Atĩĩrĩrĩri Bũrũri 21

Na rĩrĩ, arũme a Isiraeli nĩ meehĩtĩte mwĩhĩtwa marĩ Mizipa makiuga ũũ: “Gũtirĩ o na ũmwe witũ ũkaaneana mwarĩ kũrĩ mũndũrũme wa Benjamini atuĩke mũtumia wake.”

Nĩ ũndũ ũcio, andũ magĩthiĩ Betheli na magĩikara thĩ mbere ya Kĩhoti ũrĩa wa ma o nginya hwaĩ-inĩ, makĩrĩraga na magĩcakaya marĩ na ruo rũingĩ

Na mooragia ũũ: “Yahweh Kĩhoti wa Isiraeli, nĩ kĩĩ gĩtũmĩte ũndũ ũyũ wĩkĩke thĩinĩ wa Isiraeli? Nĩ kĩĩ gĩgũtũma mũhĩrĩga ũmwe ũkorũo ũtarĩ ho ũmũthĩ thĩinĩ wa Isiraeli?”

Mũthenya ũrĩa warũmĩrĩire, andũ magĩũkĩra tene na magĩaka kĩgongona nĩgetha marutĩre magongona ma njino ho o hamwe na magongona ma ũiguano.

Andũ a Isiraeli magĩkĩũria ũũ: “Nũũ gatagatĩ-inĩ ka mĩhĩrĩga yothe ya Isiraeli ũtaambatire kũũngana mbere ya Yahweh?” nĩ gũkorũo nĩ meehĩtĩte mwĩhĩtwa mũnene atĩ mũndũ o wothe ũtaambatĩte kũrĩ Yahweh kũu Mizipa no mũhaka oragwo

Ciana cia Isiraeli ikĩigua kĩeha tondũ wa ũndũ ũrĩa wakorete Benjamini mũrũ wa ithe wao. Ikiuga atĩrĩ: “Ũmũthĩ mũhĩrĩga ũmwe nĩ mweherie thĩinĩ wa Isiraeli

Tũgwĩka atĩa nĩguo tũhe arĩa matigarĩte atumia, na nĩ twĩhĩtĩte mwĩhĩtwa mbere ya Yahweh atĩ tũtikamanengera airĩtu aitũ matuĩke atumia ao?”

Makĩũria ũũ: “Nĩ mũhĩrĩga ũrĩkũ gatagatĩ-inĩ ka mĩhĩrĩga ya Isiraeli ũtaambatire kũrĩ Yahweh kũu Mizipa?” Na gũkĩmenyeka atĩ gũtirĩ mũndũ o na ũmwe woimĩte Jabeshi-gileadi agoka kambĩ-inĩ kũrĩa kĩũngano kĩu kĩarĩ

Rĩrĩa andũ maatarirũo, makĩona atĩ gũtirĩ mũndũ o na ũmwe wa aikari a Jabeshi-gileadi warĩ kuo

Nĩ ũndũ ũcio kĩrĩndĩ kĩu gĩgĩtũma arũme 12,000 arĩa maarĩ na hinya biũ mathiĩ kuo. Gĩkĩmaatha gĩkĩmeera ũũ: “Thiĩi mũtharĩkĩre aikari a Jabeshi-gileadi na rũhiũ rwa njora, nginya andũ-a-nja na ciana

Ũũ nĩguo mwagĩrĩirũo gwĩka: Mũndũrũme o wothe, o hamwe na mũndũ-wa-nja o wothe wanakoma na mũndũrũme, mwagĩrĩirũo kũmũniina.”

Gatagatĩ-inĩ ka aikari a Jabeshi-gileadi, magĩkora airĩtu 400 maarĩ gathirange, mataakomete na mũndũrũme. Nĩ ũndũ ũcio makĩmatwara kambĩ-inĩ kũu Shilo, ĩrĩa ĩrĩ bũrũri-inĩ wa Kanaani.

