ma waganu, o na kana ma wara.

No rĩrĩ, ithuĩ nĩ kwaria twaragia ta andũ maamũrĩtwo nĩ Yahweh a kwĩhokerwo Ũhoro-ũrĩa-Mwega. Ithuĩ ti andũ tũrageria gũkenia, no nĩ Yahweh, o we ũgeragia ngoro ciitũ.

Inyuĩ nĩ mũũĩ atĩ ithuĩ ti ndeto cia kwĩyendereria twaragia, o na kana tũkahithĩrĩra ũhoro wa gũkorokera indo; Yahweh nĩwe mũira witũ.

Ithuĩ tũticaragia kũganwo nĩ andũ, arĩ inyuĩ kana mũndũ ũngĩ o wothe.

no nĩ twaikarire na inyuĩ tũhoreire, o ta ũrĩa nyina wa ciana nini amenyagĩrĩra ciana ciake mwene.

Nĩ tondũ wa ũrĩa twamwendete mũno, nĩ twakenagio nĩ kũgwatanĩra na inyuĩ, na to Ũhoro-inĩ-ũrĩa-Mwega wa Yahweh wiki, no nĩ twagwatanĩire mĩtũũrĩre-inĩ iitũ o nayo, tondũ nĩ mwatuĩkĩte andũ twendete mũno.

Ti-itherũ nĩ mũkũririkana, inyuĩ ariũ na aarĩ a Ithe witũ, wĩra witũ wa hinya na kwĩnogia gwitũ; twarutaga wĩra ũtukũ na mũthenya nĩguo tũtigatuĩke mũrigo harĩ mũndũ o na ũrĩkũ hĩndĩ ĩrĩa twamũhunjagĩria Ũhoro-ũrĩa-Mwega wa Yahweh.

Inyuĩ mũrĩ aira, o na Yahweh no mũira, ũrĩa twatũire na inyuĩ arĩa mwĩtĩkĩtie tũrĩ amũre, na tũrĩ athingu, na tũtarĩ na ũcuke.

Ningĩ nĩ mũũĩ atĩ twekaga mũndũ o mũndũ wanyu o ta ũrĩa ithe wa ciana ekaga ciana ciake mwene,

tũkamũũmagĩrĩria, na tũkamũhoreragia, o na tũkamũringagĩrĩria mũtũũre mĩtũũrĩre yaganĩrĩire na ũrĩa Yahweh endaga, o we ũmwĩtaga mũtonye thĩinĩ wa ũthamaki wake, na mũgĩe na riri wake.

O na ningĩ nĩ tũcokagĩria Yahweh ngatho tũtegũtigithĩria tondũ rĩrĩa mwamũkĩrire kiugo kĩa Yahweh, kĩrĩa mwaiguire kuuma kũrĩ ithuĩ, mũtiakĩamũkĩrire ta arĩ kiugo kĩa andũ, no mwakĩamũkĩrire ta kiugo kĩa Yahweh, na nĩ ma, ũguo nĩguo kĩrĩ, na nĩkĩo kĩrutaga wĩra thĩinĩ wanyu inyuĩ mwĩtĩkĩtie.

Nĩgũkorwo inyuĩ, ariũ na aarĩ a Ithe witũ, nĩ mwatuĩkire a kwĩgerekania na maũngano ma Yahweh marĩa marĩ thĩinĩ wa Messiya Yahshua kũrĩa Yahuda: Nĩ mwanyamaririo nĩ andũ a bũrũri wanyu na mĩnyamaro o ĩrĩa andũ a maũngano macio maanyamaragio nayo nĩ Ayahudi,

o arĩa moragire Mwathi Yahshua, na makĩũraga anabii, o na ithuĩ magĩtũingata. Nĩ marakaragia Yahweh, na nĩ marĩ ũthũ na andũ othe

nĩ ũndũ wa kũgeria gũtũgiria tũtikahunjĩrie andũ-a-Ndũrĩrĩ ũhoro nĩgetha mahonoke. Ũguo nĩguo meyongagĩrĩra mehia makamaiyũrĩrĩra. Namo mangʼũrĩ ma Yahweh nĩ mamakinyĩire.

No rĩrĩ, ariũ na aarĩ a Ithe witũ, hĩndĩ ĩrĩa twatigithanirio na inyuĩ gwa kahinda kanini-rĩ, (ha ũhoro wa mwĩrĩ, no ti wa ngoro), nĩ twerutanĩirie na kĩyo kĩnene nĩgetha tuonane na inyuĩ tondũ nĩ twamwĩriragĩria mũno.

Nĩgũkorwo nĩ twendete mũno gũũka kũrĩ inyuĩ, na makĩria niĩ Saũlũ, nĩ ndageririe maita maingĩ no Shaitani nĩ atũgiririe

Nĩ ũndũ-rĩ, kĩĩrĩgĩrĩro giitũ gĩkĩrĩ kĩrĩkũ, kana gĩkeno giitũ, kana thũmbĩ ĩrĩa tũngĩĩraha nayo mbere ya Mwathi witũ Yahshua rĩrĩa agoka? Githĩ ti inyuĩ

Ti-itherũ, inyuĩ nĩ inyuĩ riri witũ na gĩkeno giitũ.