Ayubu 38

Nake Yahweh arĩ kĩhuhũkanio-inĩ akĩarĩria Ayubu akĩmwĩra atĩrĩ:

“Nũũ ũyũ ũrekĩra ũtaaro wakwa nduma Na akaria atarĩ na ũmenyo?

Ta wĩhotore ta mũndũrũme; Nĩ ngũkũũria ciũria, nawe ũnjokerie.

Wee-rĩ, warĩ kũ rĩrĩa ndakire mĩthingi ya thĩ? Njĩĩra angĩkorũo nĩ ũrona ta ũngĩmenya.

Nũũ waigire ithimi ciayo, angĩkorũo nĩ ũĩ, Kana nũũ watambũrũkirie rũrigi rwa gũthima igũrũ rĩayo?

Itugĩ ciayo-rĩ, ciaigĩrĩirũo igũrũ rĩa kĩĩ, Kana nũũ waigire ihiga rĩayo rĩa kona,

Rĩrĩa njata cia rũcinĩ cianĩrĩire hamwe ikenete, Na ariũ a Kĩhoti ũrĩa wa ma othe makĩambĩrĩria kwanĩrĩra makenete?

Ningĩ nũũ wahingĩrĩirie iria akĩrĩigĩra mĩrango Hĩndĩ ĩrĩa rĩatumũkire kuuma kĩhumo-inĩ kĩarĩo,

Rĩrĩa ndarĩhumbire matu Na ngĩrĩthaya thĩinĩ wa nduma ndumanu,

Hĩndĩ ĩrĩa ndarĩigĩire mĩhaka Na ngĩĩkĩra mĩgamba na mĩrango yarĩo,

Ngiuga atĩrĩ, ‘No ũũkage nginya haha, no ndũkanakĩre ho; Haha nĩho makũmbĩ maku manene marĩkinyaga’?

Hihi nĩ ũrĩ watha rũcinĩ rũkĩe Kana ũkĩonia ũtheri wa rũcinĩ harĩa ũriumagĩra,

Nĩgetha ũkinye ituri-inĩ cia thĩ Na ũinainie arĩa aganu moime thĩinĩ wayo?

Thĩ ĩgarũrũkaga ta rĩũmba rĩrĩ rungu rwa mũhũũri, Na indo iria irĩ thĩinĩ wayo ikoneka wega ta magemio ma nguo.

No ũtheri wa andũ arĩa aganu nĩ weheragio harĩ o, Na guoko kwao kũrĩa kwambararĩtio na igũrũ gũkoinwo.

Hihi nĩ ũrĩ waikũrũka na thĩ kũrĩa iria riumaga Kana ũgaceera maĩ-inĩ marĩa mariku?

Hihi nĩ ũguũrĩirio ihingo cia gĩkuũ, Kana ũkona ihingo cia nduma nene?

Wee-rĩ, nĩ ũmenyete wariĩ wa thĩ? Njĩĩra angĩkorũo nĩ ũĩ maũndũ macio mothe.

Ũtheri ũikaraga mwena ũrĩkũ? Nakĩo gĩikaro kĩa nduma gĩkoragwo kũ,

Atĩ nĩguo ũcitware kũrĩa cikaraga Na ũmenye tũcĩra twa gũthiĩ mũciĩ wacio?

Hihi ũmenyete maũndũ macio tondũ warĩ mũciare Na mũigana wa mĩaka yaku nĩ mũnene?

Nĩ ũrĩ waingĩra thitoo iria cigagwo mbarabu, Kana ũkona thitoo iria cigagwo mbura ya mbembe,

Iria njigĩte nĩ ũndũ wa ihinda rĩa thĩna, Nĩ ũndũ wa mũthenya wa kũrũa na wa mbaara?

Ũtheri-rĩ, uumaga mwena ũrĩkũ ũgakinya kũndũ guothe, Naruo rũhuho rwa irathĩro rũhurutanaga thĩinĩ wa thĩ ruumĩte kũ?

Nũũ wenjeire mũiyũro mũtaro Na agĩthondeka njĩra ya kĩhuhũkanio na marurumĩ,

Nĩgetha mbura yurage kũrĩa gũtaikaragwo nĩ mũndũ, Werũ-inĩ kũrĩa gũtarĩ andũ,

Nĩguo kũndũ kũrĩa kwanangĩku na gũtiganĩrie kũhũnio Na ĩtũme nyeki ĩmere?

Hihi mbura nĩ ĩrĩ ithe, Kana nũũ waciarire mataata ma ime?

Nayo mbarabu-rĩ, yoimire thĩinĩ wa nda ya ũ, Na nũũ waciarire mbaa ĩrĩa yumaga igũrũ

Rĩrĩa maĩ makoragwo mahaana ta mahumbĩirũo na ihiga, Na maĩ ma kũndũ kũrĩa kũriku makaheha makanyitana?

Hihi no ũhote kuoha mĩkanda ya gĩkundi kĩa njata kĩrĩa gĩtagwo Kima Kana wohore mĩkanda ya gĩkundi kĩrĩa gĩtagwo Kesili?

Hihi no ũhote gũtongoria gĩkundi kĩa njata ihinda rĩakĩo rĩakinya Kana ũtongorie gĩkundi kĩrĩa gĩtagwo Ashi hamwe na ariũ akĩo?

Wee-rĩ, nĩ ũĩ mawatho marĩa matongoragia igũrũ, Kana hihi no ũhote gwathana atĩ mawatho macio mahũthagĩrũo thĩinĩ wa thĩ?

Hihi no ũhote kwanĩrĩra mũgambo waku ũkinye matu-inĩ Nĩgetha kũgĩe mũiyũro wa maĩ ũkũhumbĩre?

Wee-rĩ, no ũhote gũtũma heni ithiĩ ikarute wĩra wacio? Na thutha ũcio icoke kũrĩ wee ikwĩre, ‘Nĩ twacoka!’

Nũũ wekĩrire ũũgĩ thĩinĩ wa matu Kana agĩtũma indo iria irĩ igũrũ igĩe na ũtaũku?

Nũũ ũrĩ na ũũgĩ mũingĩ ũũ atĩ no ahote gũtara matu, Kana nũũ ũngĩhota kũng’aũrania ndigithũ cia maĩ iria irĩ igũrũ,

Rĩrĩa rũkũngũ rwatuĩka ndoro Na ngũmba cia tĩri cianyitana?

Hihi no ũhote gũcarĩria mũrũthi kĩndũ gĩa kũrĩa Kana ũhũnie mĩrũthi mĩthĩ

Rĩrĩa ĩkomereire imamo-inĩ ciayo Kana rĩrĩa ĩikarĩte yohetie marima-inĩ mayo?

Nũũ ũhaaragĩria ihuru irio Rĩrĩa tũcui twacio twakaĩra El Na tũkorũra nĩ ũndũ wa kwaga kĩndũ gĩa kũrĩa?