Ayubu 39

“Hihi nĩ ũĩ hĩndĩ ĩrĩa mbũri cia irĩma-inĩ iciaraga? Ũrĩ werorera thwariga igĩciara twana twacio?

Hihi nĩ ũtaraga mĩeri ĩrĩa iniinaga ingĩgaciara? Nĩ ũĩ hĩndĩ ĩrĩa iciaraga?

Cinamagĩrĩra rĩrĩa iraciara twana twacio, Na ruo rwacio rwa gũciara rũgathira.

Twana twacio tũgĩaga na hinya na tũgakũrĩra werũ-inĩ; Rĩrĩa twoimagara, tũticokaga kũrĩ cio.

Nũũ warekereirie ndigiri ya gĩthaka, Na nũũ wohorire mĩkanda ya ndigiri ya gĩthaka?

Werũ ũrĩa mwaraganu nĩguo nduĩte mũciĩ wayo Na bũrũri ũrĩa ũrĩ cumbĩ ngaũtua gĩikaro kĩayo.

Ĩnyũrũragia inegene rĩrĩa rĩrĩ thĩinĩ wa itũũra; Na ndĩiguaga inegene rĩa mũndũ ũrĩa ũrutithagia nyamũ wĩra.

Yũrũraga irĩma-inĩ ĩgĩetha gĩa kũrĩa, Ĩgacaria ihuti o rĩothe iruru.

Hihi ndegwa ya gĩthaka no ĩtĩkĩre gũkũrutĩra wĩra? Hihi no ĩraare kiugũ-inĩ gĩaku?

Hihi no ũhote kuoha ndegwa ya gĩthaka na mũkanda nĩguo ĩgũtemere mĩtaro, Kana hihi no ĩkũrũmĩrĩre ũgĩthiĩ kũrĩma mũkuru-inĩ?

Hihi no wĩhoke hinya wayo mũingĩ Ĩkũrutĩre wĩra waku ũrĩa mũritũ?

Hihi no ũmĩĩhoke ĩkũrehere magetha maku, Na hihi no ĩmacokanĩrĩrie kĩhuuhĩro-inĩ gĩaku?

Mathagu ma nyaga nĩ mabatabataga nĩ gũkena, No hihi njoya na mathagu mayo no iringithanio na cia njũũ?

Nĩ gũkorũo ĩtigaga matumbĩ mayo tĩri-inĩ, Na ĩkamaiga rũkũngũ-inĩ nĩguo magĩe ũrugarĩ.

Ĩkariganirũo atĩ no makinywo na magũrũ makue Kana nyamũ ya gĩthaka ĩmarangĩrĩrie thĩ.

Ĩĩkaga twana twayo ũũru ta tũtarĩ twayo; Ndĩĩtigagĩra atĩ wĩra wayo no ũtuĩke wa tũhũ.

Nĩ gũkorũo Eloah nĩ amĩimĩte ũũgĩ Na ndamĩheete ũtaũku.

No rĩrĩa yarahũka na ĩkabatabata mathagu mayo, Ĩthekagĩrĩra mbarathi na mũmĩtwarithia.

Hihi wee nĩwe ũheaga mbarathi hinya wayo? Hihi nĩwe ũmĩĩkĩraga mũreera ũcio ĩinagia ngingo-inĩ?

Hihi no ũhote gũtũma ĩrũge ta ũrĩa ngigĩ irũgaga? Mũhuhĩrie wayo nĩ wa kũmakania.

Ĩhuragia thĩ mũkuru-inĩ na ĩkarũgarũga nĩ ũndũ wa hinya; Ĩgateng’era ĩthiĩ mbaara-inĩ.

Ĩthekagĩrĩra guoya na gũtirĩ kĩndũ ĩĩtigagĩra. Ndĩcokaga na thutha atĩ tondũ wa rũhiũ rwa njora.

Thiaka ũgambaga ũrĩ mwena-inĩ wayo, Narĩo itimũ na mũguĩ ikahenia.

Ĩinainaga nĩ ũndũ wa kũhĩahĩa, na ĩgateng’era na mbere, Ndĩngĩrũgama ĩkindĩirie thutha wa kũigua mũgambo wa coro.

Rĩrĩa coro wahuuhwo, yugaga atĩrĩ, ‘Aha!’ Ĩiguaga mũnungo wa mbaara ĩrĩ o kũraihu Na ĩkaigua mĩgambo ya anene a mbũtũ na mbugĩrĩrio ya mbaara.

Hihi ũtaũku waku nĩguo ũtũmaga rwĩgĩ rũmbũke, Rũgatambũrũkia mathagu maruo na mwena wa mũhuro?

Kana nĩwe wathaga nderi yũmbũke na igũrũ Na ĩgaka gĩtara kĩayo kũndũ kũraihu igũrũ,

Ĩkaraaraga kĩharũrũka-inĩ igũrũ, Na ĩgaikaraga ndũmba-inĩ ya harĩa harĩ na mwĩgitio?

Ĩcaragia irio ĩrĩ hau; Maitho mayo monaga kũndũ kũraya mũno.

Tũcui twayo tũnyuaga thakame; Na harĩa harĩ ciimba, hau nĩho ĩkoragwo.”