Danieli 5

Ha ũhoro wĩgiĩ Mũthamaki Belishazaru, nĩ aarugithirie iruga inene nĩ ũndũ wa andũ ake ngiri ĩmwe arĩa maarĩ igweta, na nĩ kũnyua aanyuaga ndibei arĩ mbere yao

Hĩndĩ ĩyo arĩ mũrĩĩu, Belishazaru nĩ aarutire watho areherũo indo cia thahabu na cia betha iria ithe Nebukadineza oete hekarũ-inĩ thĩinĩ wa Yahrushalayim, nĩgetha mũthamaki na andũ ake arĩa maarĩ igweta na thuriya ciake na aka acio angĩ ake macinyuĩre

Nao makĩrehe indo cia thahabu iria cioetwo kuuma hekarũ-inĩ ya nyũmba ya Kĩhoti kũu Yahrushalayim, na mũthamaki na andũ ake arĩa maarĩ igweta, thuriya ciake na aka acio angĩ ake magĩcinyuĩra

Magĩkĩnyua ndibei, na makĩgooca ihoti cia thahabu na betha, cia gĩcango, cia kĩgera, cia mbaũ, na cia mahiga.

Hĩndĩ o ro ĩyo ciara cia guoko kwa mũndũ ikiumĩra na ikĩambĩrĩria kwandĩka rũthingo-inĩ rwa nyũmba ya mũthamaki hakuhĩ na mũtĩ wa kũigĩrĩrũo matawa, na mũthamaki nĩ oonaga mwena wa na thutha wa guoko kũu hĩndĩ ĩyo kwandĩkaga

Hĩndĩ ĩyo mũthamaki agĩthita gĩthithi na meciria make magĩtũma etigĩre, namo magũrũ make makĩinaina na maru make makĩambĩrĩria kũgũthana.

Mũthamaki akĩanĩrĩra akiuga atĩ ago, Akalidei, na atuĩria a njata metwo. Mũthamaki akĩĩra andũ acio ogĩ a Babuloni ũũ: “Mũndũ ũrĩa ũgũthoma maandĩko maya na andaarĩrie ũrĩa moigĩte nĩ ekũhumbwo nguo ya papũ, na ekĩrũo mũgathĩ wa thahabu ngingo, na arĩathanaga arĩ wa gatatũ ũthamaki-inĩ.”

Nao andũ acio othe ogĩ a mũthamaki magĩkĩingĩra, no matiahotire gũthoma maandĩko macio kana gũtaarĩria mũthamaki ũrĩa mooigĩte

Nĩ ũndũ ũcio Mũthamaki Belishazaru agĩĩtigĩra mũno na ũthiũ wake ũgĩthita; nao andũ ake arĩa maarĩ igweta magĩtukanĩrũo.

Nake nyina wa mũthamaki akĩingĩra nyũmba ĩyo ya iruga nĩ ũndũ wa ciugo cia mũthamaki na cia andũ ake arĩa maarĩ igweta. Nyina wa mũthamaki akiuga: “Atĩrĩrĩ wee mũthamaki, ũrotũũra tene na tene. Ndũkareke meciria maku matũme wĩtigĩre, kana ũreke ũthiũ waku ũthite

Ũthamaki-inĩ waku nĩ kũrĩ mũndũ ũkoragwo na roho wa Kĩhoti ũrĩa mwamũre. Matukũ-inĩ ma thoguo, ũmenyo na ũtaũku na ũũgĩ ũtariĩ ta ũũgĩ wa Kĩhoti nĩ woonekire thĩinĩ wake. Nake thoguo Mũthamaki Nebukadineza akĩmwamũra atuĩke mũnene wa ago, aragũri, Akalidei, na atuĩria a njata; ũguo nĩguo thoguo eekire, wee mũthamaki

Danieli, o ũcio mũthamaki eetire Beliteshazaru, aarĩ na roho wa mwanya na ũmenyo na ũtaũku wa gũtaũra iroto, gũtaarĩria thimo, na gũtuithania maũndũ marĩa maritũ. Rĩu-rĩ, reke Danieli etwo, na nĩ egũgũtaarĩria ũrĩa maandĩko macio moigĩte.”

Nĩ ũndũ ũcio Danieli akĩrehwo mbere ya mũthamaki. Mũthamaki akĩũria Danieli atĩrĩ: “Wee nĩwe Danieli ũmwe wa andũ arĩa maathamĩirio gũkũ kuuma Yahuda, arĩa baba o ũcio warĩ mũthamaki aarutire Yahuda

Nĩ njiguĩte ũhoro waku atĩ roho wa Kĩhoti ũrĩ thĩinĩ waku na atĩ ũmenyo na ũtaũku na ũũgĩ wa mwanya nĩ cionekete thĩinĩ waku

Rĩu one, andũ arĩa ogĩ na aragũri nĩ marehetwo mbere yakwa nĩguo mathome maandĩko maya na mandaarĩrie ũrĩa moigĩte, no nĩ maremetwo gũtaarĩria ũrĩa ndũmĩrĩri ĩno yugĩte

No nĩ njiguĩte ũhoro waku, atĩ no ũhote gũtaũra o na gũtuithania maũndũ marĩa maritũ. Rĩu-rĩ, angĩkorũo nĩ ũkũhota gũthoma maandĩko maya na kũndaarĩria ũrĩa moigĩte, ũkũhumbwo nguo ya papũ, na wĩkĩrũo mũgathĩ wa thahabu ngingo, na wathanage ũrĩ wa gatatũ ũthamaki-inĩ.”

