Gũcokerithia Maathani 17
“Ndũkanarutĩre Yahweh Kĩhoti waku igongona rĩa ndegwa kana ng’ondu ĩrĩ na kaũgũ kana kawathe o gothe, nĩ gũkorũo ũcio nĩ ũndũ ũrĩ magigi harĩ Yahweh Kĩhoti waku.
“Mũndũrũme kana mũndũ-wa-nja gatagatĩ-inĩ kanyu ũrĩ thĩinĩ wa itũũra rĩmwe rĩa marĩa Yahweh Kĩhoti waku arakũhe, angĩkonwo agĩka ũndũ mũũru maitho-inĩ ma Yahweh Kĩhoti waku athũkie kĩrĩkanĩro gĩake,
na ogomie mĩthiĩre yake athathaiye ihoti ingĩ na acinamĩrĩre kana ainamĩrĩre riũa kana mweri kana mbũtũ yothe ya igũrũ, ũndũ ũrĩa niĩ itathanĩte,
na ũmenyithio kana ũigue ũhoro ũcio, wagĩrĩirũo gũthuthuria ũhoro ũcio na kinyi. Na kũngĩmenyeka atĩ nĩ ma ũndũ ũcio ũrĩ magigi nĩ wĩkĩtwo thĩinĩ wa Isiraeli,
wagĩrĩirũo kũruta mũndũrũme kana mũndũ-wanja ũcio wĩkĩte ũndũ ũcio mũũru ũmũtware nja ya ihingo cia itũũra, na mũndũrũme kana mũndũ-wa-nja ũcio agĩrĩire kũhũũrũo na mahiga nginya akue
Mũndũ ũcio ũtuĩrĩirũo kũũragwo agĩrĩire kũũragwo angĩkorũo harĩ na ũira wa andũ erĩ kana atatũ. Ndagĩrĩire kũũragwo nĩ ũndũ wa ũira wa mũndũ ũmwe
Moko ma aira acio nĩmo magĩrĩirũo gũkorũo marĩ ma mbere gũũkĩrĩra mũndũ ũcio nĩguo oragwo, namo moko ma andũ acio angĩ othe macoke marũmĩrĩre. No mũhaka weherie kĩndũ kĩũru gatagatĩ-inĩ gaku.
“Kũngĩkoimĩra ciira mũritũ mũno ũtangĩhota gũtuithania itũũra-inĩ o rĩothe rĩanyu, hihi ciira wĩgiĩ ũiti wa thakame kana gũtuithania mũndũ na ũrĩa ũngĩ kana gĩĩko gĩkĩtwo kĩa ũhinya kana ciira ũngĩ wĩgiĩ kwaga kũiguithania, wagĩrĩirũo gũũkĩra ũthiĩ handũ harĩa Yahweh Kĩhoti waku agaathuura
Ũthiĩ kũrĩ athĩnjĩri-Yahweh Alawii na atuanĩri ciira arĩa magaakorũo magĩtungata matukũ-inĩ macio, na ũmorie ũhoro ũcio, na nĩ marĩkwĩraga itua rĩao
Thutha ũcio wagĩrĩirũo gwĩka kũringana na itua rĩu makwĩra kuuma handũ harĩa Yahweh agaathuura. Wagĩrĩirũo gũtigĩrĩra nĩ weka ũrĩa wothe makwĩra
No mũhaka ũgeeka kũringana na watho ũrĩa makuonia na kũringana na itua rĩrĩa makwĩra. Ndũkanaagarare itua rĩrĩa megũkwĩra, ũrore mwena wa ũrĩo kana wa ũmotho
Mũndũ ũrĩa ũkoonania mwĩtĩo na njĩra ya kwaga gũthikĩrĩria mũthĩnjĩri-Yahweh ũrĩa ũgaakorũo agĩtungatĩra Yahweh Kĩhoti waku kana age gũthikĩrĩria mũtuanĩri ciira, agĩrĩire kũũragwo. No mũhaka weherie kĩndũ kĩũru thĩinĩ wa Isiraeli
Nao andũ arĩa angĩ othe nĩ makaaigua ũhoro ũcio na metigĩre, na matikonania mwĩtĩo rĩngĩ.
“Rĩrĩa ũkaingĩra bũrũri ũrĩa Yahweh Kĩhoti waku arakũhe na ũkorũo ũwĩgwatĩire na ũgaikara kuo, ũcoke uuge atĩrĩ, ‘Reke ndĩyamũrĩre mũthamaki wa gũũthamakagĩra o ta ndũrĩrĩ iria ciothe cithiũrũrũkĩirie,’
ũngĩkoiga ũguo, wagĩrĩirũo kwamũra mũthamaki ũrĩa Yahweh Kĩhoti waku agaathuura. Wagĩrĩirũo kwamũra mũthamaki kuuma gatagatĩ-inĩ ka ariũ a thoguo. Ndwĩtĩkĩrĩtio kwamũra mũndũ wa kũngĩ ũtarĩ mũrũ wa thoguo atuĩke mũthamaki wa gũgũthamakĩra
No rĩrĩ, ndagĩrĩirũo kwĩgĩĩra na mbarathi nyingĩ kana atũme andũ macoke Misiri nĩguo ongerere mbarathi ingĩ, nĩ gũkorũo Yahweh nĩ aamwĩrire ũũ, ‘Mũtikanacoke na thutha mũgere njĩra ĩyo rĩngĩ.’
Ndagĩrĩirũo kũhikia atumia aingĩ, nĩgetha ngoro yake ndĩkanagarũrũke; o na ndagĩrĩirũo kwĩgĩĩra betha na thahabu nyingĩ
Na rĩrĩa agaaikarĩra gĩtĩ kĩa ũnene kĩa ũthamaki wake, agĩrĩirũo kwĩyandĩkĩra kobĩ ya Watho ũyũ ibuku-inĩ, ũrutĩtwo kuuma harĩ ũrĩa ũigĩtwo nĩ athĩnjĩri-Yahweh Alawii.
“Agĩrĩirũo gũtũũra na ibuku rĩu, na arĩthomage matukũ-inĩ mothe ma ũtũũro wake, nĩgetha erute gwĩtigĩra Yahweh Kĩhoti wake na kũrũmĩrĩra maũndũ marĩa mothe marĩ thĩinĩ wa Watho ũyũ hamwe na mawatho maya na njĩra ya kũmahingagia
Na nĩ ũndũ ũcio ngoro yake ndĩgetũũgĩria igũrũ rĩa ariũ a ithe, na ndakagarara maathani arore mwena wa ũrĩo kana mwena wa ũmotho, nĩgetha agaatũũra ihinda iraya ũthamaki-inĩ wake, we o hamwe na ariũ ake gatagatĩ-inĩ ka Isiraeli.