Athesalonike wa Mbere 4

Naguo ũhoro wa kũrigĩrĩria, ariũ na aarĩ a Ithe witũ-rĩ, nĩ atĩ nĩ twamũrutire ũhoro wa mũtũũrĩre, ũrĩa ũkenagia Yahweh, na noguo mũtũũraga mwĩkaga. Rĩu tũkũmũũria na tũkamũringĩrĩria thĩinĩ wa Mwathi Yahshua atĩ mũkĩragĩrĩrie gwĩkaga o ũguo.

Nĩgũkorwo nĩ mũũĩ maũndũ marĩa twamũtaarire namo, tũrĩ na ũhoti wa Mwathi Yahshua.

Tondũ rĩrĩ, ũndũ ũrĩa Yahweh endete nĩ atĩ mũtuĩke andũ aamũre: atĩ mwĩthemage ũmaraya;

na atĩ o ũmwe wanyu amenye gwatha mwĩrĩ wake mwene ũikarage ũrĩ mwamũre na akĩũtĩaga,

atarĩ na merirĩria ma mwĩrĩ ta andũ a ndũrĩrĩ arĩa matoĩ Yahweh;

na atĩ ha ũhoro wa maũndũ macio, gũtigakorwo mũndũ o na ũrĩkũ ũngĩhĩtĩria mũrũ na mwarĩ wa ithe na njĩra ya kũmũtunya indo ciake na wara, kana amwĩke ũũru. Yahweh nĩ akaherithia andũ nĩ ũndũ wa mehia mothe ta macio, o ta ũrĩa tũrĩkĩtie kũmwĩra na tũkamũkaania.

Tondũ Yahweh ndatwĩtĩire maũndũ ma waganu, no aatwĩtire nĩguo tũtũũre mũtũũrĩre wa kũmwĩyamũrĩra.

Nĩ ũndũ ũcio-rĩ, mũndũ ũrĩa ũkũregana na ũrutani ũyũ ti mũndũ araregana nake no nĩ Yahweh, ũrĩa ũmũheaga inyuĩ Roho wake Mwamũre.

Na rĩu-rĩ, harĩ ũhoro wa kwendana na ariũ na aarĩ a Ithe witũ-rĩ, tũtibataire kũmwandĩkĩra nĩ ũndũ inyuĩ ene nĩ mũrutĩtwo kwendanaga nĩ Yahweh.

Na ti-itherũ, nĩ mwendete ariũ na aarĩ a Ithe witũ othe arĩa marĩ Makedonia guothe. No nĩ tũkũmũringĩrĩria inyuĩ ariũ na aarĩ a Ithe witũ, atĩ mũkĩragĩrĩrie gwĩka ũguo makĩria.

Na ningĩ atĩrĩ, atĩ mwĩrutage gũkira, na mũhangʼagĩre o maũndũ marĩa mamũkoniĩ, na mũrutage wĩra na moko manyu, o ta ũrĩa twamwĩrire,

nĩgetha mũtũũrĩre wanyu wa o mũthenya, ũtũme mũheagwo gĩtĩo nĩ andũ arĩa matarĩ a thiritũ yanyu, na nĩgetha mũtigatuĩke mũrigo kũrĩ mũndũ o na ũrĩkũ.

No rĩrĩ, ariũ na aarĩ a Ithe witũ, tũtikwenda mũikarage mũtoĩ ũhoro wa andũ arĩa makomete, kana mũigue kĩeha ta andũ arĩa angĩ matarĩ na kĩĩrĩgĩrĩro.

Nĩ twĩtĩkĩtie atĩ Yahshua nĩ akuire na akĩriũka, na nĩ ũndũ ũcio nĩ twĩtĩkĩtie atĩ Yahweh nĩ akarehanĩria Yahshua hamwe na andũ arĩa makomete marĩ thĩinĩ wake.

Kũringana na kiugo kĩa Yahweh we mwene, tũkũmwĩra atĩ ithuĩ arĩa tũrĩ muoyo, arĩa tũtigĩtwo nginya rĩrĩa agacoka tũtigatongoria arĩa marĩkĩtie gũkoma.

Tondũ Yahshua we mwene nĩ agaikũrũka oimĩte igũru agĩĩtanaga na kayũ, na mũgambo wa mũraika ũrĩa mũnene, na coro wa Yahweh: Nao arĩa makuĩte me thĩinĩ wa Messiya nĩo makamba kũriũka.

Thutha wa ũguo, ithuĩ arĩa tũgaakorwo tũrĩ muoyo na tũtigaire-rĩ, nĩ tũkoyanĩrio hamwe nao matu-inĩ, tũgacemanie na Yahshua rĩera-inĩ. Na nĩ ũndũ ũcio tũgaatũũrania na Messiya nginya tene

Nĩ ũndũ ũcio, ũmanagĩrĩriai mũndũ na ũrĩa ũngĩ na ciugo icio.