Ayubu 8

Nake Bilidadi ũrĩa Mũshuhi agĩcokia akiuga atĩrĩ:

“Ũgũthiĩ na mbere kwaria maũndũ macio nginya rĩ? Ciugo cia kanua gaku itariĩ ta rũhuho rũrahurutana na hinya!

Hihi EL no ogomie kĩhooto, Kana El Shaddai ogomie ũndũ wa ũthingu?

Angĩkorũo ariũ aku nĩ maamwĩhĩirie-rĩ, Aarekire maherithio nĩ ũndũ wa ũremi wao;

No rĩrĩ, ũngĩĩhoka El na wĩthaithanĩrĩre harĩ El Shaddai,

Ningĩ angĩkorũo na ma ũrĩ mwamũre na mũrũngĩrĩru, Nĩ egũkũrũmbũiya Na agũcokie handũ harĩa hakwagĩrĩire.

O na gũtuĩka kĩambĩrĩria gĩaku kĩarĩ kĩnini, Thutha-inĩ nĩ ũkaagaacĩra mũno.

Ta tuĩria ũhoro harĩ njiarũa cia tene, Na wĩcũranie ũhoro wa maũndũ marĩa maithe mao meerutire.

Nĩ gũkorũo ithuĩ tũraciarirũo ira na gũtirĩ ũndũ tũĩ, Tondũ matukũ maitũ gũkũ thĩ mahaana ta kĩĩruru.

Githĩ matigũkũruta maũndũ Na makũhe ũhoro ũrĩa moĩ?

Hihi irura no rĩraihe rĩrĩ handũ hatarĩ itomboya? Ithanjĩ-rĩ, no rĩraihe hatarĩ maĩ?

Hĩndĩ o ĩyo rĩrĩ na kĩro, rĩtarĩ rĩratuo, Rĩngĩũma mbere ya mũmera ũngĩ o wothe.

Macio nĩmo moimĩrĩro ma arĩa othe mariganagĩrũo nĩ El, Nĩ gũkorũo kĩĩrĩgĩrĩro kĩa mũndũ wĩ na thahu nĩ gĩgaathira,

O ũcio ũigĩte mwĩhoko maũndũ-inĩ ma tũhũ Na kĩĩrĩgĩrĩro gĩake gĩkahaana o ta rũrenda rwa mbũmbũĩ.

Egwĩtiirania na nyũmba yake, no nĩ ĩkũmomoka; Ekũgeria kwĩnyitĩrĩra harĩ yo, no ndĩgũtũũra.

Ahaana mũmera ũitĩrĩirio maĩ ũrĩ riũa-inĩ, Na thuuna ciake igatherema mũgũnda-inĩ.

Mĩri yake ĩĩthiorereirie hĩba-inĩ ya mahiga; Acaragia gĩikaro mahiga-inĩ.

No rĩrĩa akaamunywo kuuma harĩa arĩ, Handũ hau nĩ hakaamũkaana hoige atĩrĩ, ‘Niĩ ndirĩ ndakuona.’

Ti itherũ, ũguo nĩguo agaathira; Nao angĩ moimĩre kuuma tĩri-inĩ.

Hatarĩ nganja El ndagaatiganĩria arĩa matũũragia wĩkindĩru; Ningĩ ndagaateithĩrĩria andũ arĩa aganu,

Nĩ gũkorũo nĩ agaatũma kanua gaku kaiyũre gĩkeno Nayo mĩromo yaku yanĩrĩre nĩ ũndũ wa gũkena.

Andũ arĩa magũthũire makaahumbwo thoni, Nayo hema ya arĩa aganu ndĩgaakorũo ho rĩngĩ.”