Ayubu 9
Nake Ayubu agĩcokia akiuga atĩrĩ:
“Hatarĩ nganja nĩ njũĩ atĩ ũhoro ũcio nĩ wa ma. No mũndũ-rĩ, angĩkorũo arĩ mwagĩrĩru atĩa mbere ya Kĩhoti?
Mũndũ angĩenda gũkararania nake-rĩ, Mũndũ ũcio ndangĩhota kũmũcokeria kĩũria o na kĩmwe harĩ ciũria ciake ngiri ĩmwe.
We nĩ arĩ ũũgĩ wa ngoro na hinya mũingĩ. Nũũ ũngĩmũkararia na age kuona ũũru?
Athaamagia irĩma gũtarĩ mũndũ ũkũmenya; Na agacing’aũrania nĩ ũndũ wa ũrĩa arakarĩte.
Athingithagia thĩ ĩkoima harĩa ĩkoragwo, Nacio itugĩ ciayo ikainaina.
Athaga riũa rĩtikaare Na agathiĩka ũtheri wa njata;
Atambũrũkagia igũrũ arĩ o wiki, Na agathiĩra igũrũ rĩa makũmbĩ manene ma iria.
Nĩwe wombire gĩkundi kĩa njata kĩrĩa gĩtagwo Ashi, Kesili, na Kima, O hamwe na ikundi cia njata cia mwena wa mũhuro;
Ekaga maũndũ manene matangĩtuĩrĩka, Maũndũ ma magegania matangĩtarĩka.
Ageraga harĩa ndĩ na ndingĩmuona; Akahĩtũka, no ndingĩmũkũũrana.
Angĩgutha kĩndũ-rĩ, nũũ ũngĩmũgiria? Nũũ ũngĩmũũria, ‘Nĩ kĩĩ ũreka?’
Eloah ndahingagĩrĩria marakara make; O na arĩa mateithagia Rahabu nĩ mekũmũinamĩrĩra.
Na githĩ rĩrĩa ndĩramũcokeria ndikĩagĩrĩirũo o na makĩria Gũthuura wega ciugo cia gũcokanĩria nake!
O na ingĩkorũo itahĩtĩtie-rĩ, ndingĩmũcokeria. No gũthaitha ingĩthaitha mũtuanĩri ciira wakwa anjiguĩre tha.
Ingĩmwĩta-rĩ, hihi no anjĩtĩke? Ndiĩtĩkĩtie atĩ no athikĩrĩrie mũgambo wakwa,
Nĩ gũkorũo atũmaga hehenjwo nĩ kĩhuhũkanio Na akaingĩhia ironda ciakwa hatarĩ gĩtũmi.
Ndarekaga hũmũke; Aikaraga o akĩndehagĩra maũndũ marĩ ruo.
Angĩkorũo nĩ ũhoro wĩgiĩ hinya-rĩ, ũcio nĩwe ũrĩ na hinya. Angĩkorũo nĩ ũhoro wĩgiĩ kĩhooto-rĩ, oigaga ũũ: ‘Nũũ ũngĩnjirithia?’
O na ingĩkorũo itahĩtĩtie, kanua gakwa mwene no kandue mwĩhia; O na ingĩtũũria wĩkindĩru wakwa, we no atue atĩ nĩ hĩtĩtie.
O na ingĩtũũria wĩkindĩru wakwa, ndiũĩ maũndũ marĩa mekũngora; Nĩ thũire muoyo ũyũ wakwa.
Maũndũ macio mothe no ũndũ ũmwe. Nĩkĩo njugaga atĩ, ‘Aniinaga andũ matarĩ ũcuke na arĩa aganu o ũndũ ũmwe.’
Kũngĩgĩa na mũiyũro mũnene wa maĩ ũrehe gĩkuũ o rĩmwe, We no athekerere arĩa matarĩ ũcuke thĩna-inĩ ũcio wao.
Thĩ nĩ ĩneanĩtwo moko-inĩ ma ũrĩa mwaganu; Nĩ ahumbagĩra maitho ma atuanĩri ciira ayo. Angĩkorũo tiwe wĩkaga ũguo-rĩ, nũũ?
Matukũ makwa marathiĩ na ihenya gũkĩra mũteng’eri; Mathiraga itekuona maũndũ mega.
Mathiaga na ihenya o ta tũtarũ twa mathanjĩ, O ta nderi cigĩikũrũka kũhuria gĩa kũrĩa.
Ingiuga, ‘Nĩ ngũriganĩrũo nĩ mathĩna makwa, Nĩ ngũtiga gũkorũo na kĩeha na ngene,’
O na hĩndĩ ĩyo no ngorũo na guoya nĩ ũndũ wa ruo rwakwa ruothe, Na nĩ njũĩ atĩ o na hĩndĩ ĩyo ndũngĩndua mũthingu.
Ingĩonwo ndĩ o mwĩhia. Ndĩrakĩĩhinyanĩrĩria o tũhũ nĩkĩ?
Ingĩĩthamba na maĩ moimĩte mbarabu-inĩ ĩraringũka, Na ndĩĩthambe moko na thabuni-rĩ,
No kũnjikia ũngĩnjikia irima-inĩ, Na hĩndĩ ĩyo o na nguo ciakwa no gũũthũũra cingĩthũũra.
Nĩ gũkorũo we ti mũndũ ta niĩ atĩ ndĩmũcokerie, Atĩ nĩguo tũthiĩ igooti-inĩ hamwe nake.
Gũtirĩ mũndũ wa gũtũtuithania nake, Ũrĩa ũngĩtuĩka mũtuanĩri ciira witũ.
Angĩtiga kũũhũũra Na atige kũũmakia na maũndũ make ma gwĩkĩra guoya,
No ndĩmwarĩrie itegwĩtigĩra, Nĩ gũkorũo niĩ ndirĩ guoya wa kwaria.