Ayubu 7

“Githĩ ũtũũro wa mũndũ thĩinĩ wa thĩ ndũhaana wĩra wa kũhinyĩrĩrio, Namo matukũ make ta ma mũruti wĩra wa mũcara?

Eriragĩria kĩĩruru o ta ngombo, Na ageterera marĩhi make ta mũruti wĩra wa mũcara.

Na njĩra o ta ĩyo, nĩ heetwo mĩeri ya tũhũ Na ngatarĩrũo motukũ ma kũraara na kĩeha.

Rĩrĩa ndakoma njũragia atĩrĩ, ‘Ndĩũkĩra rĩ?’ Naguo ũtukũ ũgakĩraiha, ngaraara ngĩĩgarũra nginya rũcinĩ gũgĩkĩa.

Mwĩrĩ wakwa ũiyũire igunyũ na ngũmba cia tĩri; Ngothi yakwa ĩiyũire ngũũcĩ na mahira.

Matukũ makwa marathiĩ na ihenya gũkĩra mũkuha wa mũtumi nguo, Magacoka magakinya mũthia itarĩ na kĩĩrĩgĩrĩro.

Ririkana atĩ ũtũũro wakwa no rũhuho, Atĩ riitho rĩakwa rĩtikoona gĩkeno rĩngĩ.

Riitho rĩrĩa rĩranyona rĩu rĩtikaanyona rĩngĩ; Maitho maku nĩ makaanjaria, no ndigaakorũo ho.

O ta ũrĩa itu rĩbuĩragia rĩgathira, Noguo ũrĩa ũthiaga Mbĩrĩra-inĩ atacokaga rĩngĩ.

Ndagaacoka gwake rĩngĩ, Na ndakaririkanwo gwake rĩngĩ.

Nĩ ũndũ ũcio, ndikũgirĩrĩria kanua gakwa. Ngwaria nĩ ũndũ wa ruo rwa ngoro yakwa; Ngũteta ndĩ na marũrũ manene!

Kaĩ niĩ ndĩ iria kana nyamũ nene ya iria-inĩ, Atĩ nĩguo nangagĩrũo?

Hĩndĩ ĩrĩa ndoiga, ‘Nĩ ngũhoorerio nĩ ũrĩrĩ wakwa; Gĩtanda gĩakwa nĩ gĩkũnyihanyihĩria mĩtangĩko,’

Ũũmakagia na iroto Na ũkanjĩkĩra guoya na cioneki,

Ngagĩthuura gũkua nĩ ũndũ wa kũremwo nĩ kũhuhia, Ngathuura gĩkuũ handũ ha mwĩrĩ ũyũ wakwa.

Nĩ thũũrĩte muoyo wakwa; ndikwenda gũthiĩ na mbere gũtũũra. Njeherera, tondũ matukũ makwa no ta mĩhũmũ.

Mũndũ-rĩ, nĩwe kĩ nĩguo ũmwĩcirie Na ũmũrũmbũiye na njĩra nene?

Nĩ kĩĩ gĩtũmaga ũmũthuthurie rũcinĩ o rũcinĩ Na ũmũgerie hĩndĩ ciothe?

Kaĩ ũtangĩĩhũgũra ũtige kũndora Na ũtigane na niĩ na arĩ merie mata?

Angĩkorũo nĩ njĩhĩtie-rĩ, nĩ atĩa ingĩgwĩka mũũru, wee ũcũthagĩrĩria andũ? Nĩ kĩĩ gĩtũmĩte ũndue kĩndũ gĩa gũtharĩkĩrũo nĩwe? Kaĩ nduĩkĩte mũrigo harĩ wee?

Ũrarega kũnjohera mahĩtia makwa nĩkĩ Na ũndekere mehia makwa? Nĩ gũkorũo ica ikuhĩ nĩ ngũkoma tĩri-inĩ, Nawe nĩ ũkaanjaria na ndigaakorũo ho.”