Ayubu 10

“Nĩ thũũrĩte muoyo wakwa. Ngũitũrũra mateta makwa. Na njarie ndĩ na marũrũ manene!

Ngwĩra Eloah atĩrĩ: ‘Ndũkandue mwĩhia. Njĩĩra kĩrĩa kĩratũma ũnjirithie.

Hihi nĩ ũgunĩkaga nĩ ũndũ wa kũhinyĩrĩria, Kũnyarara wĩra wa moko maku Na gũkenio nĩ ũtaaro wa arĩa aganu?

Kaĩ maitho maku matariĩ ta ma andũ, Kana wonaga ta ũrĩa andũ monaga?

Hihi matukũ maku nĩ ta ma andũ, Kana mĩaka yaku ĩgakĩhaana ta ya mũndũ,

Atĩ nĩguo ũcarĩrĩrie mahĩtia makwa Na ũikare ũgĩtuĩragia mehia makwa?

Nĩ ũĩ atĩ niĩ ndihĩtĩtie; Na gũtirĩ mũndũ ũngĩhota kũũhonokia kuuma guoko-inĩ gwaku.

Moko maku nĩmo maangũmbire na makĩnyũmba, No rĩu ũrenda kũũniina biũ.

Ririkana atĩ wanyũmbire kuuma harĩ rĩũmba, No rĩu ũrenda kũnjokia tĩri-inĩ.

Githĩ ndwanjitire ta iria Na ũgĩtũma haane ta makindi ma iria?

Wahumbĩrire na ngothi na nyama, Na ũkĩnjĩkĩra mahĩndĩ na mĩkiha ũgĩcinyitithania.

Nĩ ũũheete muoyo na ũkanyonia ũtugi waku; Nĩ ũgitĩrĩte roho wakwa na ũkanũmbũiya.

Ĩndĩ wabangĩte gwĩka maũndũ macio na hitho. Nĩ njũĩ atĩ maũndũ macio moimĩte kũrĩ wee.

Ingĩehirie-rĩ, nĩ ũngĩanyonire, Na ndũngĩanjehereirie mehia makwa.

Angĩkorũo nĩ hĩtĩtie-rĩ, kaĩ ndĩ na haaro-ĩ! O na angĩkorũo ndihĩtĩtie, ndingĩhota kũinamũra mũtwe wakwa, Nĩ gũkorũo njiyũirũo nĩ thoni na mathĩna.

Ingĩinamũra mũtwe, wee ũũhĩtaga ta mũrũthi Na ũkonania ũhoti waku wa kũnjũkĩrĩra.

Ũrehaga aira angĩ manjũkĩrĩre Na ũkongerera marakara maku kũnjerekera, O ũrĩa ndĩracemania na thĩna ũmwe thutha wa ũrĩa ũngĩ.

Nĩ kĩĩ gĩatũmire ũndute thĩinĩ wa nda ya maitũ? Kaba ingĩakuire itonetwo nĩ riitho rĩa mũndũ o na ũrĩkũ.

Kũngĩahaanire ta itarĩ ndakorũo kuo; Ingĩoimire nda ya maitũ ndwarĩtwo mbĩrĩra-inĩ.’

Githĩ matukũ makwa ti manini? Nĩ atigane na niĩ; Nĩ eherie maitho make harĩ niĩ nĩgetha ngĩe na thayũ hanini

Itanathiĩ kũndũ itagaacoka, Bũrũri ũiyũire nduma ndumanu.

Bũrũri ũrĩ na nduma nene, Bũrũri ũrĩ na kĩĩruru kĩnene na ũtarĩ mũbango, Kũrĩa ũtheri o naguo ũtariĩ ta nduma.”