Nake Danieli akĩĩra mũthamaki atĩrĩ: “Iheo ciaku no ũikare nacio na ngerenwa ciaku ũhe andũ angĩ. Ĩndĩ nĩ ngũthomera mũthamaki maandĩko maya na ndĩmũtaarĩrie ũrĩa moigĩte

Ha ũhoro waku wee mũthamaki-rĩ, Kĩhoti Ũrĩa ũrĩ Igũrũ Mũno nĩ aaheire thoguo Nebukadineza ũthamaki, ũnene, gĩtĩo, o na hinya

Nĩ ũndũ wa ũnene ũrĩa aamũheire, ikundi ciothe cia andũ, ndũrĩrĩ, na andũ a thiomi itiganĩte nĩ maainainaga nĩ guoya marĩ mbere yake. Ooragaga mũndũ o wothe ekwenda kũũraga, na mũndũ o wothe ekwenda atũũre muoyo akareka atũũre, ningĩ nĩ aatũũgagĩria kana agaconorithia mũndũ o wothe ũrĩa ekwenda

No rĩrĩa ngoro yake yagĩire na mwĩtĩo na akĩũmia roho wake, na kwoguo agĩka maũndũ na mwĩĩkĩrĩro, nĩ aagũithirio kuuma gĩtĩ-inĩ kĩa ũnene kĩa ũthamaki wake, na akĩehererio gĩtĩo gĩake

Akĩingatwo gatagatĩ-inĩ ka andũ, na ngoro yake ĩgĩtuwo o ta ya nyamũ, na gĩikaro gĩake kĩarĩ hamwe na ndigiri cia gĩthaka. Aaheagwo nyeki arĩe o ta ndegwa, na mwĩrĩ wake waihũgagio nĩ ime rĩa igũrũ, nginya rĩrĩa aamenyire atĩ Kĩhoti Ũrĩa ũrĩ Igũrũ Mũno nĩ Mwathi ũthamaki-inĩ wa andũ na atĩ aũheanaga kũrĩ mũndũ o wothe ũrĩa ekwenda.

“Ĩndĩ wee Belishazaru mũrũ wake, o na gũtuĩka nĩ ũĩ maũndũ macio mothe, ngoro yaku ndĩonanĩtie wĩnyihia

Handũ ha ũguo, nĩ gwĩtũũgĩria wĩtũũgĩrĩtie harĩ Mwathi wa igũrũ, na ũkoiga ũreherũo indo cia nyũmba yake. Nawe hamwe na andũ aku arĩa marĩ igweta, thuriya ciaku na aka acio angĩ aku mũgacihũthĩra kũnyua ndibei na mũkagooca ihoti cia betha na thahabu, cia gĩcango, cia kĩgera, cia mbaũ, na cia mahiga, ihoti iria itangĩona na itangĩigua na itangĩmenya ũndũ. Ĩndĩ ndũgoocithĩtie Kĩhoti ũrĩa ũkoragwo anyitĩte mĩhũmũ yaku o na njĩra ciaku ciothe guoko-inĩ gwake

Kwoguo Kĩhoti nĩwe ũtũmire guoko kũu, na maandĩko maya mandĩkwo

Na maya nĩmo maandĩko marĩa mandĩkĩtwo: MENE, MENE, TEKEL, na UPHARSIN.

“Ciugo icio ciugĩte ũũ: MENE, Kĩhoti nĩ atarĩte matukũ ma ũthamaki waku na agatũma ũkinye mũthia.

“TEKEL, wee nĩ ũthimĩtwo na ratiri na ũkoneka atĩ nĩ ũtigairie.

“PERES, ũthamaki waku nĩ ũgayanĩtio na ũkaneanwo kũrĩ Amedi na Aperisia.”

Nake Belishazaru agĩathana, nao makĩhumba Danieli nguo ya papũ na makĩmwĩkĩra mũgathĩ wa thahabu ngingo; na makĩmenyithania ũhoro wake atĩ nĩwe ũrĩathanaga arĩ wa gatatũ ũthamaki-inĩ.

Ũtukũ o ro ũcio, Belishazaru mũthamaki ũcio wa Akalidei akĩũragwo

Nake Dario ũrĩa Mũmedi agĩtuĩka mũthamaki; aarĩ na mĩaka ta 62.