Atĩĩrĩrĩri Bũrũri 20
Nĩ ũndũ ũcio, ciana cia Isiraeli ciothe kuuma Dani nginya Biri-shiba na kuuma bũrũri wa Gileadi ikiumagara, na kĩrĩndĩ kĩu gĩothe gĩkĩũngana hamwe mbere ya Yahweh kũu Mizipa
Anene a andũ na mĩhĩrĩga yothe ya Isiraeli magĩkĩrũgama handũ hao kĩũngano-inĩ kĩa andũ a Kĩhoti—thigari 400,000 cia gũthiĩ na magũrũ irĩ na hiũ cia njora.
Abenjamini magĩkĩigua atĩ arũme a Isiraeli nĩ mambatĩte Mizipa.
Nĩ ũndũ ũcio mũndũ ũrĩa Mũlawii mũthuri wa mũtumia ũcio woragĩtwo akĩmacokeria atĩrĩ: “Ndĩrathiĩte Gibea ya Benjamini tũrĩ na thuriya yakwa nĩguo tũraarĩrĩre kuo
Nao aikari a Gibea maroka gũũtharĩkĩra na marathiũrũrũkĩria nyũmba ĩyo ũtukũ. Marendaga kũnjũraga, no handũ ha ũguo maranyita thuriya yakwa kĩa hinya, na ĩrakua
Nĩ ũndũ ũcio ndĩroya kĩimba gĩa thuriya yakwa ndĩragĩtinangia na ndĩratũma icunjĩ icio kũndũ guothe igai-inĩ rĩa Isiraeli, tondũ nĩ gĩĩko gĩa thoni na gĩa gĩconoko mareekire thĩinĩ wa Isiraeli
Inyuothe andũ aya a Isiraeli, heanai ũtaaro wanyu na rĩciria rĩanyu ũndũ-inĩ ũyũ.”
Nao andũ acio othe makĩarahũka marĩ hamwe makiuga atĩrĩ: “Gũtirĩ mũndũ o na ũmwe witũ ũgũthiĩ hema-inĩ yake kana acoke gwake mũciĩ
Na ũũ nĩguo tũgwĩka itũũra rĩa Gibea: Tũkwambata kũrĩtharĩkĩra kũringana na ũrĩa tũgũcuka mĩtĩ
Tũkuoya arũme 10 harĩ arũme 100 kuuma mĩhĩrĩga yothe ya Isiraeli, na arũme 100 harĩ 1,000, na arũme 1,000 harĩ 10,000 nĩgetha macokanĩrĩrie irio cia mbũtũ, nĩguo yoe ikinya harĩ Gibea ya Benjamini, nĩ ũndũ wa gĩĩko kĩu gĩa gĩconoko mekĩte thĩinĩ wa Isiraeli.”
Nĩ ũndũ ũcio arũme othe a Isiraeli makĩũngana hamwe nĩguo mokĩrĩre itũũra rĩu marĩ na ũrũmwe.
Mĩhĩrĩga ya Isiraeli ĩgĩcoka ĩgĩtũma arũme kũrĩ arũme othe a mũhĩrĩga wa Benjamini makameere atĩrĩ: “Nĩ ũndũ ũrĩkũ ũyũ mũũru ũguo wĩkĩkĩte gatagatĩ-inĩ kanyu
Tũnengerei arũme acio matarĩ kĩene a Gibea, nĩgetha tũmorage tweherie kĩndũ kĩũru gatagatĩ-inĩ ka Isiraeli.” No ciana cia Benjamini ikĩrega gũthikĩrĩria ciana cia Isiraeli icio ariũ a ithe wao.
Ciana cia Benjamini igĩcoka ikiuma matũũra-inĩ ikĩũngana hamwe kũu Gibea nĩguo ithiĩ ikarũe na arũme a Isiraeli
Mũthenya ũcio Abenjamini magĩta arũme 26,000 kuuma matũũra-inĩ mao marĩ na hiũ cia njora, hatatarĩtwo arũme 700 arĩa maathuurĩtwo kuuma Gibea
Mbũtũ-inĩ ĩyo kwarĩ na arũme 700 maahũthagĩra guoko kwa ũmotho. Na harĩ andũ acio o mũndũ nĩ aahotaga gũikia ihiga na kĩgũtha ũndũ angĩringa rũcuĩrĩ rũmwe na ndahĩtie.
