Atũmwo 1

Thĩinĩ wa ibuku rĩakwa rĩa mbere, wee Theofilo-rĩ, nĩ ndakwandĩkĩire maũndũ mothe marĩa Yahshua aambĩrĩirie gwĩka na kũrutana

nginya mũthenya ũrĩa oirwo agĩtwarwo igũrũ thutha wa kũhe atũmwo arĩa aathuurĩte mawatho na ũndũ wa Roho Mwamũre.

Thutha wa kũnyarirĩka gwake, akĩĩonania kũrĩ andũ acio na akĩheana imenyithia nyingĩ cia kuonania atĩ aarĩ muoyo. Nĩ amoimĩrĩire ihinda rĩa mĩthenya mĩrongo ĩna, na akĩaria ũhoro ũkoniĩ ũthamaki wa Yahweh.

Hĩndĩ ĩmwe, rĩrĩa aarĩĩanagĩra nao, nĩ amathire, akĩmera atĩrĩ: “Mũtikoime Yahrushalayim, no etererai kĩheo kĩrĩa Ithe witũ eeranĩire, o kĩrĩa inyuĩ mwanaigua ngĩaria ũhoro wakĩo.

Nĩgũkorwo Johana aabatithanagia na maĩ, no inyuĩ mũrĩbatithio na Roho Mwamũre mĩthenya mĩingĩ ĩtanathira.”

Nĩ ũndũ ũcio rĩrĩa maagomanire hamwe makĩmũũria atĩrĩ, “Rabbi, ihinda rĩrĩ nĩrĩo ũgũcokeria andũ a Isiraeli ũthamaki wao?”

Nake akĩmera atĩrĩ: “Ti ũhoro wanyu kũmenya ciathĩ o na kana mahinda marĩa Ithe witũ atuĩte na ũhoti wake mwene.

No nĩ mũrĩheo hinya rĩrĩa Roho Mwamũre arĩũka igũrũ rĩanyu; na inyuĩ nĩ mũgatuĩka aira akwa thĩinĩ wa Yahrushalayim, na Yahuda guothe, na Samaria, na nginya ituri ciothe cia thĩ.”

Aarĩkia kuuga ũguo, akĩoywo na igũrũ o meroreire, narĩo itu rĩkĩmũhumbĩra magĩtiga kũmuona rĩngĩ.

O hĩndĩ ĩyo maikarĩte macũthĩrĩirie mũno akĩambata matu-inĩ-rĩ, o rĩmwe andũ erĩ mehumbĩte nguo njerũ makĩrũgama o hau maarĩ

Makĩmoria atĩrĩ, “Andũ aya a Galili, mũrũgamĩte haha mũcũthĩrĩirie igũrũ nĩkĩ? Yahshua o ro ũcio, ũrĩa weherio harĩ inyuĩ aatwarwo igũrũ-rĩ, agaacoka o ro ũguo mwamuona agĩthiĩ.”

Hĩndĩ ĩyo magĩcoka Yahrushalayim moimĩte Kĩrĩma-inĩ kĩa Mĩtamaiyũ, mũigana wa rũgendo rũrĩa rũngĩathiirwo mũthenya wa Thabatũ kuuma itũũra inene.

Rĩrĩa maakinyire, makĩambata nyũmba ya igũrũ ĩrĩa maikaraga. Nao andũ arĩa maarĩ ho maarĩ Kepha, na Johana, na Jakubu na Anderea; Filipu na Toma, na Baritholomayo na Mathayo; Jakubu mũrũ wa Alufayo, na Simoni Mũzelote, na Yahuda mũrũ wa Jakubu.

Othe makĩnyiitanĩra hamwe, makĩrũmanĩrĩria kũhoya, hamwe na andũ-a-nja, na Mariamu nyina wa Yahshua, o na ariũ a nyina na Yahshua.

Na rĩrĩ, matukũ-inĩ macio Kepha akĩrũgama gatagatĩ-inĩ ka andũ arĩa meetĩkĩtie (gĩkundi kĩa andũ ta igana rĩa mĩrongo ĩĩrĩ),

akiuga atĩrĩ, “Ariũ na aarĩ a Ithe witũ, Maandĩko no nginya mangĩahingire marĩa Roho Mwamũre aaririe tene na kanua ka Daudi ũhoro ũkoniĩ Yahuda, ũrĩa watongoririe andũ arĩa maanyitire Yahshua.

Aarĩ ũmwe witũ na nĩ agwatanagĩra na ithuĩ ũtungata-inĩ ũyũ.”

(Yahuda nĩ agũrire gĩthaka na kĩheo kĩrĩa aamũkĩrire nĩ ũndũ wa waganu wake. Nake akĩgũa gĩthaka-inĩ kĩu na mũnduru, nayo nda yake ĩgĩtathũka, namo mara mothe makiuma

Andũ othe a kũu Yahrushalayim makĩigua ũhoro ũcio, na nĩ ũndũ ũcio magĩĩta gĩthaka kĩu na rũthiomi rwao Ekiladama, ũguo nĩ kuuga, Gĩthaka gĩa Thakame.)

“Nĩgũkorwo nĩ kwandĩkĩtwo Ibuku-inĩ rĩa Thaburi atĩrĩ, “ ‘Mũciĩ wake ũrokira ihooru; kũroaga mũndũ wa gũtũũra kuo,’ ningĩ gũkaandĩkwo atĩrĩ, “ ‘Ũtongoria wake ũrooywo nĩ mũndũ ũngĩ.’

Nĩ ũndũ ũcio nĩ kwagĩrĩire gũthuurwo mũndũ ũmwe kuuma kũrĩ andũ arĩa makoretwo marĩ hamwe na ithuĩ ihinda rĩothe rĩrĩa Mwathi Yahshua aaceeraga na ithuĩ,

kwambĩrĩria hĩndĩ ya ũbatithio wa Johana nginya hĩndĩ ĩrĩa Yahshua oirwo akĩambata akĩehera harĩ ithuĩ. Nĩgũkorwo mũndũ ũmwe wa aya no nginya atuĩke mũira hamwe na ithuĩ ũhoro-inĩ wa kũriũka gwake.”

Nĩ ũndũ ũcio makĩrũgamia andũ erĩ, Jusufu ũrĩa wetagwo Bar-Asaba (na no oĩkaine ta Jusito), na Mathia.

Magĩcoka makĩhoya makiuga atĩrĩ, “Yahweh, wee nĩ ũũĩ ngoro ya mũndũ wothe. Tuonie nũ wa aya erĩ ũthuurĩte

nĩguo oe ũtungata ũyũ wa gũtuĩka mũtũmwo, ũrĩa Yahuda aatigire nĩguo athiĩ kũrĩa kũrĩ gwake.”

Magĩcoka magĩcuuka mĩtĩ, naguo mũtĩ ũkĩgwĩra Mathia; nĩ ũndũ ũcio akĩongererwo harĩ atũmwo acio ikũmi na ũmwe.