Ayubu 40
Na rĩrĩ, Yahweh agĩthiĩ na mbere kwarĩria Ayubu akĩmwĩra atĩrĩ:
“Hihi mũndũ ũcaragĩrĩria mahĩtia nĩ agĩrĩirũo gũtetia El Shaddai? Mũndũ ũrĩa ũrenda kũrũnga Eloah-rĩ, nĩ acokie.”
Nake Ayubu agĩcokeria Yahweh akĩmwĩra ũũ:
“Atĩrĩrĩ, niĩ ndĩ mũndũ ũtarĩ bata. Ingĩgĩgũcokeria ngwĩre atĩa? Nĩ ndahumbĩra kanua gakwa na guoko.
Nĩ ndaririe riita rĩa mbere, no ndigũcokia rĩngĩ; O na ngĩaria rĩa kerĩ, no gũtirĩ ũndũ ũngĩ nguuga.”
Nake Yahweh arĩ kĩhuhũkanio-inĩ agĩcokeria Ayubu akĩmwĩra atĩrĩ:
“Ta wĩhotore ta mũndũrũme; Nĩ ngũkũũria ciũria, nawe ũnjokerie.
Kaĩ ũrenda gwĩkĩrĩra nganja kĩhooto gĩakwa? Hihi ũrenda kũndua mwĩhia nĩgetha ũtuĩke atĩ ndũhĩtĩtie?
Guoko gwaku-rĩ, hihi nĩ kũrĩ hinya ta kwa El, Kana hihi mũgambo waku no ũrurume ta wake?
Ta wĩgemie na riri na ũnene; Wĩhumbe gĩtĩo na ũkaru.
Rekereria marakara maku marũrũ; Ũrore mũndũ o wothe mwĩtĩi ũmũcokie thĩ.
Ũrore mũndũ o wothe mwĩtĩi, ũmũnyihie, Na ũrangĩrĩrie andũ arĩa aganu o harĩa marũgamĩte.
Ũmahithe tĩri-inĩ othe; Ũmohe kũndũ kũrĩa kwĩhithĩte,
Ũngĩka ũguo, o na niĩ no njĩtĩkanie nawe Atĩ guoko gwaku kwa ũrĩo no gũkũhonokie.
Ta rora nyamũ ĩrĩa ĩtagwo Behemothu, o ĩyo ndombire ta ũrĩa ndakũmbire. Ĩrĩaga nyeki o ta ndegwa.
Ta rora hinya ũrĩa ũrĩ njohero-inĩ yayo Na ũhoti ũrĩa ũrĩ mĩkiha-inĩ ya nda yayo!
Yũmagia mũting’oe wayo ta mũtarakwa; Mĩkiha ĩrĩa ĩrĩ njohero-inĩ yayo ĩkoragwo yohanĩtio hamwe.
Mahĩndĩ mayo mahaana ta mĩberethi ya gĩcango; Ciĩga ciayo ihaana ta ithondeketwo na kĩgera.
Nĩyo ya mbere harĩ mawĩra ma El; Mũũmbi wayo nowe ũngĩhota kũmĩkuhĩrĩria arĩ na rũhiũ rwake rwa njora.
Irĩma nĩ irutaga irio ciayo, Kũrĩa nyamũ ciothe cia gĩthaka ithaakagĩra.
Ĩkomaga ihinga-inĩ, Ĩgaikara ĩĩgitĩtie mathanjĩ-inĩ kũrĩa kũrĩ na itomboya.
Ihinga icio nĩ imĩheaga kĩĩruru, Nayo mĩtĩ ya mĩcũgũcũgũ ya mũkuru-inĩ ĩkamĩrigicĩria.
O na rũũĩ rũngĩkorũo rũgĩtherera na hinya, ndĩmakaga. Ĩkoragwo na ũmĩrĩru o na maĩ ma rũuĩ ta rwa Jordani mamĩtumbuthũkĩra kinya o kanua-inĩ.
Gũkĩrĩ mũndũ ũngĩmĩnyita rĩrĩa ĩĩhũgĩte,kana amĩtũre mũniũrũ amĩikie kĩana kĩa rũrigi?