Ezara 10

Rĩrĩa Ezara aahoyaga akiumbũraga mehia, akĩrĩraga akomete aturumithĩtie mũtwe thĩ mbere ya nyũmba ya Kĩhoti ũrĩa wa ma, kĩrĩndĩ kĩnene kĩa andũ a Isiraeli kĩa arũme, andũ-a-nja, o na ciana gĩgĩcokanĩrĩra harĩ we, tondũ andũ nĩ maarĩraga mũno

Nake Shekania mũrũ wa Jehieli wa ariũ a Elamu akĩĩra Ezara atĩrĩ: “Nĩ twagĩte wĩhokeku harĩ Kĩhoti witũ nĩ ũndũ wa kũhikia atumia a kũngĩ kuuma kũrĩ andũ a bũrũri. O na kũrĩ ũguo, no kũrĩ na kĩĩrĩgĩrĩro harĩ Isiraeli

Rĩu rekei tũgĩe na kĩrĩkanĩro hamwe na Kĩhoti witũ nĩgetha tũingate atumia acio othe hamwe na ciana iria maciarĩte, kũringana na uuge wa Yahweh na wa arĩa metigagĩra rĩathani rĩa Kĩhoti witũ. Rekei twĩke kũringana na Watho

Ũkĩra, tondũ wee nĩwe wĩhokeirũo ũndũ ũcio, na ithuĩ tũrĩ hamwe nawe. Gĩa na hinya na woe ikinya.”

Hĩndĩ ĩyo Ezara agĩũkĩra na akĩĩra anene a athĩnjĩri-Yahweh, Alawii, na andũ a Isiraeli othe mehĩte mwĩhĩtwa wa gwĩka maũndũ mothe marĩa mooigĩtwo. Kwoguo makĩĩhĩta mwĩhĩtwa

Ezara agĩgĩũkĩra hau mbere ya nyũmba ya Kĩhoti ũrĩa wa ma agĩthiĩ kanyũmba-inĩ ka Jehohanani mũrũ wa Eliashibu. O na gũtuĩka nĩ aathiire kũu, ndaigana kũrĩa irio kana kũnyua maĩ, nĩ gũkorũo nĩ aacakayaga tondũ wa wagarari watho wa andũ acio maarĩ ithamĩrio.

Magĩcoka makĩanĩrĩra Yahuda na Yahrushalayim guothe atĩ andũ acio othe mooimĩte ithamĩrio macemanie Yahrushalayim;

na kũringana na itua rĩa anene na athuri, mũndũ o wothe ũngĩaregire gũka ihinda-inĩ rĩa thikũ ithatũ, aangĩatunyirũo indo ciake ciothe, na aingatwo kuuma kĩũngano-inĩ kĩa andũ acio maarĩ ithamĩrio

Nĩ ũndũ ũcio arũme othe a Yahuda na Benjamini magĩcemania Yahrushalayim mĩthenya ĩyo ĩtatũ ĩtanathira, mweri wa kenda, mũthenya wa 20 wa mweri ũcio. Andũ othe maaikarĩte nja ya nyũmba ya Kĩhoti ũrĩa wa ma, makĩinainaga nĩ ũndũ wa ũndũ ũcio na nĩ ũndũ wa mbura nene ĩrĩa yarĩ kuo.

Ezara ũcio mũthĩnjĩri-Yahweh agĩcoka agĩũkĩra akĩmeera ũũ: “Nĩ mwagararĩte watho nĩ ũndũ wa kũhikia andũ-a-nja a kũngĩ, na kwoguo mũkongerera mehia ma Isiraeli

Rĩu umbũrai mehia kũrĩ Yahweh Kĩhoti wa maithe manyu ma tene na mwĩke wendi wake. Mwĩyamũraniei na andũ a bũrũri na kuuma harĩ aka aya a kũngĩ.”

Nĩ ũndũ ũcio kĩũngano kĩu gĩothe gĩgĩcokia ũũ na mũgambo mũnene: “Nĩ tũgwĩka o ta ũguo woiga

O na kũrĩ ũguo, andũ aya nĩ aingĩ, na nĩ ihinda rĩa mbura. Andũ matingĩhota kũrũgama nja, na ũndũ ũyũ ndũkuoya mũthenya ũmwe kana ĩĩrĩ, tondũ nĩ tũremete na njĩra nene mũno ũhoro-inĩ ũcio

Kwoguo, twagũthaitha ũreke anene marũgamĩrĩre kĩũngano gĩothe; na ũreke arĩa othe mahikĩtie andũ-a-nja a kũngĩ thĩinĩ wa matũũra maitũ moke ihinda rĩrĩa rĩamũrĩtwo, marĩ hamwe na athuri na aciirithania a itũũra o itũũra, nginya tweherie marakara manene ma Kĩhoti witũ kuuma harĩ ithuĩ ũhoro-inĩ ũcio.”