Kĩrĩndĩ kĩu gĩothe gĩgĩcoka gĩgĩtũmana ndũmĩrĩri kũrĩ ciana cia Benjamini ndũmba-inĩ ya ihiga ya Rimoni na gĩkĩmendera thayũ

Kwoguo hĩndĩ ĩyo andũ a Benjamini magĩũka. Makĩmanengera airĩtu acio matooragire kuuma harĩ andũ-a-nja a Jabeshi-gileadi, no mationire airĩtu a kũmaigana

Nao andũ makĩigua kĩeha tondũ wa ũndũ ũrĩa wakorete Benjamini nĩ gũkorũo Yahweh nĩ aatũmĩte mĩhĩrĩga ya Isiraeli ĩgayũkane

Athuri a kĩrĩndĩ kĩu makĩũria atĩrĩ: “Tũgwĩka atĩa nĩguo tũhe arũme arĩa matigarĩte atumia, nĩ gũkorũo andũ-a-nja othe nĩ maaniinirũo Benjamini guothe?”

Magĩcokia ũũ: “Nĩ kwagĩrĩire gũkorũo na igai nĩ ũndũ wa arĩa matigarĩte a Benjamini, nĩgetha gũtikagĩe mũhĩrĩga o na ũmwe ũgũthira thĩinĩ wa Isiraeli

No tũtiĩtĩkĩrĩtio kũneana airĩtu aitũ matuĩke atumia ao, nĩ gũkorũo ciana cia Isiraeli nĩ ciehĩtĩte ũũ: ‘Kũnyitwo nĩ kĩrumi nĩ mũndũ ũrĩa ũkaahe Benjamini mũtumia.’”

Magĩcoka makiuga ũũ: “Atĩrĩrĩ, nĩ kũgĩaga gĩathĩ kĩa Yahweh mwaka o mwaka thĩinĩ wa Shilo, ĩrĩa ĩrĩ mwena wa rũgongo wa Betheli na mwena wa irathĩro wa barabara ĩrĩa nene yumĩte Betheli ĩkambata nginya Shekemu na mwena wa mũhuro wa Lebona.”

Kwoguo magĩatha arũme a Benjamini ũũ: “Thiĩi mwĩhithe mĩgũnda-inĩ ya mĩthabibũ

Na rĩrĩa mũrĩona airĩtu a Shilo moka kũina nyĩmbo iria cirĩinwo kũo, o ũmwe wanyu agĩrĩirũo kuuma mĩgũnda-inĩ ya mĩthabibũ na eyoere mũtumia kuuma harĩ airĩtu acio a Shilo, na thutha ũcio mũcoke bũrũri-inĩ wa Benjamini

Na maithe mao kana ariũ a ithe mangĩtũtetia, tũkũmeera atĩrĩ, ‘Tuoniei tha nĩ ũndũ wao, nĩ gũkorũo tũtinahota kũhe o ũmwe wao mũtumia kũgerera mbaara na mũtingĩrahotire kũmahe atumia mũtegũcokererũo nĩ mahĩtia.’”

Na ũguo nĩguo arũme a Benjamini meekire, o ũmwe wao agĩkuua mũtumia kuuma harĩ airĩtu arĩa maathũngũthaga. Thutha ũcio magĩcoka igai-inĩ rĩao na magĩaka matũũra mao rĩngĩ na magĩtũũra kuo.

Ciana cia Isiraeli ikĩhurunjũka kuuma kũu hĩndĩ ĩyo, o mũndũ agĩthiĩ kũrĩ mũhĩrĩga wake na kũrĩ nyũmba yao, magĩkiuma kũu makiumagara o mũndũ agĩthiĩ igai-inĩ rĩake.

Matukũ-inĩ macio, gũtiarĩ mũthamaki thĩinĩ wa Isiraeli. O mũndũ eekaga ũrĩa oonaga kwagĩrĩire maitho-inĩ make.