Atĩĩrĩrĩri Bũrũri 3

Ici nĩcio ndũrĩrĩ iria Yahweh aarekire itigare nĩgetha igerie ciana cia Isiraeli irĩa itooĩ ũhoro wĩgiĩ mbaara o na ĩmwe ya Kanaani

(aarekire gũthiĩ ũguo nĩgetha njiarũa iria ingĩgooka thutha-inĩ cia Isiraeli imenye mbaara, iria itoonete maũndũ ta macio mbere ĩyo):

athani arĩa atano a Afilisti, na Akanaani othe, Asidoni, na Ahivi arĩa maaikaraga Kĩrĩma-inĩ kĩa Lebanoni kuuma Kĩrĩma-inĩ kĩa Baali-herimoni gũthiĩ nginya Lebo-hamathu

Ndũrĩrĩ icio ciarĩ cia kũgeria andũ a Isiraeli nĩguo kũmenyeke kana andũ a Isiraeli nĩ mangĩaathĩkĩire maathani ma Yahweh marĩa aaheete maithe mao kũgerera Musa

Kwoguo andũ a Isiraeli magĩtũũra gatagatĩ-inĩ ka Akanaani, Ahiti, Aamori, Aperizi, Ahivi, na Ajebusi

Moyaga airĩtu ao makamahikia magatuĩka atumia ao, nao airĩtu ao ene makamaneana kũrĩ ariũ ao, na makĩambĩrĩria gũtungatĩra ihoti ciao.

Nĩ ũndũ ũcio ciana cia Isiraeli igĩka maũndũ moru maitho-inĩ ma Yahweh, na ikĩriganĩrũo nĩ Yahweh Kĩhoti wao na ciatungatagĩra Baali na mĩtĩ ya kũhoywo

Nĩ ũndũ ũcio marakara ma Yahweh makĩrĩrĩmbũkĩra Isiraeli, na akĩmendia guoko-inĩ gwa Kushani-rishathaimu mũthamaki wa Mesopotamia. Ciana cia Isiraeli igĩtungatĩra Kushani-rishathaimu mĩaka ĩnana

Rĩrĩa ciana cia Isiraeli ciakaĩire Yahweh aciteithie, Yahweh akĩarahũra mũhonokia wa kũhonokia ciana cia Isiraeli, nĩwe Othinieli mũrũ wa Kenazu, mũrũ wa nyina na Kalebu ũrĩa mũnyinyi

Roho wa Yahweh ũgĩũka igũrũ rĩake, na agĩtuĩka mũtiirĩrĩri bũrũri wa Isiraeli. Rĩrĩa aathiire mbaara-inĩ, Yahweh akĩneana Kushani-rishathaimu mũthamaki wa Mesopotamia guoko-inĩ gwake na agĩtooria Kushani-rishathaimu

Thutha ũcio bũrũri ũcio ũkĩgĩa na ũhurũko mĩaka 40. Nake Othinieli mũrũ wa Kenazu agĩkua.

Na o rĩngĩ Ciana cia Isiraeli ikĩambĩrĩria gwĩka maũndũ moru maitho-inĩ ma Yahweh. Nĩ ũndũ ũcio Yahweh akĩreka Egiloni mũthamaki wa Moabi atoorie Isiraeli, nĩ gũkorũo nĩ meekaga maũndũ moru maitho-inĩ ma Yahweh

Ningĩ akĩmarehera Aamoni na Aamaleki mamokĩrĩre. Magĩtharĩkĩra Isiraeli na magĩtunyana itũũra rĩa mĩtĩ ya mĩkĩndũ

Ciana cia Isiraeli igĩtungatĩra Egiloni mũthamaki wa Moabi mĩaka 18.

Ciana cia Isiraeli igĩkaĩra Yahweh aciteithie, nĩ ũndũ ũcio Yahweh agĩciarahũrĩra mũhonokia, nĩwe Ehudi mũrũ wa Gera, Mũbenjamini wahũthagĩra guoko kwa ũmotho. Thutha wa ihinda ciana cia isiraeli igĩtũma irĩhi rĩa igooti kũrĩ Egiloni mũthamaki wa Moabi kũgerera Ehudi

Ehudi agĩĩthondekera rũhiũ rwa njora rũnooretwo mĩena yerĩ, rwa ũraihu wa mũkono ũmwe, na akĩruoherera thĩinĩ wa nguo yake kĩero-inĩ gĩake kĩa ũrĩo

Agĩkĩneana irĩhi rĩu rĩa igooti kũrĩ Egiloni mũthamaki wa Moabi. Na rĩrĩ, Egiloni aarĩ mũndũ mũtungu mũno.

