Athesalonike wa Mbere 5

No rĩrĩ ariũ na aarĩ a Ithe Witũ, ha ũhoro wa mahinda na ciathĩ-rĩ, mũtirĩ na bata mũtinde mũkĩandĩkĩrwo.

Nĩ gũkorwo nĩ mũũĩ wega inyuĩ ene atĩ mũthenya wa Yahweh nĩ ũgoka o ta ũrĩa mũici okaga ũtukũ.

Hĩndĩ ĩrĩa andũ moigaga atĩrĩ: “Nĩ kũrĩ thayũ, na gũtirĩ buruga-rĩ!” O hĩndĩ ĩyo noguo makahobanĩrio nĩ kwanangwo kwa narua, o ta ũrĩa mũtumia wĩ na ihu akoragĩrĩrwo nĩ ruo rwa kũrũmwo; nao matikahonoka o na atĩa.

No inyuĩ ariũ a Ithe Witũ-rĩ, mũtikĩrĩ nduma-inĩ, atĩ mũthenya ũcio ũmũkorerere ta mũici;

nĩ gũkorwo inyuothe mũrĩ ciana cia ũtheri na ciana cia mũthenya. Tũtikĩrĩ a ũtukũ kana a nduma;

nĩ ũndũ ũcio nĩ tũtigei gũkoma toro ta acio angĩ, no makĩria nĩ tũikarage twĩiguĩte na tũterigĩtwo.

Nĩ gũkorwo andũ arĩa makomaga toro-rĩ, makomaga ũtukũ; nao andũ arĩa arĩĩu, marĩagwo ũtukũ.

No ithuĩ-rĩ, kuona atĩ tũrĩ a mũthenya, nĩ tũikaragei tũterigĩtwo, twĩyohete gako ga kũgitĩra gĩthũri karĩa ka wĩtĩkio, na ka wendani; na tũgekĩra ũhoro wa kwĩrĩgĩrĩra ũhonokio ta arĩ gĩtukũ.

Tondũ Yahweh ndaatũtuire a kũrakarĩrwo, no gũtũtua aatũtuire a kũhonokio nĩ ũndũ wa Mwathi witũ Yahshua Messiya,

o we wakuire nĩ ũndũ witũ, nĩgetha tũgatũũrania nake, o na tũngĩkorwo twĩiguĩte kana tũkomete.

Tondũ wa ũguo-rĩ, ũmanagĩrĩriai o mũndũ na mũndũ ũrĩa ũngĩ, na mwĩkanagĩre hinya, o ta ũrĩa mũtũire mwĩkaga.

Na rĩrĩ ariũ na aarĩ a Ithe Witũ, twamũthaitha atĩ mũtĩage andũ arĩa mamũnogagĩra makĩmũrutĩra wĩra, o arĩa matuĩtwo arori anyu maũndũ-inĩ ma Yahweh, makamũtaaraga,

na mũmekagĩrĩre mũno makĩria, mũkĩmendaga, nĩ ũndũ wa wĩra ũcio marutaga. Gĩagai na ũiguano thiritũ-inĩ yanyu.

Na ningĩ twamũhatĩrĩria, ariũ na aarĩ a Ithe Witũ, atĩrĩ, atĩ mũtaarage andũ arĩa mathiaga na mĩthiĩre itaagĩrĩire, na mũũmagĩrĩrie arĩa ahũthũ ngoro, na mũtiiragĩrĩre arĩa maagĩte hinya, nao othe-rĩ, mũtige kũmathethũkĩra.

Menyai mũndũ o na ũrĩkũ akerĩhĩria ũũru na ũũru kũrĩ mũndũ ũngĩ; no hingo ciothe mũrũmanagĩrĩrie gwĩkana wega inyuĩ-ene, o na gwĩkaga andũ othe wega.

Kenagai hingo ciothe;

hoyagai mũtegũtigithĩria;

maũndũ-inĩ mothe-rĩ, cokagĩriai Yahweh ngatho; nĩ ũndũ ha ũhoro wanyu-rĩ, ũguo noguo Yahweh endaga, e thĩinĩ wa Messiya Yahshua.

Mũtikanahorie mwaki wa Roho;

mũtikanararie mohoro marĩa marathagwo,

roranagiai maũndũ mothe; mũrũmagie o ũndũ wothe ũrĩa mwega,

na mũthemage ũndũ o wothe ũngĩonwo wĩ mũũru.

Nake Yahweh mwene thayũ we mwene aromwamũra amũtherie kũna. Namo maroho manyu, na ngoro cianyu, o na mĩĩrĩ yanyu iroikario irĩ ng’ima, na igaakorwo itarĩ na ũcuke, hĩndĩ ĩrĩa Mwathi witũ Yahshua Messiya akoneka.

Ũcio ũmwĩtaga nĩ wa kwĩhokeka, nake nĩ akahingia ũhoro ũcio.

Ariũ na aarĩ a Ithe Witũ, tũhoyagĩrei

Geithiai ariũ na aarĩ a Ithe Witũ othe na ngeithi nyamũre cia kũmumunyana.

Nĩ ndamwĩhĩtithia na Yahweh atĩ mũtikage gũthomera ariũ na aarĩ a Ithe Witũ othe aamũre marũa maya.

Wega wa Mwathi witũ Yahshua Messiya ũrogĩa na inyuĩ.