Atĩĩrĩrĩri Bũrũri 11
Na rĩrĩ, Jefitha Mũgileadi aarĩ njamba ya ita yarĩ hinya; aarĩ mũrũ wa mũmaraya, na Gileadi nĩwe warĩ ithe wa Jefitha
No mũtumia wa Gileadi o nake nĩ aamũciarĩire ariũ. Na rĩrĩa ariũ acio a mũtumia wake maanenehire, makĩingata Jefitha makĩmwĩra ũũ: “Ndũkaagĩa na igai gatagatĩ-inĩ ka andũ a nyũmba ya baba, nĩ gũkorũo wee ũrĩ mũrũ wa mũtumia ũngĩ.”
Nĩ ũndũ ũcio Jefitha akĩũrĩra ariũ a ithe na akĩambĩrĩria gũikara bũrũri-inĩ wa Tobu. Nao arũme matarĩ kĩene, mĩũkũ, makĩĩgwatania na Jefitha na makĩmũrũmĩrĩra.
Thutha wa ihinda, ciana cia Aamoni igĩtharĩkĩra Isiraeli
Na rĩrĩa ciana cia Aamoni ciatharĩkĩire Isiraeli, o rĩo athuri a Gileadi magĩthiĩ kũgĩĩra Jefitha oime bũrũri wa Tobu
Makĩra Jefitha ũũ: “Ũka ũtuĩke mũnene witũ wa mbũtũ, nĩgetha tũhote kũrũa na ciana cia Aamoni.”
No Jefitha akĩra athuri acio a Gileadi atĩrĩ: “Na githĩ ti inyuĩ mwamenire nginya mũkĩnyingata nyũmba-inĩ ya baba? Nĩ kĩĩ gĩatũma mũũke kũrĩ niĩ rĩu mũrĩ na mĩtangĩko?”
Nĩ ũndũ ũcio athuri acio a Gileadi makĩra Jefitha ũũ: “Nĩkĩo rĩu twacoka kũrĩ wee. Ũngĩtĩkĩra tũthiĩ nawe na ũrũe na ciana cia Aamoni, nĩ ũgũtuĩka mũtongoria wa aikari othe a Gileadi.”
Nake Jefitha akĩra athuri acio a Gileadi atĩrĩ: “Angĩkorũo nĩ mũkũnjokia ngarũe na Aamoni na Yahweh andũĩrĩre amahoote, hĩndĩ ĩyo nĩ ngũtuĩka mũtongoria wanyu!”
Nao athuri acio a Gileadi makĩra Jefitha ũũ: “Yahweh arotuĩka mũira gatagatĩ-inĩ gaitũ angĩkorũo nĩ tũkwaga gwĩka ũguo woiga.”
Kwoguo Jefitha agĩthiĩ hamwe na athuri acio a Gileadi, na andũ makĩmũtua mũtongoria wao na mũnene wa mbũtũ. Nake Jefitha agĩcokera ciugo ciake ciothe mbere ya Yahweh arĩ Mizipa.
Jefitha agĩcoka agĩtũma atũmwo kũrĩ mũthamaki wa Aamoni mamũũrie ũũ: “Nĩ kĩĩ ũranjũria tondũ ũũkĩte gũtharĩkĩra bũrũri wakwa?”
Nĩ ũndũ ũcio mũthamaki wa Aamoni akĩra atũmwo acio a Jefitha atĩrĩ: “Nĩ tondũ andũ a Isiraeli mooire bũrũri wakwa rĩrĩa mooimire Misiri, kuuma Arinoni nginya Jaboku gũthiĩ o nginya Jorodani. Rĩu cokia bũrũri ũcio na thayũ.”
