Athesalonike wa Mbere 3

Nĩ ũndũ ũcio, rĩrĩa twaremirwo nĩ gũkirĩrĩria-rĩ, nĩ tuonire arĩ wega tũtigwo tũrĩ ithuiki kũu Athene.

Tũgĩgĩtũma Timotheo ũrĩa mũrũ wa Ithe witũ, na ndungata ya Yahweh hamwe na ithuĩ ya kũhunjia Ũhoro-ũrĩa-Mwega wa Messiya, nĩguo amwĩkĩre hinya, na amũũmĩrĩrie wĩtĩkio-inĩ wanyu,

nĩguo gũtikagĩe mũndũ ũngĩagagio nĩ magerio macio. Inyuĩ nĩ mũũĩ wega atĩ nĩmo twathĩrĩirio

Ti-itherũ o na hĩndĩ ĩrĩa twarĩ na inyuĩ nĩ twamwĩraga kaingĩ atĩ no nginya tũnyarirwo. O ta ũrĩa mũũĩ atĩ ũguo noguo gwacokire gũgĩtuĩka.

Nĩ ũndũ ũcio, rĩrĩa ndaremirwo nĩ gũkirĩrĩria rĩngĩ-rĩ, ngĩtũmana nĩguo menye ũhoro wa wĩtĩkio wanyu. Nĩgũkorwo nĩ ndetigagĩra gũtigakorwo atĩ hihi mũgerania nĩ amũgeretie, naguo wĩra witũ ũtuĩke wa tũhũ.

No rĩrĩ, rĩu Timotheo nĩ okĩte kũrĩ ithuĩ oimĩte kũrĩ inyuĩ, na agatũrehere ũhoro mwega ũkoniĩ wĩtĩkio na wendani wanyu. Nĩ atwĩrĩte atĩ nĩ mũtũririkanaga hĩndĩ ciothe mũkenete, na atĩ nĩ mwĩriragĩria gũtuona, o ta ũrĩa o na ithuĩ twĩriragĩria kũmuona

Nĩ ũndũ ũcio, ariũ na aarĩ a Ithe witũ-rĩ, o na tũrĩ na mĩnyamaro na mathĩna nĩ tuomĩrĩirio twaigua ũhoro wanyu nĩ tondũ wa gwĩtĩkia kũu kwanyu.

Nĩgũkorwo rĩu tũgũtũũra muoyo kũna, kuona atĩ nĩ mwĩhandĩte wega thĩinĩ wa Yahweh.

Tũngĩhota atĩa gũcokeria Yahweh ngatho cia kũigana nĩ ũndũ wanyu, tondũ wa gĩkeno kĩrĩa gĩothe tũrĩ nakĩo mbere ya Kĩhoti witũ nĩ ũndũ wanyu?

Nĩ tũhoyaga ũtukũ na mũthenya na kĩyo kĩingĩ nĩgetha tũkonana na inyuĩ rĩngĩ na tũmũrehere kĩrĩa mũtarĩ nakĩo ũhoro-inĩ wa gwĩtĩkia kwanyu.

Rĩu-rĩ, Yahweh mwene, o Ithe witũ, na Mwathi witũ Yahshua, marotũhingũrĩra njĩra tũhote gũũka kũrĩ inyuĩ.

Yahweh arotũma wendani wanyu wongerereke na ũiyũrĩrĩre harĩ o mũndũ na ũrĩa ũngĩ, na harĩ andũ arĩa angĩ othe, o ta ũrĩa o na ithuĩ tũmwendete.

Ningĩ aroĩkĩra ngoro cianyu hinya nĩgetha mũgaakorwo mũtarĩ na ũcuke, na mũrĩ aamũre mbere ya Yahweh, o we Ithe witũ, hĩndĩ ĩrĩa Mwathi witũ Yahshua agoka hamwe na andũ ake arĩa aamũre othe.