Ayubu 6

Nake Ayubu agĩcokia akiuga atĩrĩ:

“Na arĩ korũo ruo rwakwa no rũthimwo Na rũigĩrĩrũo ratiri-inĩ hamwe na mathĩna makwa!

Nĩ gũkorũo rĩu nĩ rũritũ gũkĩra mũthanga wa iria-inĩ. Nĩkĩo njarĩtie mĩario ĩtarĩ mĩrũngĩrĩru.

Nĩ gũkorũo mĩguĩ ya Shaddai nĩ ĩĩthecete, Na roho wakwa nĩ kũnyua ũranyua thumu wayo; Maũndũ ma gwĩkĩra guoya kuuma kũrĩ Eloah merekeirio harĩ niĩ.

Hihi ndigiri ya gĩthaka no yanie ĩrĩ na nyeki, Kana ndegwa yanie ĩrĩ na gĩa kũrĩa?

Hihi irio itarĩ mũcamo nĩ irĩagwo itarĩ cumbĩ, Kana hihi mũndũ no akenere maĩ matarĩ mũcamo ma mũmera?

Niĩ nĩ ndegete kũhutia indo ta icio. Itariĩ ta thumu irio-inĩ ciakwa.

Na arĩ korũo ihoya rĩakwa no rĩhinge Na Eloah aahingĩrie ũndũ ũrĩa ndĩrirĩirie!

Atĩ Eloah etĩkĩre kũũhehenja, Na atambũrũkie guoko gwake aaniine!

Nĩ gũkorũo ũndũ ũcio o naguo no ũnyũmĩrĩrie; O na ndĩ na ruo rũtarathira, ingĩrũgarũga nĩ gũkena, Nĩ gũkorũo ndirĩ ndakaana ciugo cia Ũrĩa Mwamũre.

Hihi ndĩ na hinya wa gũthiĩ na mbere gweterera? Nĩ mũthia ũrĩkũ ũnjetereire atĩ nĩguo thiĩ na mbere gũtũũra?

Hihi hinya wakwa ũtariĩ ta wa rwaro rwa ihiga? Kana hihi mwĩrĩ wakwa ũthondeketwo na gĩcango?

Hihi nĩ harĩ ũndũ ingĩĩteithia naguo Rĩrĩa ndunyĩtwo ũhoti wakwa wothe?

Mũndũ o wothe mũhinyĩrĩrĩku-rĩ nĩagĩrĩire gwĩkwo ciĩko cia ũtugi o na akorwo nĩarĩtiga gwĩtigĩra Mwene-Hinya wothe.

Ariũ a maitũ nĩ kũngarũka mangarũkĩte makahenia o ta karũũĩ ka hĩndĩ ya heho, O ta maĩ ma tũrũũĩ twa hĩndĩ ya heho tũrĩa tũhũaga.

Tũiragio nĩ mbarabu, Na mbarabu ĩrĩa ĩraringũka ĩkehitha kuo.

No thutha wa ihinda tũniaraga maĩ na tũgathira; Rĩrĩa kwahiũha, tũkahũa.

Tũcenjagia njĩra iria tũgeragĩra; Tũgatherera werũ-inĩ na tũgathira.

Ahũũri biacara a Tema nĩ matũcaragia; Nao agendi a kuuma Sheba magatweterera.

Nĩ maconokaga nĩ ũndũ wa gũkorũo na mwĩhoko ũtarakinyanĩra; Maakinya harĩ tuo makaga gũkora maĩ.

Nĩ gũkorũo ũguo nĩguo mũtuĩkĩte harĩ niĩ; Muonete mathĩna makwa, mũgetigĩra.

Hihi niĩ nĩ njugĩte, ‘Hei kĩndũ,’ Kana ngamũhoya kĩheo kuuma harĩ ũtonga wanyu?

Hihi nĩ njugĩte honokio kuuma guoko-inĩ gwa thũ Kana honokio kuuma harĩ ahinyanĩrĩria?

Ndutai ũhoro, na niĩ nĩ ngũikara ngirĩte; Ndeithiai ndaũkĩrũo nĩ mahĩtia makwa.

Ciugo cia ma itituuraga! No rĩrĩ, ũtaaro wanyu ũrĩ na ũguni ũrĩkũ?

Hihi mũrabanga kũrũnga ciugo ciakwa, Ciugo cia mũndũ ũtarĩ na mwĩhoko, iria ihurutagwo nĩ rũhuho ikehera?

Inyuĩ o na no mũcukĩre mwana wa ndigwa mĩtĩ Na mwendie mũrata wanyu!

Nĩ ũndũ ũcio-rĩ, garũrũkai mũndore, Nĩ gũkorũo ndingĩmũheenia.

Ndamũthaitha mwĩcirie ũndũ ũcio rĩngĩ, mũtikanduĩre ũrĩa gũtarĩ, Mwĩciriei ũndũ ũcio rĩngĩ, nĩ gũkorũo ũthingu wakwa ũrĩ o thĩinĩ wakwa.

Hihi rũrĩmĩ rwakwa rũraaria maũndũ matarĩ ma kĩhooto? Na githĩ ndirataũkĩrũo atĩ harĩ ũndũ ũtarĩ mwega?