Ayubu 34

Na rĩrĩ, Elihu agĩthiĩ na mbere kwaria akiuga atĩrĩ:

“Thikĩrĩriai ciugo ciakwa, inyuĩ andũ ogĩ; Njiguai, inyuĩ mũĩ maũndũ maingĩ.

Tondũ gũtũ nĩ gũthuthuragia ciugo, O ta ũrĩa rũrĩmĩ rũcamacamaga irio.

Nĩ tũthuthuriei ithuĩ ene tũmenye maũndũ marĩa magĩrĩire; Nĩ tũtuei gatagatĩ-inĩ gaitũ maũndũ marĩa mega.

Nĩ gũkorũo Ayubu oigĩte atĩrĩ, ‘Niĩ ndihĩtĩtie, No El nĩ anyimĩte kĩhooto.

Hihi niĩ no heenanie igũrũ rĩgiĩ ituĩro rĩrĩa njagĩrĩire gũtuĩrũo? O na gũtuĩka niĩ ndihĩtĩtie, kĩronda gĩakwa gĩtingĩhona.’

Nĩ mũndũ ũrĩkũ ũhaana ta Ayubu, Mũndũ ũnyuaga kĩnyũrũri ta arĩ maĩ?

Atwaranaga na arĩa mekaga maũndũ moru Na akagĩa thiritũ na andũ aganu.

Tondũ we oigĩte ũũ, ‘Gũtirĩ ũguni mũndũ onaga Nĩ ũndũ wa kũgeria gũkenia Kĩhoti ũrĩa wa ma.’

Nĩ ũndũ ũcio-rĩ, thikĩrĩriai inyuĩ mũrĩ na ũtaũku: Gũtingĩhoteka Kĩhoti ũrĩa wa ma eke maũndũ ma waganu, Kana El Shaddai eke maũndũ moru!

Tondũ we akaarĩha mũndũ kũringana na maũndũ marĩa ekaga Na amũrehere moimĩrĩro ma mĩthiĩre yake.

Hatarĩ nganja, El ndekaga maũndũ ma waganu; El Shaddai ndogomagia kĩhooto.

Nũũ wamũtuire mũrũgamĩrĩri wa thĩ, Na nũũ wamwamũrire arorage kũrĩa guothe andũ maikaraga?

Angĩerekeria meciria make harĩ o, Na oe roho na mĩhũmũ yao,

Andũ othe no gũkua mangĩkua marĩ hamwe, Na othe macoke rũkũngũ-inĩ.

Kwoguo angĩkorũo ũrĩ na ũtaũku, thikĩrĩria na kinyi ũndũ ũyũ; Tega matũ ũigue ũrĩa nguuga.

Hihi mũndũ ũthũire kĩhooto nĩ agĩrĩire gwathana, Kana mũndũ ũrĩ na ũnene na nĩ mũthingu-rĩ, no ũmũtue mwĩhia?

Hihi no wĩre mũthamaki, ‘Wee ũrĩ wa tũhũ,’ Kana wĩre arĩa marĩ igweta, ‘Inyuĩ mũrĩ aganu’?

Nĩ kũrĩ ũmwe ũtakoragwo na mũthutũkanio harĩ anene Na ũtonaga andũ arĩa atongu marĩ a bata gũkĩra athĩni, Tondũ othe nĩ wĩra wa moko make.

No makue o rĩmwe ũtukũ gatagatĩ; Mainainaga na hinya magacoka magakua; O na arĩa marĩ na ũnene nĩ meheragio, no matieheragio nĩ moko ma andũ.

Tondũ maitho ma Yahweh nĩ maroraga mĩthiĩre ya mũndũ, Na nĩ onaga makinya make mothe.

Gũtirĩ handũ harĩ nduma kana kĩĩruru kĩnene Harĩa andũ arĩa mekaga maũndũ moru mangĩhota kwĩhitha.

Nĩ gũkorũo gũtirĩ hĩndĩ El angĩigĩrĩra mũndũ mũrigo atangĩhota, atĩ nĩguo athiĩ mbere yake aciirithio.

Aniinaga arĩa marĩ ũnene-inĩ atekwamba gũthuthuria Na akaiga andũ angĩ ithenya rĩao.

Tondũ we nĩ oĩ maũndũ marĩa mekaga; Ameheragia ũtukũ, makahehenjeka.

Nĩ amaherithagia nĩ ũndũ wa waganu wao, Ageka ũguo handũ mekuonwo nĩ andũ othe,

Tondũ nĩ matigĩte kũmũrũmĩrĩra Na matitĩĩte njĩra o na ĩmwe yake;

Matũmaga athĩni mamũkaĩre, Nake akaigua kĩrĩro kĩa arĩa matarĩ hinya.

Yahweh angĩkira-rĩ, hihi nĩ kũrĩ mũndũ ũngiuga nĩ ekĩte ũũru? Angĩhitha ũthiũ wake-rĩ, nũũ ũngĩhota kũmuona? O na angĩka ũguo harĩ rũrĩrĩ kana harĩ mũndũ ũmwe, moimĩrĩro mangĩkorũo marĩ mamwe,

Nĩgetha mũndũ ũtetigĩrĩte Yahweh ndagathane Kana aigĩre andũ mĩtego.

Tondũ rĩrĩ, hihi nĩ kũrĩ mũndũ ũngĩra El atĩrĩ, ‘Nĩ herithĩtio o na gũtuĩka hatirĩ ũndũ mũũru njĩkĩte;

Menyithia ũndũ ũrĩa itahotete kuona; Angĩkorũo nĩ njĩkĩte ũndũ o na ũmwe mũũru, ndikawĩka rĩngĩ’?

Hihi nĩ agĩrĩirũo gũkũrĩha kũringana na ũrĩa wee ũkwenda na nĩ ũreganĩte na itua rĩake? Wee nĩwe ũgũtua, ti niĩ. Gũkĩrĩ ũguo-rĩ, njĩĩra maũndũ marĩa ũĩ wega.

Andũ arĩa marĩ na ũtaũku, Mũndũ o wothe ũrĩ na ũũgĩ ũrĩa ũkũnjigua, mekũnjĩra ũũ,

‘Ayubu aragia atarĩ na ũmenyo Na ciugo ciake itikoragwo na ũtaũku.’

Reke Ayubu agerio biũ Tondũ macokio make matariĩ ta ma andũ aganu!

We ongagĩrĩra ũremi harĩ mehia make; Ahũũraga hĩ na kĩnyũrũri arĩ mbere itũ Na akaingĩhia ciugo ciake cia gũũkĩrĩra El!”