No Jefitha agĩtũma atũmwo macoke kũrĩ mũthamaki wa Aamoni
mamwĩre atĩrĩ:
nĩ gũkorũo rĩrĩa andũ a Isiraeli mooimire Misiri, maatuĩkanĩirie werũ-inĩ magĩthiĩ o nginya Iria-inĩ Itune na magĩkinya Kadeshi
Isiraeli agĩcoka agĩtũma atũmwo kũrĩ mũthamaki wa Edomu mamwĩre atĩrĩ: “Ndagũthaitha ũtwĩtĩkĩrie tũtuĩkanĩrie bũrũri-inĩ waku,” no mũthamaki wa Edomu akĩrega gũthikĩrĩria. Ningĩ magĩtũma ndũmĩrĩri o ĩyo kũrĩ mũthamaki wa Moabi, no ndaigana gwĩtĩkĩra. Nĩ ũndũ ũcio andũ a Isiraeli magĩthiĩ o na mbere gũikara Kadeshi.
Hĩndĩ ĩyo maatuĩkanĩirie werũ-inĩ, maathiũrũrũkire bũrũri wa Edomu na bũrũri wa Moabi. Magĩthiĩ magereire mwena wa irathĩro wa bũrũri wa Moabi na makĩamba hema ciao gĩcigo-inĩ kĩa Arinoni; matiakĩrire mũhaka wa Moabi, nĩ gũkorũo Arinoni nĩkuo kwarĩ mũhaka wa Moabi.
“‘Thutha ũcio Isiraeli agĩtũma atũmwo kũrĩ Sihoni mũthamaki wa Aamori, mũthamaki wa Heshiboni, na Isiraeli agĩkĩmwĩra atĩrĩ: “Ndagũthaitha ũtwĩtĩkĩrie tũtuĩkanĩrie bũrũri-inĩ waku tũthiĩ bũrũri-inĩ witũ.”
No Sihoni akĩaga kwĩhoka andũ a Isiraeli akĩrega mahĩtũkĩre bũrũri-inĩ wake, nĩ ũndũ ũcio Sihoni agĩcokanĩrĩria andũ ake othe hamwe, na makĩamba hema Jahazu na magĩtharĩkĩra andũ a Isiraeli
Nĩ ũndũ ũcio Yahweh Kĩhoti wa Isiraeli akĩneana Sihoni na andũ ake othe guoko-inĩ kwa Isiraeli na makĩmatooria, na andũ a Isiraeli makĩĩgwatĩra bũrũri wothe wa Aamori, aikari a bũrũri ũcio
Kwoguo makĩĩgwatĩra gĩcigo gĩothe kĩa Aamori kuuma Arinoni nginya Jaboku na kuuma werũ-inĩ nginya Jorodani.
“‘Yahweh Kĩhoti wa Isiraeli nĩwe waingatire Aamori mehere mbere ya andũ ake Isiraeli, rĩu-rĩ, hihi ũrenda kũingata ciana cia Isiraeli
Na githĩ ndwĩgwatagĩra kĩrĩa gĩothe Kemoshu hoti yaku yakũhe wĩgwatĩre? Nĩ ũndũ ũcio mũndũ ũrĩa wothe Yahweh Kĩhoti witũ aingatĩte ehere mbere itũ nowe tũkũingata
Rĩu-rĩ, wee ũkĩrĩ mwega gũkĩra Balaki mũrũ wa Ziporu, mũthamaki wa Moabi? Hihi nĩ aagianire na Isiraeli, kana hihi akĩrũa nao
Rĩrĩa andũ a Isiraeli maaikaraga itũũra rĩa Heshiboni na taũni ciakuo iria irĩthiũrũrũkĩirie na itũũra rĩa Aroeru na taũni ciakuo iria irĩthiũrũrũkĩirie na matũũra mothe marĩa marĩ hũgũrũrũ-inĩ cia Arinoni mĩaka 300, nĩ kĩĩ kĩagiririe woe matũũra macio hĩndĩ ĩyo
Niĩ ndikwĩhĩirie, no wee nĩ wĩkĩte ũũru nĩ ũndũ wa gũũtharĩkĩra. Yahweh Mũtuanĩri Ciira arotuithania ciira ũmũthĩ gatagatĩ-inĩ ga ciana cia Isiraeli na ciana cia Amoni.’”