Nao arũme a Isiraeli magĩta arũme 400,000 marĩ na hiũ cia njora, na o ũmwe wao aarĩ njamba ya ita yarĩ na ũmenyeru, no matietire arũme a Benjamini
Magĩũkĩra makĩambata Betheli gũtuĩria ũhoro harĩ Kĩhoti. Andũ acio a Isiraeli magĩkĩũria atĩrĩ: “Nũũ gatagatĩ-inĩ gaitũ wagĩrĩirũo gũtongoria mbaara-inĩ kũrũa na Abenjamini?” Yahweh akĩmacokeria ũũ: “Yahuda nĩwe ũgũtongoria.”
Thutha ũcio Ciana cia Isiraeli igĩũkĩra rũcinĩ na ikĩamba hema nĩguo itharĩkĩre Gibea.
Arũme a Isiraeli magĩgĩthiĩ kũrũa na Benjamini; magĩthiĩ mebangĩte marĩ mbũtũ makamatharĩkĩre kũu Gibea
Nao Abenjamini makiuma kũu Gibea makĩũraga arũme 22,000 a Isiraeli mũthenya ũcio
O na kũrĩ ũguo, mbũtũ ya arũme a Isiraeli ĩkĩonania ũcamba na o rĩngĩ ĩkĩĩbanga o hau yarĩ o ta mũthenya wa mbere
Ciana cia Isiraeli igĩcoka ikĩambata ikĩrĩra irĩ mbere ya Yahweh o nginya hwaĩ-inĩ na igĩtuĩria ũhoro harĩ Yahweh ikĩũria ũũ: “Tũthiĩ rĩngĩ kũrũa na ariũ a ithe witũ, ciana cia Benjamini?” Nake Yahweh akĩmeera atĩrĩ: “Ambatai mũkarũe nao.”
Ciana cia Isiraeli igĩgĩkuhĩrĩria ciana cia Benjamini mũthenya wa kerĩ
Nao andũ Abenjamini makiuma kũu Gibea magatũngane nao mũthenya wa kerĩ na makĩũraga ciana cia Isiraeli ingĩ 18,000, ciothe irĩ na hiũ cia njora
Nĩ ũndũ ũcio arũme othe a ciana cia Isiraeli makĩambata Betheli. Makĩrĩra na magĩikara thĩ hau mbere ya Yahweh, makĩĩhinga kũrĩa mũthenya ũcio o nginya hwaĩ-inĩ na makĩruta magongona ma njino hamwe na magongona ma ũiguano hau mbere ya Yahweh
Thutha ũcio arũme acio a ciana cia Isiraeli magĩtuĩria ũhoro harĩ Yahweh, nĩ gũkorũo ithandũkũ rĩa kĩrĩkanĩro gĩa Kĩhoti ũrĩa wa ma rĩarĩ kũu matukũ-inĩ macio
Na rĩrĩ, Phinehasi mũrũ wa Eliazaru, mũrũ wa Haruni, nĩwe watungataga mbere yarĩo matukũ-inĩ macio. Magĩkĩũria atĩrĩ: “Tũthiĩ o rĩngĩ tũkarũe na ariũ a ithe witũ, arũme a ciana cia Benjamini, kana tũtige?” Yahweh akĩmacokeria ũũ: “Ambatai, tondũ rũciũ nĩ ngaamaneana guoko-inĩ kwanyu.”
Ciana cia Isiraeli ikĩbanga arũme nĩguo mamohie mathiũrũrũkĩirie itũũra rĩa Gibea.
Ciana cia Isiraeli igĩkĩambata irũe na ciana cia Benjamini mũthenya wa gatatũ, makĩĩbanga marĩ mbũtũ nĩguo matharĩkĩre Gibea o ta maita macio mangĩ
Rĩrĩa ciana cia Benjamini cioimire nĩguo itũngane na mbũtũ ĩyo, ikĩgucĩrĩrio kũraihu na itũũra rĩu. Na o ta maita macio mangĩ, ikĩambĩrĩria gũtharĩkĩra arũme acio ikĩmoragagĩra barabara-inĩ iria nene, ĩmwe nĩ ĩrĩa yambatĩte Betheli nayo ĩyo ĩngĩ nĩ ĩrĩa ĩthiĩte Gibea, ikĩũraga arũme ta 30 a Isiraeli kũu werũ-inĩ
Nĩ ũndũ ũcio Ciana cia Benjamini ikĩĩrana atĩrĩ: “Nĩ kũmatooria tũramatooria o ta mbere.” No ciana cia Isiraeli ikĩĩrana ũũ: “Tũkũũra tũthiĩ tũmagucĩrĩirie kũraihu na itũũra rĩu o nginya barabara-inĩ iria nene.”
