Ayubu 18

Nake Bilidadi ũrĩa Mũshuhi agĩcokia akiuga atĩrĩ:

“Ũgũthiĩ na mbere kwaria mĩario ta ĩyo nginya rĩ? Onania ũtaũku nĩguo o na ithuĩ twarie.

Nĩ kĩĩ gĩgũtũma ũtuone ta tũrĩ nyamũ Na tũhaane irimũ maitho-inĩ maku?

O na ũngĩrakara wĩtinangie tũcunjĩ-rĩ, Hihi thĩ no ĩthamwo nĩ ũndũ waku, Kana rwaro rwa ihiga rwehere harĩa rũkoragwo?

Ũtheri wa mũndũ mwaganu nĩ ũkaahorio, Na rũrĩrĩmbĩ rwa mwaki wake rũtikaaruta ũtheri.

Ũtheri ũrĩa ũrĩ thĩinĩ wa hema yake no mũhaka ũtuĩke nduma, Naguo tawa ũrĩa ũrĩ igũrũ rĩake ũhorio.

Mũtacũ wake mũraihu nĩ mũnyihie, Na ũtaaro wake we mwene nĩ ũgũtũma agwe.

Nĩ gũkorũo magũrũ make mekũmũtongoria o thĩinĩ wa neti, Nake orũrage thĩinĩ wayo.

Mũtego ũkũmũnyitĩra ndiira-inĩ; Mũtego nĩguo ũkũmũnyita.

Ahithĩirũo mũkanda tĩri-inĩ, Na akambĩrũo mũtego njĩra-inĩ ĩrĩa ageraga.

Arigicĩirio nĩ maũndũ ma kũmakania mĩena yothe Namo maramũteng’eria marĩ o makinya-inĩ make.

Athiragwo nĩ hinya, Naguo mwanangĩko nĩ ũgũtũma atũgũge.

Ngothi yake ĩrĩĩkĩte ĩgathira; Ciĩga ciake iniinĩtwo nĩ mũrimũ ũrĩa mũũru biũ.

Nĩ eheretio ũgitĩri-inĩ wa hema yake Na agatwarũo kũrĩ mũthamaki wa imakania.

Ageni nĩo magaatũũra thĩinĩ wa hema yake; Naguo ũbiriti ũhurunjwo gwake mũciĩ.

Mĩri yake nĩ kũũma ĩkoomĩra thĩ, Na igũrũ honge ciake ihoohe.

Ndagaacoka kũririkanwo thĩinĩ wa thĩ, Na rĩĩtwa rĩake rĩtikaamenyeka barabara-inĩ.

Akaarutwo ũtheri-inĩ atwarũo nduma-inĩ Na aingatwo kuuma bũrũri-inĩ ũrĩa ũrĩ maciaro.

Ndagaakorũo na ciana kana njiarũa thĩinĩ wa andũ ao, Na gũtirĩ mũndũ wake ũgaatigara kũrĩa aikaraga.

Rĩrĩa mũthenya wake ũgaakinya, andũ a mwena wa Ithũĩro nĩ kũmaka makaamaka Nao andũ a mwena wa Irathĩro manyitwo nĩ guoya.

Ũguo nĩguo gũthiaga harĩ hema cia ũrĩa wĩkaga ũũru Na kũndũ kwa mũndũ ũrĩa ũtamenyete El.”