Ayubu 33
“No rĩu Ayubu-rĩ, ta igua ciugo ciakwa; Thikĩrĩria maũndũ mothe marĩa nguuga.
Atĩrĩrĩ, no mũhaka ndumũre kanua gakwa; Rũrĩmĩ Rwaka no mũhaka rwarie.
Ciugo ciakwa cionanagia ũrũngĩrĩru wa ngoro yakwa, Na mĩromo yakwa ĩkoiga maũndũ marĩa njũĩ ĩtarĩ na ũhinga.
Roho wa El nĩguo wanyũmbire, Na mĩhũmũ ya El Shaddai ĩgĩtũma ngorũo muoyo.
Njokeria angĩkorũo no ũhote; Wĩhaarĩrie gwĩtetera na werekerie ciugo ciaku harĩ niĩ.
Atĩrĩrĩ, niĩ ndariĩ o tawe mbere ya El. Nĩ gũkorũo o na niĩ ndombirũo na rĩũmba.
Nĩ ũndũ ũcio, ndwagĩrĩirũo kũgĩa na guoya nĩ ũndũ wakwa, Na ũritũ wa ciugo ciakwa ndwagĩrĩirũo gũgũtooria.
No wee nĩ warĩtie ngĩiguaga, Ngaigua ũkiuga ciugo ici,
‘Niĩ ndĩ mũkinyanĩru, ndiagararĩte watho wa Yahweh; Ndĩ mwagĩrĩru, ndirĩ na mahĩtia.
No nĩ onete itũmi cia kũnjũkĩrĩra; Anyonaga ndĩ thũ yake.
Ekĩraga magũrũ makwa ndungu-inĩ; Athuthuragia njĩra ciakwa ciothe.’
No nĩ ũhĩtĩtie nĩ kuuga ũguo, nĩkĩo ngũgũcokeria ngwĩre atĩrĩ: Eloah nĩ mũnene mũno gũkĩra mũndũ.
Nĩ kĩĩ kĩratũma ũmũtetie? Hihi nĩ tondũ ataagũcokeirie ũndũ o na ũmwe wa marĩa woigire?
Nĩ gũkorũo El aragia riita rĩa mbere na akaria rĩa kerĩ, No gũtirĩ mũndũ ũtindanagĩra.
Ekaga ũguo thĩinĩ wa kĩroto, kĩoneki-inĩ kĩa ũtukũ, Hĩndĩ ĩrĩa andũ maanyitwo nĩ toro mũritũ Makomete marĩrĩ-inĩ mao.
Ahingũraga matũ mao Agacoka agekĩra ũtaaro wake thĩinĩ wao,
Nĩguo agarũre mũndũ atige gwĩka maũndũ moru Na agitĩre mũndũ kuumana na mwĩtĩo.
Yahweh nĩ ahonokagia muoyo wake ndũgathiĩ irima-inĩ, Akahonokia muoyo wake ndũkaniinwo na rũhiũ rwa njora.
Ningĩ mũndũ nĩ arũngagwo rĩrĩa arĩ na ruo akomete ũrĩrĩ-inĩ wake Na rĩrĩa mahĩndĩ make maramũtuura mategũtigithĩria,
O nginya we mwene akamena mũgate, Na akarega o na irio iria njega.
Nyama cia mwĩrĩ wake igatiga kuoneka, Namo mahĩndĩ make marĩa mararĩ mahithe makoimĩra,
Muoyo wake ũgakuhĩrĩria irima; Muoyo wake ũgakuhĩrĩria arĩa marehaga gĩkuũ.
No kũngĩkorũo na mũtũmwo ũmwe nĩ ũndũ wake, Mũndũ ũrĩa wa ma; harĩ ngiri wa kũmwarĩrĩria, Nĩguo ere mũndũ ũndũ ũrĩa mũrũngĩrĩru,
Nake Yahweh amũiguĩre tha oige atĩrĩ, ‘Mũhonokie ndagathiĩ irima-inĩ! Nĩ nyonete ũkũũri!
Nyama cia mwĩrĩ wake nĩ ciĩthĩhe gũkĩra rĩrĩa aarĩ mũndũ mwĩthĩ; Nĩ acokererũo nĩ matukũ marĩa aarĩ na hinya wa wĩthĩ.’
Nĩ agaathaitha Eloah, nake nĩ akaamwĩtĩkĩra, Na nĩ akoona ũthiũ wake na akene mũno, Na We nĩ agaacokia ũthingu Wake harĩ mũndũ.
Mũndũ ũcio nĩ akeera andũ atĩrĩ, ‘Nĩ njĩhĩtie na ngogomia ũndũ ũrĩa wagĩrĩire, No ndinaamũkĩra ũndũ ũrĩa ngwagĩrĩirũo kwamũkĩra.
Nĩ ahonoketie muoyo wakwa ndũgathiĩ irima-inĩ, Na muoyo wakwa nĩ ũkoona ũtheri.’
Hatarĩ nganja, El nĩ ekaga maũndũ macio mothe Akameka maita merĩ, o na kana matatũ nĩ ũndũ wa mũndũ,
Nĩguo amũrute irima-inĩ, Nĩgetha ũtheri wa muoyo ũmwarĩre.
Tega matũ Ayubu! Thikĩrĩria! Kira na niĩ thiĩ na mbere kwaria.
Angĩkorũo ũrĩ na ũndũ wa kuuga, njokeria. Aria, tondũ nĩ ndĩrenda kuonania atĩ ndũhĩtĩtie.
Angĩkorũo ndũrĩ na ũndũ wa kuuga, wagĩrĩirũo gũũthikĩrĩria; Kira, na nĩ ngũkũruta ũgĩe na ũũgĩ.”