Ezara 9

Na rĩrĩa maũndũ macio maarĩkire, anene magĩũka kũrĩ niĩ makĩnjĩra atĩrĩ: “Andũ a Isiraeli na athĩnjĩri-Yahweh o hamwe na Alawii matiĩyamũranĩtie na andũ a mabũrũri na mĩtugo yao ĩrĩ magigi, ya Akanaani, Ahiti, Aperizi, Ajebusi, Aamoni, Amoabi, Amisiri, na Aamori.

Nĩ moete airĩtu amwe ao magatuĩka atumia ao na atumia a ariũ ao. Na rĩrĩ, andũ acio, o acio rũciaro rwamũre, nĩ metukanĩtie na andũ a mabũrũri. Anene o hamwe na atongoria nĩo me mũhari-inĩ wa mbere harĩ kwagarara watho.”

Na rĩrĩa ndaiguire ũguo, ngĩtembũra nguo yakwa na kagooti gakwa gatarĩ moko na ngĩmunya njuĩrĩ imwe cia mũtwe wakwa o na nderu, na ngĩikara thĩ nĩ kũmaka

Na andũ arĩa othe maarĩ na wĩtigĩri harĩ ciugo cia Kĩhoti wa Isiraeli magĩcokanĩrĩra harĩa ndarĩ nĩ ũndũ wa wagarari watho ũcio wa andũ acio mooimĩte ithamĩrio, o hĩndĩ ĩyo ndaikarĩte thĩ ndĩ mũmaku o nginya hĩndĩ ya kũruta igongona rĩa mũtu rĩa hwaĩ-inĩ.

Na hĩndĩ ya kũruta igongona rĩa mũtu rĩa hwaĩ-inĩ, ngĩũkĩra ngiuma harĩa ndaikarĩte ndĩthikĩire, nguo yakwa o na kagooti gakwa gatarĩ moko irĩ ndembũku, na ngĩturia maru, ngĩtambũrũkia moko makwa na igũrũ kũrĩ Yahweh Kĩhoti wakwa

Na ngiuga ũũ: “Wee Kĩhoti wakwa, nĩ ndĩraigua thoni na ngaconoka kũroria ũthiũ wakwa na igũrũ kũrĩ we, wee Kĩhoti wakwa, nĩ gũkorũo mehia maitũ nĩ mongererekete mũno igũrũ rĩa mĩtwe itũ namo mahĩtia maitũ makaingĩha magakinya o igũrũ

Kuuma o matukũ-inĩ ma maithe maitũ ma tene nginya ũmũthĩ mehia maitũ makoretwo marĩ maingĩ; na nĩ ũndũ wa mehia maitũ, ithuĩ, athamaki aitũ, na athĩnjĩri-Yahweh aitũ nĩ tũneanĩtwo guoko-inĩ kwa athamaki a mabũrũri, tũkaneanwo kũrĩ rũhiũ rwa njora, tũgatwarũo ithamĩrio, tũgatahwo, na tũgaconorithio, o ta ũrĩa kũrĩ mũthenya wa ũmũthĩ

No rĩu kwa ihinda inyinyi, Yahweh Kĩhoti witũ nĩ atwĩtĩkĩrĩte na njĩra ya kũreka kũgĩe na andũ megũtigara na agatũhe handũ harĩ na ũgitĩri thĩinĩ wa handũ hake harĩa hamũre, nĩguo ũtũme maitho maitũ macangarare, wee Kĩhoti witũ, na ũtũhe ũhurũko wa ihinda inyinyi kuuma ũkombo-inĩ witũ

Nĩ gũkorũo o na gũtuĩka tũrĩ ngombo, Kĩhoti witũ ndatũtiganĩirie ũkombo-inĩ witũ; no nĩ atũigurĩire tha tũkĩonwo nĩ athamaki a Perisia, agatwarahũra nĩguo tũrũgamie nyũmba ya Kĩhoti witũ na tũcokererie kũrĩa yanangĩkĩte na atũhe rũthingo rwa ihiga thĩinĩ wa Yahuda na Yahrushalayim.

“No rĩu Kĩhoti witũ-rĩ, nĩ atĩa tũngiuga thutha wa maũndũ macio? Nĩ gũkorũo nĩ tũtiganĩte na maathani maku,

marĩa watũheire kũgerera ndungata ciaku anabii, ũkiuga ũũ: ‘Bũrũri ũrĩa mũrathiĩ kwĩgwatĩra ti mwamũre nĩ ũndũ wa thahu wa andũ a mabũrũri, tondũ wa mĩtugo yao ĩrĩ magigi ĩrĩa maiyũrĩtie kuo kuuma gĩturi kĩmwe nginya kĩrĩa kĩngĩ nĩ ũndũ wa gũkorũo marĩ na thahu

Nĩ ũndũ ũcio, mũtikananeane airĩtu anyu mahikio nĩ ariũ ao, o na kana mwĩtĩkĩrie airĩtu ao mahikio nĩ ariũ anyu; na mũtikanacarie thayũ wao o na kana ũgaacĩru wao, nĩgetha mũgĩe na hinya na mũrĩe indo njega cia bũrũri ũcio na mũwĩgwatĩre nĩ ũndũ wa ariũ anyu tene na tene.’

Na thutha wa maũndũ mothe marĩa matũkorete nĩ ũndũ wa ciĩko citũ njũru na mahĩtia maitũ manene-rĩ—nĩ gũkorũo wee Kĩhoti witũ ndũtwĩkĩte kũringana na mehia maitũ, na nĩ ũtwĩtĩkĩrĩtie ithuĩ tũrĩ gũkũ tũhonoke—

hihi nĩ twagĩrĩirũo kuuna maathani maku o rĩngĩ na tũthondeke ũiguano wa kũhikanagia na andũ arĩa mekaga maũndũ macio marĩ magigi? Na githĩ to ũtũrakarĩre na ũtũniine biũ, kwage mũndũ o na ũmwe witũ ũgũtigara

Wee Yahweh Kĩhoti wa Isiraeli, ũrĩ mũthingu, nĩ gũkorũo nĩ tũhonokete tũrĩ matigari nginya mũthenya ũyũ. Tũrĩ haha mbere yaku na mehia maitũ, tondũ tũtingĩhota kũrũgama mbere yaku nĩ ũndũ wa maũndũ macio.”