Rĩrĩa Ehudi aarĩkirie kũneana irĩhi rĩu rĩa igooti, akiumagaria andũ acio maakuuĩte irĩhi rĩu

No rĩrĩa maakinyire harĩ kware ya Giligali, we mwene akĩhũndũka agĩthiĩ akĩra mũthamaki ũũ: “Atĩrĩrĩ, wee mũthamaki, ndĩ na ndũmĩrĩri yaku ya hitho.” Nake mũthamaki akiuga: “Kirai!” Nĩ ũndũ ũcio ndungata ciake ciothe ikĩmweherera

Kwoguo Ehudi agĩthiĩ harĩ we harĩa aaikarĩte arĩ wiki kanyũmba-inĩ kahooreru ka igũrũ. Ehudi agĩcoka akĩmwĩra: “Ndĩ na ndũmĩrĩri yaku kuuma kũrĩ Kĩhoti.” Nĩ ũndũ ũcio mũthamaki agĩũkĩra kuuma gĩtĩ-inĩ gĩake kĩa ũnene

Ehudi agĩcoka agĩcomora rũhiũ rwa njora kĩero-inĩ gĩake kĩa ũrĩo na guoko gwake kwa ũmotho na akĩmũtheca nda naruo

Rũhiũ rũu rũgĩthiĩ rũtonyete thĩinĩ hamwe na mũtĩ waruo, namo maguta makĩrũhumbĩra, tondũ ndaacomorire rũhiũ rũu rwa njora ruume nda-inĩ ya mũthamaki ũcio, namo mai makiuma

Ehudi akĩgerera gĩthaku-inĩ, thutha wa gũcokia mĩrango ya kanyũmba kau ka igũrũ na kũmĩhinga biũ

Rĩrĩa aathiire, ndungata cia mũthamaki igĩcoka na igĩkora mĩrango ya kanyũmba kau ka igũrũ ĩrĩ mĩhinge. Nĩ ũndũ ũcio cikiuga ũũ: “No nginya akorũo nĩ gwĩteithia areteithia rumu-inĩ hooreru ya thĩinĩ.”

Magĩikara o metereire nginya magĩconoka, no rĩrĩa moonire atĩ ndarahingũra mĩrango ya kanyũmba kau ka igũrũ, makĩoya cabi makĩmĩhingũra na makĩona mwathi wao agwĩte thĩ arĩ mũkuũ!

Ehudi oorire hĩndĩ ĩyo maahindahindaga, na akĩhĩtũkĩra kware-inĩ na agĩkinya Seira o wega

Rĩrĩa aakinyire, akĩhuuha coro arĩ gĩcigo-inĩ kĩrĩa kĩrĩ irĩma kĩa Efiraimu; nacio ciana cia Isiraeli igĩikũrũka kuuma gĩcigo-inĩ kĩrĩa kĩrĩ irĩma, acitongoretie

Agĩcoka agĩciĩra: “Nũmĩrĩrai, nĩ gũkorũo Yahweh nĩ aneanĩte thũ cianyu, Amoabi, guoko-inĩ kwanyu.” Nĩ ũndũ ũcio ikĩmũrũmĩrĩra na magĩtunyana iringĩro cia Jorodani makĩhingĩrĩria Amoabi, na matietĩkagĩria mũndũ o na ũmwe kũringa

Hĩndĩ ĩyo makĩũraga Amoabi 10,000, arũme othe njamba arĩa maarĩ na hinya; gũtirĩ o na ũmwe wetharire

Kwoguo mũthenya ũcio Moabi ĩgĩtoorio nĩ guoko kwa Isiraeli; naguo bũrũri ũcio ũkĩgĩa na ũhurũko mĩaka 80.

Thutha wake gũkiumĩra Shamigari mũrũ wa Anathu, ũrĩa woragire arũme 600 Afilisti na mũcengi wa ng’ombe; o nake nĩ aahonokirie Isiraeli.