Ayubu 20

Nake Zofaru ũrĩa Mũnaamathi agĩcokia akiuga atĩrĩ:

“Meciria makwa nĩ marathĩnĩka na nĩkĩo ndĩracokia Tondũ wa mĩtangĩko ĩrĩa ndĩ nayo.

Nĩ ndaigua ciugo cia kũnduurithia; Na ũtaũku wakwa nĩ ũratũma njokie.

No mũhaka ũkorũo nĩ ũĩ ũndũ ũyũ, Tondũ nĩguo gũkoretwo kuuma o rĩrĩa mũndũ aaigirũo thĩinĩ wa thĩ,

Atĩ gĩkeno kĩa mũndũ mwaganu no gĩa kahinda kanini Na gũkena kwa mũndũ ũrĩa ũtetigĩrĩte Yahweh no gwa kahinda kanini.

O na gũtuĩka ũnene wake ũkinyaga o igũrũ Na kĩongo gĩake gĩgakinya matu-inĩ,

Agaathira tene na tene o ta mai make we mwene, Andũ arĩa maamuonaga makooria atĩrĩ, ‘Arĩ kũ?’

Agaathira o ta kĩroto, na matikamuona; Akaaingatwo o ta kĩoneki kĩa ũtukũ.

Riitho rĩrĩa rĩamuonaga rĩtigacoka kũmuona rĩngĩ, O na gĩikaro gĩake gĩtikaamuona rĩngĩ.

Ciana ciake nĩ ikeyendithĩrĩria harĩ andũ arĩa athĩni, Na moko make mwene nĩ magaacokia ũtonga wake kũrĩa aaũrutĩte.

Mahĩndĩ make maaiyũrĩte hinya wa wĩthĩ, No hinya ũcio ũgaakoma hamwe nake tĩri-inĩ.

Angĩkorũo ũndũ ũrĩa mũũru ũkoragwo na cama ũrĩ kanua-inĩ gake, Angĩkorũo aũhithaga rungu rwa rũrĩmĩ rwake,

Angĩkorũo no gũkenera aũkenagĩra na ndangĩtigana naguo No agaikara aũigĩte kanua-inĩ gake-rĩ,

Irio ciake nĩ ikaarũra irĩ thĩinĩ wa nda yake; Igaatuĩka o ta thumu wa nduĩra irĩ thĩinĩ wake.

Nĩ ameretie ũtonga, no nĩ akaaũtahĩka; El nĩ akaaũruta thĩinĩ wa nda yake.

Nĩ akaanyua thumu wa nduĩra; Akooragwo nĩ magego ma nyoka ĩrĩ thumu.

Ndakona tũrũũĩ twa maĩ, O na njũũĩ cia ũũkĩ na thiagĩ.

Agaacokia indo ciake atarĩ aracirĩa; Ndagaakenera ũtonga wa wonjoria wake.

Nĩ gũkorũo nĩ ahinyĩrĩirie arĩa athĩni na akamatiganĩria; Nĩ oete nyũmba ataakire.

No ndagaakorũo na thayũ thĩinĩ wake; Ũtonga wake ndũkaamũteithia kũhonoka.

Gũtirĩ kĩndũ gĩtigaru angĩrĩa; Na nĩkĩo ũtonga wake ũtagaakorũo ũrĩ wa gũtũũra.

Hĩndĩ ĩrĩa akaaingĩhia ũtonga biũ, mĩtangĩko nĩ ĩkaamũtooria; Maũndũ maingĩ moru nĩ makaamũkora.

Rĩrĩa agaakorũo akĩiyũria nda yake, Kĩhoti ũrĩa wa ma nĩ akaamũrehera marakara make mahiũ, Amurĩrie o ta mbura thĩinĩ wake.

Angĩũrĩra matharaita ma kĩgera, Mĩguĩ kuuma harĩ ũta wa gĩcango nĩ ĩkaamũtheca.

Acomoraga mũguĩ mũgongo-inĩ wake, Agacomora itharaita rĩrahenia nyongo-inĩ yake, Na akanyitwo nĩ guoya mũnene.

Mĩthithũ yake yetereirũo nĩ nduma nene; Agaacinwo nĩ mwaki ũtarĩ mũhurutĩre nĩ mũndũ; Thĩna nĩ wetereire mũndũ o wothe ũgaatigara thĩinĩ wa hema yake.

Igũrũ nĩ rĩkaaguũria mahĩtia make; Nayo thĩ nĩ ĩkaamũũkĩrĩra.

Nyũmba yake nĩ ĩgaathererio nĩ kĩguũ; Gũgaakorũo na mũiyũro mũnene mũno mũthenya wa marakara ma Yahweh.

Rĩu nĩrĩo igai rĩrĩa Kĩhoti ũrĩa wa ma akaahe mũndũ mwaganu, Nĩrĩo igai rĩrĩa El atuĩte atĩ nĩ akaamũhe.”