Ĩndĩ mũthamaki wa Aamoni ndaigana gũthikĩrĩria ndũmĩrĩri ĩyo Jefitha aamũtũmĩire.
Naguo roho wa Yahweh ũgĩũka igũrũ rĩa Jefitha, agĩgĩtuĩkanĩria Gileadi na Manase, athiĩte Mizipe ya Gileadi, na kuuma Mizipe ya Gileadi agĩthiĩ na mbere na rũgendo o nginya kũrĩ Aamoni.
Jefitha agĩcoka akĩĩhĩta mwĩhĩtwa harĩ Yahweh akiuga ũũ: “Angĩkorũo nĩ ũkũneana Aamoni guoko-inĩ gwakwa,
mũndũ ũrĩa ũkuuma mũrango-inĩ wa nyũmba yakwa kũndũnga ndacoka na thayũ kuuma kũrĩ Aamoni egũtuĩka wa Yahweh, na nĩ ngũmũruta arĩ igongona rĩa njino.”
Nĩ ũndũ ũcio Jefitha agĩthiĩ kũrũa na Aamoni, na Yahweh akĩmaneana guoko-inĩ gwake
Akĩmoraga njũragano yarĩ nene mũno kuuma Aroeru gũthiĩ nginya Minithu—matũũra 20—na gũthiĩ nginya Abeli-keramimu. Na kwoguo ciana cia Isiraeli igĩtooria Aamoni.
Thutha ũcio Jefitha agĩkinya mũciĩ gwake Mizipa, na rĩrĩ, mũirĩtu wake agĩũka kũmũtũnga akĩinagia manyanga agĩthũngũthaga! Ũcio nowe mwana ũrĩa Jefitha aarĩ nake, aarĩ wa mũmwe. Tiga we, ndaarĩ na mwana ũngĩ wa kahĩĩ kana wa kairĩtu
Rĩrĩa oonire mũirĩtu ũcio wake, agĩtembũra nguo ciake akiuga atĩrĩ: “Wũi mwarĩ wakwa! Nĩ wanjũraga ngoro, nĩ gũkorũo nĩwe ngũneana. Nĩ ndumũrĩte kanua gakwa harĩ Yahweh na ndingĩhota kwĩricũkwo.”
No we akĩmwĩra ũũ: “Baba, angĩkorũo nĩ ũtumũrĩte kanua gaku harĩ Yahweh, njĩka o ta ũrĩa wĩranĩire, nĩ gũkorũo Yahweh nĩ akũrĩhĩirie harĩ thũ ciaku, Aamoni.”
Agĩcoka akĩra ithe atĩrĩ: “Reke ũndũ ũyũ wĩkwo harĩ niĩ: Reke ngorũo ndĩ wiki ihinda rĩa mĩeri ĩĩrĩ, na ũnjĩtĩkĩrie thiĩ irĩma-inĩ, thiĩ hamwe na airĩtu arata akwa nĩgetha ngarĩre nĩ gũkorũo ngũtũũra ndĩ gathirange.”
Nĩ ũndũ ũcio ithe akĩmwĩra ũũ: “Thiĩ!” Agĩkĩreka athiĩ kwa ihinda rĩa mĩeri ĩĩrĩ, agĩgĩthiĩ irĩma-inĩ hamwe na arata ake kũrĩra tondũ angĩatũũrire arĩ gathirange
Thutha wa mĩeri ĩĩrĩ, agĩcoka kũrĩ ithe, na ithe akĩhingia mwĩhĩtwa ũrĩa eehĩtĩte wĩgiĩ mũirĩtu wake. Mũirĩtu ũcio wake ndaigana gũkoma na mũndũrũme. Na ũndũ ũyũ ũgĩtuĩka mũtugo wa kũrũmĩrĩrũo thĩinĩ wa Isiraeli:
O mwaka o mwaka airĩtu a Isiraeli nĩ maathiaga kũrĩ mwarĩ wa Jefitha Mũgileadi kũmũgaathĩrĩria, thikũ inya o mwaka.