Ayubu 37

“Rĩu ngoro yakwa nĩ ĩrahũũra mũno Na ĩkarũga ĩkoima harĩa ĩkoragwo.

Thikĩrĩria na kinyi mũraramo wa mũgambo wake Na mũrurumo ũrĩa uumaga kanua-inĩ gake.

Atũmaga ũiguĩke rungu rwa igũrũ guothe Na agatũma rũheni rwake rũkinye ituri-inĩ ciothe cia thĩ.

Thutha ũcio gũkaiguĩka mũraramo; Akaruruma na mũgambo mũnene mũno, Na ndagiragĩrĩria rũheni rĩrĩa mũgambo wake waiguĩka.

El arurumaga na mũgambo wake na njĩra ya magegania; Ekaga maũndũ manene tũtangĩhota gũtaũkĩrũo nĩmo.

Nĩ gũkorũo eraga mbarabu atĩrĩ, ‘Itĩka thĩinĩ wa thĩ,’ Nayo mbura akamĩra ũũ, ‘Ura na hinya.’

We nĩ arũgamagia mawĩra mothe ma andũ Nĩgetha wĩra wake ũmenyeke nĩ mũndũ o wothe.

Nyamũ cia gĩthaka itonyaga marima-inĩ ma cio Na igaikara imamo-inĩ ciacio.

Rũhuho rũnene rũhurutanaga ruumĩte kanyũmba-inĩ karuo, Nayo heho ĩkarehwo nĩ huho cia mwena wa rũgongo.

Mĩhũmũ ya El nĩ ĩtũmaga kũgĩe na mbarabu, Namo maĩ makaheha makanyitana kũrĩa maaramĩire.

Yahweh aritũhagia matu na ũigũ; Na akahurunja rũheni rwake matu-inĩ;

Matu macio mathiũrũrũkaga kũrĩa guothe amatongoragia; Na makahingia ũndũ o wothe amaathaga thĩinĩ wa thĩ ĩrĩa ĩikaragwo.

Ahũthagĩra matu kũrehe iherithia, kuuria mbura thĩinĩ wa bũrũri, O na kuonania maũndũ make na ũtugi.

Thikĩrĩria ũndũ ũyũ Ayubu; Tithia wĩcũranie biũ ũhoro wa mawĩra ma magegania ma El.

Hihi wee nĩ ũĩ ũrĩa Eloah atongoragia matu Na ũrĩa atũmaga rũheni rũhenũke ruumĩte itu-inĩ rĩake?

Hihi nĩ ũĩ ũrĩa matu mareraga rĩera-inĩ? Macio nĩ mawĩra ma magegania ma ũcio ũrĩ ũmenyo mũkinyanĩru.

Nguo ciaku-rĩ, nĩ kĩĩ gĩtũmaga ihiũhe Na hĩndĩ ĩyo thĩ ĩkirĩte ki nĩ ũndũ wa rũhuho rwa mwena wa mũhuro?

Hihi no ũhote gũtambũrũkia matu ta ũrĩa ekaga O macio makoragwo momĩte ta gĩcicio gĩa cuma?

Twĩre ũrĩa twagĩrĩirũo kũmwĩra; Tũtingĩhota gũcokia tondũ tũrĩ nduma-inĩ.

Hihi nĩ agĩrĩire kwĩrũo atĩ nĩ ndĩrenda kwaria nake? Kana hihi nĩ harĩ mũndũ uugĩte ũndũ agĩrĩire kwĩrũo?

Matingĩhota kuona nginya ũtheri, O na gũtuĩka nĩ ũcangararĩte igũrũ, O nginya rũhuho rũhĩtũke na rweherie matu.

Mwena wa rũgongo kuumaga riri ũtariĩ ta wa thahabu; Ũnene wa Eloah nĩ wa magegania mũno.

Tũtingĩhota gũtaũkĩrũo nĩ El Shaddai; We nĩ arĩ hinya mũingĩ, Na gũtirĩ hĩndĩ agararaga kĩhooto gĩake na ũthingu wake mũingĩ.

Nĩ ũndũ ũcio-rĩ, andũ nĩ magĩrĩirũo kũmwĩtigĩra. Tondũ we ndakenagio nĩ andũ arĩa meyonaga marĩ ogĩ.”