Kwoguo arũme othe a ciana cia Isiraeli makĩarahũka kuuma harĩa maarĩ na makĩĩbanga marĩ mbũtũ kũu Baali-tamaru; nacio ciana cia Isiraeli irĩa ciehithĩte ikiumĩra hau ciehithĩte hakuhĩ na Gibea
Nĩ ũndũ ũcio arũme 10,000 arĩa maathuurĩtwo kuuma harĩ andũ othe a Isiraeli magĩthiĩ mbere ya itũũra rĩa Gibea, na mbaara ĩyo yarĩ nene mũno. No ciana cia Benjamini itiamenyaga atĩ thĩna warĩ hakuhĩ gũcikora.
Yahweh agĩtooria andũ a Benjamini marĩ mbere ya andũ a Isiraeli, na mũthenya ũcio ciana cia Isiraeli ikĩũraga arũme 25,100 kũu Benjamini, othe marĩ na hiũ cia njora.
Ĩndĩ Abenjamini meeciragia atĩ arũme a ciana cia Isiraeli nĩ megũtoorio rĩrĩa moorire kuuma Benjamini, no moorire tondũ nĩ meehokete arũme arĩa meehithĩte hakuhĩ na Gibea
Arũme acio meehithĩte meekire na ihenya makĩguthũka merekeire Gibea. Arũme acio magĩcoka makĩnyagana kũu makĩniina itũũra rĩu rĩothe na rũhiũ rwa njora.
Na rĩrĩ, arũme a ciana cia Isiraeli nĩ maabangĩte na arũme acio meehithĩire itũũra rĩu matoogie ndogo yambate kuuma kuo nĩguo ĩkorũo ĩrĩ kĩmenyithia.
Rĩrĩa ciana cia Isiraeli ciagarũrũkire ciũrĩre mbaara, arũme a Benjamini makĩambĩrĩria kũmatharĩkĩra na makĩũraga arũme ta 30 a Isiraeli na makiuga atĩrĩ: “Nĩ kũmatooria tũramatooria, o ta ũrĩa twamekire mbaara-inĩ ĩyo ĩngĩ.”
Ĩndĩ kĩmenyithia gĩkĩambĩrĩria kwambata na igũrũ kĩrĩ gĩtugĩ kĩa ndogo kuuma itũũra-inĩ rĩu. Rĩrĩa arũme a Benjamini meehũgũrire, makĩona itũũra rĩu rĩothe rĩgĩakana mwaki warĩrĩmbũkaga na igũrũ
Arũme a Isiraeli makĩmagarũrũkĩra, nao arũme a Benjamini makĩiyũrũo nĩ guoya, nĩ gũkorũo nĩ moonire atĩ thĩna nĩ warĩkĩtie kũmakora
Nĩ ũndũ ũcio makĩũrĩra arũme a Isiraeli merekeire werũ-inĩ, ĩndĩ mbaara ĩkĩmarũmĩrĩra; nao arũme arĩa mooimaga matũũra-inĩ makĩnyitanĩra na acio angĩ kũmoraga
Magĩthiũrũrũkĩria ciana cia Benjamini makĩmateng’eria mategũtigithĩria. Makĩmarangĩrĩria marĩ mbere ya Gibea mwena wa irathĩro
Mũthia-inĩ arũme 18,000 a Benjamini makĩũragwo, na othe maarĩ njamba cia ita ciarĩ hinya.
Arũme a Benjamini makĩgarũrũka na makĩũrĩra werũ-inĩ ndũmba-inĩ ya ihiga ya Rimoni, nacio ciana cia Isiraeli ikĩũragĩra arũme 5,000 barabara-inĩ iria nene, na igĩthiĩ o na mbere kũmateng’eria o nginya Gidomu; na ikĩũraga arũme angĩ 2,000
Arũme a Benjamini arĩa othe mooragirũo mũthenya ũcio maarĩ 25,000 marĩ na hiũ cia njora, na othe maarĩ njamba cia ita ciarĩ hinya
No arũme 600 makĩũrĩra werũ-inĩ ndũmba-inĩ ya ihiga ya Rimoni, na magĩikara kũu ndũmba-inĩ ya ihiga ya Rimoni mĩeri ĩna.
Nao arũme a Isiraeli makĩgarũrũka magĩthiĩ gũtharĩkĩra Abenjamini na makĩũraga andũ arĩa maarĩ itũũra-inĩ rĩu na rũhiũ rwa njora, makĩũraga andũ o hamwe na mahiũ, kĩrĩa gĩothe gĩatigarĩte. O na ningĩ matũũra marĩa mothe maakorire na kũu, makĩmacina na mwaki.