Ayubu 19

Nake Ayubu agĩcokia akiuga atĩrĩ:

“Mũgũthiĩ na mbere kũndakaria nginya rĩ, Mũkĩhehenjaga na ciugo?

Mũnjĩrĩte ciugo cia kũnduurithia maita macio ikũmi; Na mũtiraigua thoni mũkĩnjũkĩrĩra!

Angĩkorũo na ma nĩ hĩtĩtie, No niĩ ngũikara na mahĩtia makwa.

Mũngĩthiĩ na mbere gwĩtũũgĩria igũrũ rĩakwa, Mũkiugaga atĩ nĩ njagĩrĩire gũũkĩrĩrũo-rĩ,

Kĩmenyei atĩ Eloah nĩwe ũũng'aũranĩtie, Na nĩ anyitĩte na neti yake ya gũtega.

Atĩrĩrĩ, nyanagĩrĩra ngoiga ũũ, ‘Nĩ njĩkĩtwo maũndũ moru!’ no gũtirĩ ũndũ njokagĩrio; Hoyaga ũteithio, no gũtirĩ kĩhooto nyonaga.

Aigĩte rũthingo rwa ihiga njĩra-inĩ yakwa akamĩhinga, ndingĩhota kũhĩtũka; Ahumbĩrĩte tũcĩra twakwa na nduma.

Nĩ anjaũrĩte riri wakwa Na akanduta thũmbĩ mũtwe.

Ahehenjaga na mĩena yothe nginya ngathira; Nakĩo kĩĩrĩgĩrĩro gĩakwa agakĩmunya ta mũtĩ.

Marakara make mahiũ nĩ manjũkĩrĩire, Na anyonaga ndĩ thũ yake.

Thigari ciake icokanagĩrĩra hamwe ikandigicĩria, Na igaka kambĩ gũthiũrũrũkĩria hema yakwa.

Nĩ atwarĩte ariũ a maitũ kũndũ kũraihu na niĩ, Nao andũ arĩa manjũĩ makandiganĩria.

Arata akwa a hakuhĩ nĩ mandigĩte magathiĩ, Na andũ arĩa ndoĩ wega nĩ mariganĩirũo nĩ niĩ.

Andũ arĩa maceerete gwakwa o na ngombo ciakwa cia airĩtu monaga ta ndĩ mũgeni; Manyonaga haana ta mũndũ wa kũngĩ.

Njĩtaga ndungata yakwa no ndĩngĩnjĩtĩka; Ndĩmĩthaithaga na kanua gakwa ĩnjaĩre.

Mĩheehũ yakwa ĩtuĩkĩte kĩndũ kĩrĩ magigi harĩ mũtumia wakwa, Nao ariũ a maitũ manyonaga haana kĩndũ kĩranunga ũũru.

O na ciana nyinyi nĩ cinyararĩte; Rĩrĩa ndarũgama, ciambagĩrĩria kũnyũrũria.

Arata akwa a hakuhĩ othe nĩ mamenete, Nao arĩa ndendete makanjũkĩrĩra.

Mahĩndĩ makwa manyitanĩte na ngothi na nyama ciakwa, Na honokete na ngothi ya magego makwa.

Njiguĩrai tha inyuĩ arata akwa, njiguĩrai tha, Nĩ gũkorũo guoko kwa Eloah we mwene nĩ kũngũthĩte.

Nĩ kĩĩ gĩtũmaga mũthiĩ na mbere kũũnyarira ta ũrĩa nyariragwo nĩ El, Mũgatharĩkagĩra mũtegũtigithĩria?

Na arĩ korũo ciugo ciakwa no ciandĩkwo, Na arĩ korũo no ciandĩkwo ibuku-inĩ!

Na arĩ korũo ciatũũra icongetwo rwaro-inĩ rwa ihiga tene na tene, Ciandĩkĩtwo na karamu ga kĩgera na ngocorai!

Tondũ nĩ njũĩ wega atĩ mũngũũri arĩ o muoyo; Nĩ agooka thutha-inĩ na arũgame igũrũ rĩa thĩ.

Ngothi yakwa yarĩkia kwanangwo, O ndĩ na mwĩrĩ ũyũ wakwa, nĩ ngoona Eloah,

Ndĩmuone niĩ mwene, Maitho makwa mwene nĩmo makaamuona, ti ma mũndũ ũngĩ. No thĩinĩ wakwa ndĩraigua itarĩ na hinya!

Nĩ gũkorũo muugĩte atĩrĩ, ‘Tũramũnyarira na njĩra ĩrĩkũ?’ Tondũ niĩ nĩ niĩ kĩhumo gĩa thĩna ũyũ.

Mwĩtigĩrei rũhiũ rwa njora, Nĩ gũkorũo rũhiũ rwa njora nĩ rũherithanagia nĩ ũndũ wa mehia; Nĩ mwagĩrĩirũo kũmenya atĩ nĩ kũrĩ mũtuanĩri ciira.”