Ĩndĩ Jonathani mũrũ wa Asaheli, na Jahazeia mũrũ wa Tikiva makĩregana na ũndũ ũcio, na Meshulamu na Shabethai arĩa maarĩ Alawii makĩmanyita mbaru

No andũ acio mooimĩte ithamĩrio magĩka ũndũ ũcio waiguithanĩirio; na Ezara ũcio mũthĩnjĩri-Yahweh na arĩa maarĩ ciongo cia mbarĩ cia nyũmba cia maithe mao, arĩa othe maagwetirũo na marĩĩtwa, magĩcemania handũ mwanya mũthenya wa mbere wa mweri wa ikũmi nĩguo marĩrĩrie ũndũ ũcio;

na gũkinyĩria mũthenya wa mbere wa mweri wa mbere makĩrĩkia gũthuthuria arũme othe arĩa maahikĩtie aka a kũngĩ

Na nĩ kuoonekire atĩ amwe harĩ ariũ a athĩnjĩri-Yahweh nĩ maahikĩtie aka a kũngĩ: kuuma harĩ ariũ a Jeshua mũrũ wa Jehozadaku na ariũ a ithe, Maaseia, Eliezeri, Jaribu, na Gedalia

No nĩ mooigire nĩ mekũingata atumia ao, na tondũ nĩ maahĩtĩtie, nĩ maarutire ndũrũme ĩmwe kuuma harĩ rũũru nĩ ũndũ wa mehia mao.

Kuuma harĩ ariũ a Imeri, maarĩ Hanani na Zebadia;

na kuuma harĩ ariũ a Harimu, nĩ Maaseia, Eliyah, Shemaia, Jehieli, na Uzia;

na kuuma harĩ ariũ a Pashuru, nĩ Elioenai, Maaseia, Ishumaeli, Nethaneli, Jozabadu, na Eleasa

Na kuuma harĩ Alawii, maarĩ Jozabadu, Shimei, Kelaia (nĩwe Kelita), Pethahia, Yahuda, na Eliezeri;

na kuuma harĩ aini, nĩ Eliashibu; na kuuma harĩ arangĩri a ihingo, nĩ Shalumu, Telemu, na Uri.

Na harĩ Isiraeli, kuuma harĩ ariũ a Paroshu, maarĩ Ramia, Izia, Malikiya, Mijamini, Eliazaru, Malikiya, na Benaia;

na kuuma harĩ ariũ a Elamu, nĩ Matania, Zakaria, Jehieli, Abudi, Jeremothu, na Eliya;

na kuuma harĩ ariũ a Zatu, nĩ Elioenai, Eliashibu, Matania, Jeremothu, Zabadi, na Aziza;

na kuuma harĩ ariũ a Bebai, nĩ Jehohanani, Hanania, Zabai, na Athilai;

na kuuma harĩ ariũ a Bani, nĩ Meshulamu, Maluku, Adaia, Jashubu, Sheali, na Jeremothu;

na kuuma harĩ ariũ a Pahathu-moabi, nĩ Adina, Kelali, Benaia, Maaseia, Matania, Bezaleli, Binui, na Manase;

na kuuma harĩ ariũ a Harimu, nĩ Eliezeri, Ishiya, Malikiya, Shemaia, Shimeoni,

Benjamini, Maluku, na Shemaria;

kuuma harĩ ariũ a Hashumu, nĩ Matenai, Matata, Zabadi, Elifeleti, Jeremai, Manase, na Shimei;

kuuma harĩ ariũ a Bani, nĩ Maadai, Amuramu, Ueli,

Benaia, Bedeia, Keluhi,

Vania, Meremothu, Eliashibu,

Matania, Matenai, Jaasu;

na kuuma harĩ ariũ a Binui, nĩ Shimei,

Shelemia, Nathani, Adaia,

Makinadebai, Shashai, Sharai,

Azareli, Shelemia, Shemaria,

Shalumu, Amaria, na Jusufu;

na kuuma harĩ ariũ a Nebo, nĩ Jeieli, Matithia, Zabadi, Zebina, Jadai, Joeli, na Benaia

Acio othe nĩ maahikĩtie aka a kũngĩ, na makĩingata aka acio, hamwe na ariũ ao.