Ayubu 35

Elihu agĩthiĩ na mbere kwaria akiuga atĩrĩ:

“Hihi ũrĩ na ma biũ atĩ ndũhĩtĩtie nginya ũkoiga, ‘Ndĩ mũthingu gũkĩra El’?

Nĩ gũkorũo uugĩte atĩrĩ, ‘Ũndũ ũcio ũrĩ na ũguni ũrĩkũ harĩ wee? Nyonete ũguni ũrĩkũ gũkĩra rĩrĩa ingĩtũire njĩhagia?’

Nĩ ngũgũcokeria O hamwe na arata acio aku mũrĩ nao.

Ta rora igũrũ wone, Ũrore matu marĩa marĩ kũraihu mũno igũrũ rĩaku.

Ũngĩĩhia-rĩ, ũndũ ũcio ũngĩmũtuurithia atĩa? Ũngĩingĩhia mehia maku-rĩ, nĩ ũndũ ũrĩkũ ũngĩmwĩka?

Ũngĩkorũo ũrĩ mũthingu-rĩ, nĩ kĩĩ ũmũheaga; Nĩ kĩĩ amũkagĩra kuuma kũrĩ wee?

Waganu waku ũhutagia o mũndũ tawe, Na ũthingu waku ũkahutia o mũrũ wa mũndũ.

Andũ nĩ makayaga rĩrĩa maahinyĩrĩrio mũno; Magakaya makĩhoya ũteithio nĩ ũndũ wa kũhinyĩrĩrio nĩ arĩa marĩ na hinya.

No gũtirĩ mũndũ ũũragia atĩrĩ, 'Eloah arĩ kũ, o ũcio Mũũmbi wakwa, O we ũtũmaga kũinwo nyĩmbo ũtukũ?’

Atũrutaga maũndũ maingĩ gũkĩra nyamũ cia gũkũ thĩ, Na agatũma tũgĩe na ũũgĩ gũkĩra nyoni cia rĩera-inĩ.

Andũ mamũkayagĩra, no we ndamacokagĩria, Tondũ wa mwĩtĩo wa andũ arĩa aganu.

Hatarĩ nganja El ndaiguaga kĩrĩro gĩa tũhũ; El Shaddai ndatindanagĩra nakĩo.

Na githĩ to age gũkũigua o na makĩria, rĩrĩa ũrateta atĩ ndũramuona! Ciira waku ũrĩ mbere yake, kwoguo wagĩrĩirũo kũmweterera ũtegũthethũka.

Nĩ gũkorũo we ndagũciirithĩtie arĩ na marakara; Kana agatindanĩra na ciugo ciaku itarĩ cia ũũgĩ.

Ayubu atumũraga kanua gake biũ o tũhũ; Na akaria ciugo nyingĩ atarĩ na ũmenyo.”